Birinji iýuldan Aşgabat-Türkmenbaşy aralygynda ýene bir otly gatnap ugrady. Bu Hazarda tomusky möwsümiň başlanmagy bilen öňki ýolagçy gatnawyna goşmaça hökmünde açylan ikinji reýsdir. Türkmenistan bilen Hytaýyň arasyndaky uzakmöhletleýin şertnamanyň çäklerinde Hytaýdan getirilen ýokary amatlykly wagonlaryň on bäşisinden düzülen, çalt hereket edýän otly günaşa Hazaryň kenaryna 500-e golaý ýolagçyny elter.
Mälim bolşy ýaly, Türkmenistanyň Demir ýol ulaglary ministrliginiň otly düzümleri yzygiderli döwrebaplaşdyrylýar we olaryň sany HHR-den getirilýän döwrebap demir ýol tehnikasynyň hasabyna artdyrylýar. Hytaý teplowozlarynyň we wagonlarynyň saýlanyp alynmagy, ilki bilen olaryň ygtybarlylygy hem-de hödürlenýän ýokary amatlyklar bilen şertlendirilendir. Täze çalt hereket edýän otlynyň ýolagçylary bu artykmaçlyklara baha berip bilerler, çünki her bir wagon häzirki zaman howa-gözegçilik enjamlary, ergonomiki ýolagçy orunlary we beýleki amatlyklar bilen üpjün edilendir.
Türkmenistanyň Demir ýol ulaglary ministrliginde habar berişleri ýaly, Hazaryň türkmen kenarynda dünýä derejesindäki kurorty döretmek baradaky «Awaza» milli syýahatçylyk zolagy boýunça ägirt uly taslamanyň durmuşa geçirilip başlanmagy bilen baglylykda demir ýol gatnawlarynyň bu ugry yzygiderli ösdüriler. Mundan başga-da ozal Aşgabat-Bereket aralygynda gatnan şäherýaka otlusynyň marşruty Balkan welaýatynyň merkezi Balkanabat şäherine çenli hereket eder. 1-nji iýuldan başlap şäherýaka otlularynyň gatnawlarynyň tertibinde ýene bir reýs—Änew-Gökdepe reýsi peýda boldy.