Türkmenistanyň Prezidenti «Gazprom» açyk paýdarlar jemgyýetiniň direktorlar geňeşiniň Başlygynyň orunbasaryny kabul etdi

Türkmenistanyň Prezidenti Gurbanguly Berdimuhamedow «Gazprom» açyk paýdarlar jemgyýetiniň direktorlar geňeşiniň Başlygynyň orunbasary Alekseý Milleri kabul etdi.
Duşuşygyň barşynda söhbetdeşler 25 ýyllyk döwletara ylalaşygynyň çäklerinde uzakmöhletleýin esasda gaz ulgamynda üstünlikli ösdürilýän hyzmatdaşlyga degişli meseleleri ara alyp maslahatlaşdylar. Taraplar boýun alnan borçlaryň ýerine ýetirilmegine elmydama ygrarlydyklaryny belläp, ýakyn geljek üçin bilelikdäki meýilnamalar boýunça pikir alyşdylar hem-de hyzmatdaşlygyň uly potensialyndan we mümkinçiliklerinden has doly peýdalanmak maksady bilen, däp bolup gelýän hyzmatdaşlygy ösdürmegiň ileri tutulýan ugurlaryny kesgitlediler. Şonda rus tarapy türkmen tebigy ýangyjynyň satyn alynýan möçberlerini artdyrmaga taýýardygyny tassyklady.
Hazarýaka gaz geçirijisiniň gurluşygy hem-de hereket edýän döwletara gaz geçiriji ulgamy döwrebaplaşdyrmak baradaky taslamalary durmuşa geçirmek meselesi söhbetdeşlikde ara alnyp maslahatlaşylan meseleleriň biri boldy. Şunuň bilen baglylykda Türkmenistanyň Prezidenti we «Gazprom» açyk paýdarlar jemgyýetiniň direktorlar geňeşiniň Başlygynyň orunbasary täze gaz geçirijini gurmaga girişmegiň möhletlerini mümkingadar tizleşdirmäge özara gyzyklanma bildirdiler, bu gaz geçirijisi hyzmatdaş ýurtlara—ýangyjy uly möçberde eksport edijilere Ýewropanyň bazaryna çykmaga has giň ýol açar hem-de Hazar sebitiniň nebitgaz infrastrukturasynyň ösdürilmegine güýçli itergi berer. Şeýle hem beýleki perspektiwaly ugurlaryň birnäçesi boýunça, hususan-da, gazy gaýtadan işlemekde hyzmatdaşlyk etmegiň mümkinçilikleri ara alnyp maslahatlaşyldy.
Prezident Gurbanguly Berdimuhamedow ýangyç-energetika sektoryndaky diwersifikasiýalaşdyrmak prinsiplerinde guralýan hem-de dünýäniň energetika bazarynyň konýunkturasyndan ugur alýan hyzmatdaşlyk boýunça ýurdumyzyň pozisiýasyny aýdyňlaşdyryp, şunda «Gazprom» açyk paýdarlar jemgyýetiniň Türkmenistanyň esasy strategiki hyzmatdaşy bolandygyny we şeýle bolmagynda galýandygyny belledi.
Alekseý Miller mümkinçilikden peýdalanyp, Türkmenistanyň Prezidentini doglan güni bilen tüýs ýürekden gutlady hem-de berk jan saglyk we Türkmenistanyň halkynyň bähbidine gönükdirilen ähli başlangyçlarynda täze üstünlikleri gazanmagy arzuw etdi.
Türkmen Lideri we myhman hoşlaşanlarynda, deňhukuklylyk, özara bähbitlilik esasynda amala aşyrylýan netijeli hyzmatdaşlygyň mundan beýläk-de üstünlikli dowam etdiriljekdigine ynam bildirdiler.
Duşuşyga Russiýa Federasiýasynyň Türkmenistandaky Adatdan daşary we Doly ygtyýarly ilçisi Igor Blatow gatnaşdy.