Paýtagtymyzda ikitaraplaýyn ykdysady hyzmatdaşlyk mümkinçilikleri barada maslahatlaşmak üçin möhüm bolan Türkmen-hytaý işewürler forumy geçirildi. Söhbetdeşlikleriň esasy ugurlarynyň biri Türkmenistanyň okgunly ösüşini we hytaý kärdeşlerimiz bilen innowasion çözgütleri girizmäge taýýardygyny görkezýän elektroenergiýa pudagy boldy.
Türkmenistanyň energetika ministriniň orunbasary S. Saparow forumda eden çykyşynda pudagyň maddy-tehniki esasynyň ulgamlaýyn berkidilmegi Gahryman Arkadagymyzyň öňdengörüji ykdysady baş ýörelgeleri netijesinde mümkin bolandygyny, häzir bolsa hormatly Prezidentimiziň baştutanlygynda durmuşa geçirilýändigini belledi.
Häzirki wagtda ýurdumyzyň energiýa toplumy 11 sany elektrik stansiýasyndan ybarat bolup, jemi kuwwatlylygy 7000 MBt deňdir.
«Şeýle kuwwatly elektrik energiýasynyň diňe bir ýurtdaky ulanyjylara däl-de, eýsem goňşy döwletlere eksport göwrümini hem ýylda artdyrmaga mümkinçilik berýär» diýip, S. Saparow aýtdy.
Çykyşda ekologiýa meselelerine we Türkmenistanda halkara konwensiýa çygrynda alnyp barylmaly işlere aýratyn garaldy. Ýurdumyz dekarbonizasiýa we gaýtadan dikeldilýän energiýanyň ösüşi babatda ynamly ugur aldy. Watanymyz üçin ilkinji utgaşdyrylan Gün we ýel elektrik stansiýasynyň ulanylmaga berilmegi ýatdan çykmajak wakalaryň biri bolar.
«Balkan welaýatynyň Gyzylarbat etrabynda kuwwatlylygy 10 MBt bolan köpugurly Gün we ýel elektrik stansiýasy ulanyşa taýýarlanyldy. Bu desganyň döredilmegi biziň pudagymyza «ýaşyl» energetikanyň uly göwrümli möçberde girizilmeginiň başlangyç nyşany bolar» diýip, S.Saparow çykyşynda aýdyp geçdi.
Ministriň orunbasary bu ugurda Hytaý Halk Respublikasynyň Türkmenistanyň ýokary tehnologiki taslamalary durmuşa geçirmekde öňdebaryjy hyzmatdaşlaryndan biri bolmagynda galýandygyny hem aýtdy.
«Biz Hytaý Halk Respublikasy bilen hyzmatdaşlyga uly sarpa goýýarys. Häzirki wagtda kuwwatlylygy 300 MBt bolan Gün elektrik stansiýasynyň gurluşygy boýunça «Power China» kompaniýasynyň teklibiniň üstünde iş geçirilýär. Taslamany durmuşa geçirmegiň çäginde kompaniýa ýeňillikli uzakmöhletleýin karz serişdelerini bermegi teklip edýär» diýip S.Saparow aýtdy.
Şeýle başlangyçlaryň bolmagy diňe bir sebiti energetiki howpsuzlyk bilen üpjün etmän, eýsem innowasion we «ýaşyl» ösüş ugry boýunça türkmen-hytaý gatnaşyklaryna has-da badalga berer.
