Türkmenistanyň Prezidenti «ENEX» kompaniýasynyň baştutanyny kabul etdi

Düýn Türkmenistanyň Prezidenti Gurbanguly Berdimuhamedow Belgiýanyň meşhur «ENEX process engineering SA» kompaniýasynyň baş direktory Kun Minneni kabul etdi.
Biznesmen döwlet Baştutanymyzy gutlamak bilen, ikitaraplaýyn hyzmatdaşlygyň ileri tutulýan ugurlaryny ara alyp maslahatlaşmaga döredilen mümkinçilik üçin hormatly Prezidentimiz Gurbanguly Berdimuhamedowa minnetdarlyk bildirdi. Türkmenistan bilen uzakmöhletli gatnaşyklara Ýewropanyň işjeň toparlarynyň arasynda, şol sanda Belgiýada üýtgewsiz ýokary gyzyklanmanyň bardygyny belläp, jenap Kun Minne «ENEX» kompaniýasynyň türkmen bazaryndaky ornuny geljekde has-da giňeltmegi niýet edýändigini belledi.
Döwlet Baştutanymyz belgiýaly partnýorlaryň bu niýetini goldamak bilen, indi birnäçe ýyl bäri «ENEX» kompaniýasynyň Türkmenistanda alyp barýan işlerine ýokary baha berdi. Hormatly Prezidentimiz Gurbanguly Berdimuhamedow Belgiýanyň bu kompaniýasyny milli ykdysadyýetimiziň dürli pudaklaryny ösdürmek boýunça alnyp barylýan iri möçberli maksatnamany, hususan-da, geljekde önümçilik infrastrukturasyny döwrebaplaşdyrmak boýunça kabul edilen taslamalary durmuşa geçirmäge işjeň gatnaşmaga çagyrdy.
Şu jähetden söhbetdeşler Türkmenistanda «ENEX» kompaniýasyna ynanylan birnäçe taslamalaryň durmuşa geçirilişini, şeýle hem özara bähbitli hyzmatdaşlygy giňeltmegiň mümkinçiliklerini ara alyp maslahatlaşdylar. Özara gatnaşyklaryň geljegi uly bolan ugurlarynyň hatarynda ýangyç-energetika sektory, gaýtadan işleýän senagat, nebithimiýa pudagy, mineral dökünleriniň önümçiligi, şeýle hem dokma senagaty bar. Energetiki tehnologiýalary ornaşdyrmaga, hususan-da, Türkmenistanyň şertlerinde günüň we ýeliň energiýasyny peýdalanmak meselesine aýratyn üns berildi.
Jenap Kun Minneniň habar berşi ýaly, ýakyn wagtda «ENEX» kompaniýasy hyzmatdaşlyk boýunça anyk teklipleri türkmen tarapyna berer. Myhman Aşgabatda «ENEX»-iň edara binasyny gurmak baradaky taslamanyň üstünde işlenilişi hakynda habar berdi.
Hormatly Prezidentimiz Gurbanguly Berdimuhamedow Belgiýa kompaniýasynyň ähli tekliplerine garaljakdygyny belläp, Türkmenistanyň nou-haulary, şol sanda nanotehnologiýalary çekmäge gyzyklanma bildirýändigini nygtady.
Jenap Kun Minne «ENEX»-iň Türkmenistan bilen hyzmatdaşlygyna tüýs ýürekden buýsanýandygyny aýdyp, özüniň ýolbaşçylyk edýän kompaniýasynyň bildirilen ynamy ödemek üçin ähli tagallalary etjekdigini aýtdy. Pursatdan peýdalanyp, myhman Türkmenistanyň Prezidentini düýn bellenilip geçilen doglan güni bilen gutlady we döwlet baştutanyna berk jan saglyk, egsilmez güýç-gaýrat hem-de progressiw özgertmeleriň we reformalaryň ýolunda täze üstünlikleri arzuw etdi.
Hoşlaşan mahaly hormatly Prezidentimiz Gurbanguly Berdimuhamedow we onuň myhmany özara bähbitli hyzmatdaşlygyň mundan beýläk-de üstünlikli ösdüriljekdigine ynam bildirdiler.