Çagalaryň tomusky dynç alyş möwsümini talabalaýyk guramak, welaýatyň çäginde ýerleşýän çagalar sagaldyş we dynç alyş merkezleriniň güýjünden netijeli peýdalanmak boýunça Lebap welaýatynda maksatnamalaýyn işleriň alnyp barylmagy häzirki wagtda gyzgalaňly dowam edýän jogapkärli döwürde özüniň oňyn netijelerini berýär.
Bu bolsa Lebap welaýat häkimliginiň, welaýat jemagat hojalygy birleşiginiň, welaýat Baş bilim, Saglygy goraýyş, Medeniýet müdirlikleriniň, Arassaçylyk we keselleriň ýaýramagyna garşy göreşmek gullugynyň, Alyjylar jemgyýetleri birleşiginiň hem-de beýleki edara-kärhanalaryň ysnyşykly işlemekleriniň netijesinde welaýatyň çäginde ýerleşýän «Bagtyýarlyk» çagalar sagaldyş we dynç alyş merkeziniň hem-de Awazadaky «Lebap» sagaldyş we dynç alyş merkeziniň çagalaryň tomusky dynç alyş möwsümine doly taýýar edilmeginiň netijeleridir.
Welaýat boýunça hereket edýän çagalar sagaldyş we dynç alyş merkezlerine, ýagny, Türkmenabat şäher häkimligine degişli bolan, her tapgyrda 300 çaga niýetlenen «Bagtyýarlyk» çagalar sagaldyş we dynç alyş merkezine möwsümiň dowamynda üç tapgyrda jemi 900, Awazadaky 100 çaga niýetlenen «Lebap» çagalar dynç alyş merkezine bäş tapgyrda jemi 500 çaga çekmeklik göz öňünde tutulyp, häzirki wagtda bu ýerlerde ýaş nesiller öz wagtlaryny şadyýan geçirýärler.
Türkmenabat şäheriniň golaýynda, Amyderýanyň kenarynda ýerleşýän «Bagtyýarlyk» çagalar sagaldyş we dynç alyş merkezinde işleriň aýratyn guramaçylykly ýola goýlandygyny bellemek bolar. Bu sapaly mekanda çagalaryň kadaly dynç almaklary, dürli ugurlar boýunça zehinlerini ýüze çykarmaklary, zähmet endiklerini kemala getirmekleri üçin ähli şertler döredilipdir. Bu ýerde onuň üçin kinoteatr, amfiteatr, kompýuter otaglary, kitaphana, açyk we ýapyk suw howuzlary ýerleşýär. Möwsümiň öňüsyrasynda sagaldyş-dynç alyş merkeziniň çäginde düýpli arassaçylyk we abadanlaşdyryş işleriniň geçirilmegi çagalaryň täsirli we talabalaýyk dynç almaklaryny üpjün edýär. Merkezde çagalaryň iýmitiniň tagamnamasy lukmanlar bilen bilelikde düzülýär we tagamlar tejribeli aşpezler tarapynda taýýarlanylýar.
Çagalar sagaldyş we dynç alyş merkezinde ýaş nesilleri hünärlere ugrukdyrmak we durmuşa taýýarlamak maksady bilen hünär hem-de aýdym-saz gurnaklary döredilipdir. Çagalaryň daşary ýurt dilleri, kompýuter sowatlylygy boýunça bilimlerini artdyrmak, ýazyjy-şahyrlar, ussat medeniýet we sungat işgärleri bilen duşuşyklary, döwrebap kärhanalara, tebigatymyzyň gözel ýerlerine, muzeýlere, taryhy-medeni ýadygärliklere gezelençlerini guramak yzygiderli alnyp barylýar. Merkezde dynç alýan çagalar bilen şäheriň eteginde ýerleşýän gadymy Amul galasyna, Amyderýanyň üstünden gurlan döwrebap köprülere, welaýat Taryhy we ülkäni öwreniş muzeýine, şäheriň gözel ýerlerine, şol sanda Bitaraplyk seýilgähine guralýan gezelençler olarda ýatdan çykmajak täsirler galdyrýar. Şeýle hem bu ýerde dynç alýan ýaş nesiller Seýitnazar Seýdi adyndaky döwlet sazly drama teatrynda bolup, bu ýerde sahnalaşdyrylýan türkmen halk ertekilerine höwes bilen tomaşa edýärler. «Bagtyýarlyk» çagalar sagaldyş we dynç alyş merkezinde tomusky dynç alyş möwsümini sapaly geçirýän çagalaryň arasynda sagdyn durmuş ýörelgesini durmuşa geçirmek maksady bilen sportuň dürli görnüşleri, şol sanda milli oýunlar boýunça ýaryşlar, bäsleşikler yzygiderli geçirilýär. Ýaňy-ýakynda Lebap welaýat polisiýa müdirliginiň Ýangyn howpsuzlygy bölüminiň guramagynda bu ýerde dynç alýan mekdep okuwçylarynyň arasynda ýangyn amaly sporty boýunça geçirilen bäsleşik hem aýratyn täsirliligi, çagalaryň ugurtapyjylygy we oňa gatnaşyjylaryň maksada okgunlylygy bilen tapawutlandy.
Ýaş nesilleriň welaýatda hereket edýän çagalar sagaldyş we dynç alyş merkezlerinde tomusky dynç alyş möwsümini netijeli geçirmekleri olaryň ruhy we fiziki taýdan kämilleşmeklerine, dünýägaraýyşlarynyň, ata Watanymyza bolan söýgüsiniň has-da artmagyna, täze okuw ýylyna ruhubelent gadam basmaklaryna ýardam eder.
