Döwletmämmet Azady adyndaky Türkmen milli dünýä dilleri institutynyň binýadynda bilim taslamalarynyň – daşary ýurtly rus dili mugallymlary üçin «Beýik zady öwredýärin» hem-de talyplar üçin «Beýik zady öwrenýärin» rus dili boýunça taslamanyň çäklerinde okuwlar geçirilýär.
Naberežnyýe Çelny döwlet mugallymçylyk uniwersiteti tarapyndan Russiýa Federasiýasynyň Bilim ministrliginiň ýardam bermeginde «Meniň taryhym» atly ynsanperwer ylymlary goldamak baradaky gazna bilen bilelikde guralan okuwlar ýurduň bäş welaýatyndan rus dili mugallymlary we institutyň talyplary bilen birlikde ýüzden gowrak adamy bir ýere jemledi.
Mugallymlar we talyplar bilen okuwlary rus mugallymçylyk uniwersitetiniň esasy hünärmenleri – rus we tatar filologiýasy kafedrasynyň müdiri, filologiýa ylymlarynyň kandidaty, dosent Konstantin Andreýewiç Kalinin hem-de rus we tatar filologiýasy kafedrasynyň dosenti, filologiýa ylymlarynyň kandidaty Aleksandra Wiktorowna Potanina geçýärler.
Türkmen talyplarynyň we mugallymlarynyň rus diline erk edip bilişleriniň ýokary derejededigini belläp, bilermenler okuwlaryň esasy maksadynyň özara gatnaşyk etmekden hem-de iş ýüzünde gepleşik dilini geçmekden ybaratdygyny nygtaýarlar.
– Grammatika taýdan çemeleşmek möhüm, ýöne diliň esasy wezipesi gepleşmekdir. Esasy zat daşary ýurt dilini öwrenýän adamyň gepleşmekde päsgelçilik duýmazlygyny gazanmakdyr. Ençeme daşary ýurt dillerini biz pes derejede bilýäris, biziň olary gepleşmegiň serişdesi hökmünde ulanmagy öwrenmegimiz möhümdir – diýip, Konstantin Kalinin aýdýar.
Diňleýjiler üçin geljekde hünär işinde ulanmaklaryna niýetlenen tejribe häsiýetli materiallar ýörite işlenilip taýýarlanyldy.
– Türkmenistanda rus diline gyzyklanma ýokary derejede bolmagynda galýar. Institutyň öz işine ökde mugallymlary rus diliniň ösüş taryhy we gelip çykyşy bilen baglanşykly çylşyrymly meseleler boýunça pikir alyşmaga taýýar. Talyplar hem ýokary derejede bilesigelijiliklerini hem-de köp okandyklaryny görkezýärler. Biziň okuwymyz köp babatda çeper eserlere niýetlenendir, talyplar bolsa olary dogurdan-da bilýärler.
Okuwlar tamamlanandan soň, olara gatnaşyjylara hünärleriniň ýokarlandyrylandygyny tassyklaýan güwänamalar gowşurylar.
Naberežnyýe Çelny döwlet mugallymçylyk uniwersitetinden gelen myhmanlaryň Türkmenistana sapary ilkinji gezek däldir. Olar her gezek gelenlerinde ak mermerli paýtagtymyzyň arassalygyna we owadanlygyna hem-de türkmen halkynyň myhmansöýerligine haýran galýarlar. Saparyň çäklerinde olar ähmiýetli medeni ojaklara, şol sanda «Magtymguly Pyragy» medeni-seýilgäh toplumyna we Köne Nusaý taryhy ýadygärligine baryp gördüler.
