Berkarar Diýarymyzyň dürli pudaklaryna degişli edara-kärhanalaryň maddy-enjamlaýyn binýadyny berkitmek, ilata edilýän hyzmatyň netijeliligini we hilini ýokarlandyrmak boýunça tutumly işler amala aşyrylýar. Ýaňy-ýakynda ýurdumyzyň welaýatlarynyň we Aşgabat şäher häkimlikleriniň jemagat hojalygy birleşiklerine kuwwatly, ähli amatlyklary bolan awtoulaglaryň, tehnikalaryň we enjamlaryň uly toplumynyň gelip gowuşmagy ýokarda aýdylanlaryň aýdyň subutnamasydyr.
Ýurdumyzyň Lebap welaýat häkimliginiň jemagat hojalygy birleşigine hem şeýle kämil tehnikalaryň 148 sanysy gelip gowuşdy. Olaryň 79-sy awtoulaglar, 7 sanysy ýöriteleşdirilen tehnikalar we 62 sanysy hem dürli maksatlara niýetlenen enjamlardyr. Birleşigiň işgärleriniň işleriniň netijeliligini has-da artdyrjak, şäheriň görküne görk goşjak ýöriteleşdirilen awtoulaglaryň 15-si zeý suwuny sorujy, 2 sanysy ýokary basyşly lagym ulgamlaryny arassalaýjy, 2-si süpüriji-ýuwujy, zir-zibilleri ýygnamaklyga niýetlenenleriniň 30 sanysy, gidrogaldyryjylaryň 3-si, 24 adamlyk awtobuslaryň 10 sanysy, 1 sany ýük göterijiligi 25 tonna deň bolan awtokran we beýleki görnüşlerdir. Welaýat jemagat hojalygyna gelip gowşan ýöriteleşdirilen tehnikalaryň 3-si ýükleýji ekskowator, 3-si öňtaraplaýyn uly ýükleýji, 1-i hem tekerli ekskowatordyr. Gelip gowşan kämil tehnikalaryň arasynda bag göçürmeklige niýetlenen we aýratyn dakylýan enjamlaryň toplumynyň bolmagy-da bellärliklidir. Täze tehnikalar welaýatyň ýaşaýjylary tarapyndan gadymyýetden gelýän milli däplerimize görä un sepilip, alaja dakylyp garşy alyndy.
Welaýatyň jemagat hojalygy birleşigine alnyp berlen ýöriteleşdirilen tehnikalar özüniň dolandyrylyşynyň, iş usullarynyň häzirki zaman innowasion tehnologiýalarynyň ornaşdyrylandygy bilen tapawutlanýar. Bu bolsa ýerine ýetiriljek işi gysga wagtda, ýokary hil derejesinde amal etmeklige, diýmek, raýatlarymyz üçin bada-bat oňaýly şertleri döretmeklige mümkinçilik berer. Lebap welaýat jemagat hojalygy birleşiginiň agzybir işgärleri alyp beren kuwwatly, dürli görnüşli ýöriteleşdirilen awtoulaglary, tehnikalary we enjamlary üçin hormatly Prezidentimiz Arkadagly Gahryman Serdarymyzyň adyna tüýs ýürekden çykýan hoşallyk sözlerini aýdýarlar.
