Russiýa Federasiýasynyň Sankt-Peterburg şäheriniň wise-gubernatory Wladimir Omelniskiý Türkmenistanda iş saparynda boldy. Saparyň maksatnamasynyň çäklerinde Aşgabatdaky «Halk hakydasy» ýadygärlikler toplumyna gül goýmak, Leningradyň gabawyndan aman galan şäher ýaşaýjysy bilen duşuşmak, şeýle hem ikitaraplaýyn hyzmatdaşlygy ösdürmäge bagyşlanan birnäçe işewür gepleşikleri geçirmek göz öňünde tutuldy.
Saparyň dowamynda Sankt-Peterburg şäheriniň wekiliýetiniň agzalary Beýik Watançylyk urşy ýyllarynda wepat bolanlaryň hatyrasyny hormatladylar. Wladimir Omelniskiý türkmen halkyna uruş ýyllarynda leningradlylara görkezen goldawy üçin çuňňur hoşallygyny bildirdi.
Uruş ýyllarynda Türkmenistan Leningradyň we onuň töwerekleriniň 32 müňe golaý ýaşaýjysyny kabul etdi. Uruş döwrüniň azyk kynçylyklaryna garamazdan, ýerli ilat gelen adamlaryň ähli zerurlyklaryny paýlaşdy.
– Men tutuş türkmen halkyna Leningraddan gelen ýaşaýjylaryň nähili mähir we alada bilen kabul edilendigi üçin hoşallyk sözlerini ýetirmek isleýärin. Bu ýerde özlerine ikinji öý tapan adamlardyr. Biz muny ýadymyzdan çykarmaýarys we bu goldawa ýokary baha berýäris – diýip, wise-gubernator nygtady.
Saparyň möhüm bölekleriniň biri Aşgabatda ýaşaýan gabaw döwrüniň ýaşaýjysy Galina Mämedowa bilen duşuşyk boldy. Ol Russiýanyň hem-de Türkmenistanyň Hökümeti tarapyndan weteranlara yzygiderli üns berilýändigini we hemmetaraplaýyn alada edilýändigini belledi.
– Meniň ykbalym şeýle, ýüregim Leningradda, kalbym bolsa Aşgabatda galdy. Ýaşymyň hasabyna görä, saglygym kadaly, maňa öz dogduk ýurdum Russiýanyň hem-de öz Watanym Türkmenistanyň goldawy örän möhümdir. Şeýle-de hormatly Prezidentimiz Serdar Berdimuhamedowyň biz, weteranlar barada edýän aladasy örän möhümdir. Bize köp ýeňillikler berilýär, bizi hiç wagt unutmaýarlar, hal-ýagdaýymyz bilen gyzyklanýarlar we sowgatlar gowşurýarlar. Biz ýalňyz däl. Mähir we alada ruhumyzy göterýär, saglygymyzy berkidýär. Ýene-de ýaşasym gelýär – diýip, Galina Alekseýewna aýtdy.
Sankt-Peterburgyň gubernatory Aleksandr Beglowyň tabşyrygy boýunça Türkmenistanyň degişli edaralarynda gepleşikler geçirildi. Olarda hyzmatdaşlygyň esasy ugurlary ara alnyp maslahatlaşyldy.
Hususan-da, Aşgabatda täze gurlan Halkara lukmançylyk merkezleri üçin derman serişdelerini we enjamlary getirmek meselelerine garaldy. Şeýle hem Sankt-Peterburgyň we Türkmenistanyň lukmanlarynyň arasynda tejribe alyşmak maksady bilen emeli aň tehnologiýalaryndan peýdalanyp, onlaýn maslahatlary geçirmek teklip edildi.
– Aşgabatda gurlan ajaýyp lukmançylyk edaralaryny lukmançylyk hyzmatlary we farmasewtiki enjamlar bilen üpjün etmek babatda hyzmatdaşlyk meselesine garaldy. Olar iň döwrebap enjamlar bilen üpjün edilendir. Şeýle hem emeli aňdan peýdalanmak arkaly onlaýn maslahatlary geçirmek we tejribe alyşmak mümkinçiligini teklip etdik. Sebäbi Türkmenistanyň we Sankt-Peterburgyň lukmançylyk edaralarynda ýokary derejeli hünärmenler işleýär. Saglygy gorap saklamak boýunça biziň uly tejribämiz bar. Biziň biri-birimiz bilen paýlaşjak zatlarymyz köp we şeýle dialoga taýýardyrys – diýip, Wladimir Omelniskiý aýtdy.
Şeýle hem Sankt-Peterburgyň teatrlarynyň Türkmenistanda gastrollaryny guramak, Aşgabatda muzeýleriň arasynda özara sergileri geçirmek meseleleri ara alnyp maslahatlaşyldy. Ykdysadyýet ulgamynda bolsa söwda-ykdysady gatnaşyklary giňeltmek boýunça ädimler kesgitlenildi.
Wladimir Omelniskiý Türkmenistanyň Prezidenti Serdar Berdimuhamedowa hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa mähirli myhmansöýerlikleri hem-de ikitaraplaýyn dialogy ösdürmäge konstruktiw çemeleşmeleri üçin hoşallygyny bildirdi.
