Futbol boýunça Türkmenistanyň çempionatynyň 9-njy tapgyry Mary, Aşgabat we Türkmenbaşy şäherlerinde geçirilen oýunlar bilen başlandy.
Marynyň «Sport toplumy» stadionynda «Merw» bilen «Energetik» duşuşdy. Birinji aýlawda bu toparlaryň duşuşygy Alibek Abdurahmanowyň geçiren iki pökgüsi netijesinde 2:1 hasabynda «Merwiň» ýeňşi bilen tamamlanypdy.
Alibek Abdurahmanow jogap duşuşygynyň 89-njy minudynda hem tapawutlanyp, 1:0 hasabynda “Merw” toparyna ýeňiş getirdi. «Energetik» toparynyň oýunçysy Aşyr Jumadurdyýew oýnuň 75-nji minutynda meýdançadan kowlandan soň topar azlykda oýnapdy.
Paýtagtymyzyň «Köpetdag» stadionynda Türkmenistanyň IIM-niň futbol topary «Aşgabat» toparyny kabul etdi. Golaýda olar Türkmenistanyň Kubogy ugrunda birinji çärýek final oýunda duşuşanlarynda «Köpetdag» 3:2 hasabynda ýeňiş gazanypdy.
Milli birinjiligiň 1-nji aýlawynyň oýny-da Tofik Şükürowyň şägirtleriniň 2:1 hasabynda ýeňşi bilen tamamlanypdy. Şonda pökgüleriň ikisini hem ýeňen topardan Begenç Akmämmedow tora salypdy. Ol bu gezegem 52-nji we 78-nji minutlarada tapawutlanyp, 2:0 hasabynda «Köpetdaga» ýeňiş getirdi.
Şundan soň Begenç Akmämmedow «Ahalyň» hüjümçisi Didar Durdyýewden 1 pökgi köp, ýagny 10 pökgi geçirip, bombardirleriň arasynda öňe çykdy.
Türkmenbaşy şäherinde ýerli «Şagadam» Balkanabadyň «Nebitçisi» bilen duşuşdy. Birinji aýlawyň duşuşygynda Balkanabatda «Şagadam» 1:0 hasabynda ýeňiş gazanypdy. Jogap oýnunda-da kenar ýakasynyň futbolçylary 6:1 hasabynda utdular. Ýeňen topardan Kerim Hojaberdiýew (6-njy), Mekan Aşyrow (23-nji), Baýramgeldi Nurlyýew (33-nji minutda 11 metrlik jerime urgusyndan), Yhlas Magtymow (36-njy), Akmämmet Metdäýew (62-nji minutda 11 metrlik jerime urgusyndan) we Roman Galkin (67-nji) minutlarda tapawutlandylar. 75-nji minutda Hemra Gulyýew 11 metrlik jerime urgusyndan abraý pökgüsini tora saldy.
Bäsdeşlerini utan «Merw» topary 16 utuk, «Köpetdag» 15 utuk we «Şagadam» 14 utuk toplap, çempionlyk ugrunda göreşýän «Ahal» hem-de «Altyn asyr» toparlarynyň eýeleýän orunlaryna golaýlaşdylar, olaryň bolsa ätiýaçda bir oýny bolup, degişlilikde 22 we 18 utugy bar.
Milli birinjiligiň 9-njy tapgyry ýurdumyzyň iň güýçli toparlary -- «Ahalyň» we «Altyn asyryň» duşuşygy bilen jemlener. Birinji aýlawda olar öz aralarynda 1:1 hasabynda deň oýnapdylar.
