Düýn Türkmenistanyň Prezidenti «Sumynyň M.F.Frunze adyndaky maşyngurluşyk ylmy-önümçilik birleşigi» açyk paýdarlar jemgyýetiniň müdiriýetiniň başlygy Wladimir Lukýanenkony kabul etdi.
Myhman duşuşmaga mümkinçilik döredendigi üçin minnetdarlyk bildirip, Ukrainanyň iri senagat birleşiginiň Türkmenistan bilen özara bähbitli hyzmatdaşlygy ösdürmäge ýokary gyzyklanma bildirýändigini tassyklady. Pursatdan peýdalanyp, Wladimir Lukýanenko hormatly Prezidentimiz Gurbanguly Berdimuhamedowy düýn bellenip geçilen doglan güni bilen tüýs ýürekden gutlady we jan saglyk, uzak ömür hem-de türkmen halkynyň bagtyýarlygynyň we rowaçlygynyň hatyrasyna alyp barýan asylly işlerinde täze ajaýyp üstünlikler arzuw etdi.
Döwlet Baştutany gutlaglary we gowy arzuwlary üçin minnetdarlyk bildirip, Türkmenistanda «Sumynyň M.F.Frunze adyndaky maşyngurluşyk ylmy-önümçilik birleşigi» açyk paýdarlar jemgyýetini öňden gelýän we ygtybarly hyzmatdaş hasaplaýandyklaryny belledi. Ýangyç-energetika toplumynda möhüm desgalaryň birnäçesini guran bu açyk paýdarlar jemgyýetiniň işi ýokary baha mynasypdyr. Şu jähetden söhbetdeşler milli ýangyç-energetika toplumyny döwrebaplaşdyrmak we ösdürmek baradaky uzakmöhletleýin maksatnamalary nazara almak bilen, geljekki hyzmatdaşyk barada pikir alyşdylar.
Duşuşygyň barşynda W.Lukýanenko döwlet Baştutanyna ukrain açyk paýdarlar jemgyýetine durmuşa geçirmek tabşyrylan iri taslamalaryň birnäçesiniň ilerledilişi barada habar berdi. Myhman uly ynam bildirendigi üçin Türkmenistanyň Prezidenti Gurbanguly Berdimuhamedowa minnetdarlyk bildirip, öz tarapyndan «Sumynyň M.F.Frunze adyndaky maşyngurluşyk ylmy-önümçilik birleşigi» açyk paýdarlar jemgyýeti geljekde hem özüniň partnýorlyk babatdaky borçnamalaryny ýerine ýetirmäge örän jogapkärli çemeleşer diýip nygtady.
W.Lukýanenkonyň söhbetdeşlikde nygtaýşy ýaly, türkmen halkynyň özüniň reformatorçylyk syýasaty bilen bütin dünýäde belent abraýa eýe bolan milli Lideriniň daşyna uly ruhubelentlik bilen jebisleşen döwründe baýramçylyga beslenen Aşgabada gelmegi onda aýratyn kanagatlanma duýgusyny döretdi. «Bize iki sany täze möhüm desganyň—Naýypda we Hazarda kompressor stansiýalarynyň gurluşygynyň ynanylandygyna buýsanýarys. Biz hem öz gezegimizde şu belent ynama abraý bilen hötde gelmek üçin ähli tagallalary ederis» diýip, myhman aýtdy.