2026-njy ýylyň 13-16-njy ýanwary aralygynda Germaniýa Federatiw Respublikasynyň Maýn boýundaky Frankfurt şäherinde ýerleşýän «Messe Frankfurt» halkara sergi merkezinde öý tekstili üçin dünýäniň iň ähmiýetli sergilerinden biri bolan «Heimtextil 2026» sergisi geçirildi. Bu barada Türkmenistanyň DIM-niň web-saýtynda habar berilýär. 

«Heimtextil» — öý, myhmanhana, ofis, söwda merkezleri we beýleki hususy we döwlet desgalary üçin dokma çözgütlerini öndürýän, dizaýner, üpjün ediji we alyjylar üçin möhüm çäre bolup durýar. Şu ýyl sergä 65-den gowrak ýurduň 3 müňden gowrak kompaniýa gatnaşdy, olar giň möçberli önümleri — öý we bezeg tekstilinden başlap, myhmanhana we şertnama segmentleri üçin çözgütler hödürlediler.

Türkmenistanyň milli pawilýonynda Dokma senagaty ministrligi milli öndürijileriň tebigy pagta esasynda öndürilen baý önümler toplumy bilen çykyş edip, türkmen dokma pudagynyň ýokary hilini, döredijilikli çemeleşmeleri we häzirki ösüş tendensiýalaryny görkezmäge mümkinçilik döretdi.

Türkmenistanyň wekiliýetine Dokma senagaty ministri Nurmuhammet Orazgeldiýew ýolbaşçylyk etdi we daşary ýurt hyzmatdaşlary, işewür toparlaryň wekilleri we alyjylar bilen özara bähbitli hyzmatdaşlygy ösdürmäge we eksport aragatnaşyklaryny giňeltmäge gönükdirilen onlarça gepleşikleri geçirdi. Geçirilen duşuşyklaryň netijesinde önümleri eksport etmek boýunça ylalaşyklara gelindi we türkmen tekstilini daşary ýurtlara ibermek bilen baglanyşykly birnäçe özara bähbitli ylalaşyklar gazanyldy.

«Heimtextil 2026» sergisine gatnaşmak, türkmen önümçiligini halkara bazarlarynda tanatmak, işewür gatnaşyklary güýçlendirmek, tejribe alyşmak we innowasiýalary ornaşdyrmak üçin täze mümkinçilik boldy. Dünýä senagat forumlarynda şeýle işjeň çykyş etmek, Türkmenistanyň global ykdysadyýetine goşulmak, maýa goýumlary çekmek we ýeňil senagat pudagynyň eksport mümkinçiliklerini giňeltmek ugrunda edýän tagallalarynyň subutnamasydyr.