Türkmenistanyň Prezidenti Saud Arabystany Patyşalygynyň ýokary wezipeli wekilini kabul etdi

Türkmenistanyň Prezidenti Gurbanguly Berdimuhamedow Saud Arabystany Patyşalygynyň goranmak ministriniň geňeşçisi Emir Muhammad ben Saad ben Halid ben Muhammad Al-Saudy kabul etdi.
Myhman Türkmenistanyň Prezidentini doglan güni bilen gutlap, oňa berk jan saglyk, bagt, abadançylyk we ýokary döwlet wezipesindäki edermençilikli işinde uly üstünlikler arzuw edip, milli Liderimiz Gurbanguly Berdimuhamedowa Saud Arabystanynyň Patyşasy Abdulla ben Abdel Aziz Al-Saudyň we Mirasdüşer şazada Emir Sultan ben Abdel Aziz Al-Saudyň mähirli salamyny we iň oňat arzuwlaryny gowşurdy.
Türkmenistanyň Prezidenti mähirli sözler üçin minnetdarlyk bildirip, öz gezeginde, Saud Arabystanynyň Patyşasyna we Patyşanyň maşgala agzalaryna iň oňat arzuwlaryny aýtdy we ýola goýlan döwletara gatnaşyklarynyň ýokary derejä eýe bolandygyny kanagatlanma bilen belledi.
Duşuşygyň barşynda myhman türkmen döwletiniň baştutanyna «Türkmenistan we Saud Arabystany: dostlugyň we hyzmatdaşlygyň ýoly bilen» diýen kitaby gowşurdy, ýakynda türkmen paýtagtynda bu kitap bilen tanyşdyrylyş dabarasy geçirildi. Emir Muhammad ben Saad ben Halid ben Muhammad Al-Saud türkmen Liderine kitabyň neşir edilmegine ýardam berendigi üçin minnetdarlyk bildirip, Saud Arabystanynda-da bu kitap bilen tanyşdyrylyş dabarasynyň geçiriljekdigini belledi.
Muhammad ben Saad ben Halid ben Muhammad Al-Saudyň bellemegine görä, Prezident Gurbanguly Berdimuhamedowyň uly möçberli reformatorçylyk işine hem-de doganlyk iki halkyň arasyndaky dostlukly gatnaşyklara bagyşlanan bu kitapda 2007-nji ýylyň aprelinde Türkmenistanyň Baştutanynyň Saud Arabystanyna bolan saparyna aýratyn orun berilýär, bu sapar döwletara gatnaşyklarynyň taryhynda hil taýdan täze tapgyryň başlanmagyna badalga berip, ugurlaryň ählisi boýunça özara peýdaly hyzmatdaşlygyň işeňňirleşdirilmegine güýçli itergi berdi.
Emir Türkmenistan bilen gatnaşyklaryň ösdürilmegine Saud Arabystanynda uly ähmiýet berilýändigini belläp, türkmen Lideri tarapyndan gadymy ruhy gymmatlyklaryň, parahatçylyk we ynsanperwerlik ideallarynyň berkemegine gönükdirilip amala aşyrylýan syýasatynyň halkara derejesinde ykrar edilýändigini aýratyn nygtady.
Prezident Gurbanguly Berdimuhamedow kitaby neşir etmek baradaky başlangyjy üçin tüýs ýürekden minnetdarlyk bildirip, bu işiň Türkmenistan bilen Saud Arabystanynyň halklarynyň arasyndaky doganlyk gatnaşyklaryny berkitmäge, iki ýurduň abadançylygynyň hatyrasyna döwletara gatnaşyklaryny mundan beýläk-de giňeltmäge we çuňlaşdyrmaga ýene bir goşant bolar diýip ynam bildirdi.
Duşuşyga Saud Arabystany Patyşalygynyň Türkmenistandaky Adatdan daşary we Doly ygtyýarly ilçisi Abdul Aziz Ibrahim Al-Gadir gatnaşdy.