Düýn ýurdumyzyň Daşary işler ministrliginiň Halkara gatnaşyklar institutynda hormatly Prezidentimiz Serdar Berdimuhamedowyň Koreýa Respublikasyna bolan döwlet saparynyň çäklerinde dostlukly ýurduň Songýungwan uniwersitetiniň “Syýasy ylymlaryň Hormatly Doktory” derejesiniň berilmegi mynasybetli dabaraly maslahat geçirildi.
Ýurdumyzyň Daşary işler we Bilim ministrlikleriniň hem-de Türkmenistanyň Ylymlar akademiýasynyň bilelikde guramagynda Daşary işler ministrliginiň Halkara gatnaşyklary institutynda geçirilen dabaraly maslahata gatnaşyjylar ilki bilen institutyň diwanynda ýaýbaňlandyrylan giň möçberli sergini synladylar. Onda her bir güni şanly wakalara beslenýän “Garaşsyz, baky Bitarap Türkmenistan –bedew batly at-myradyň mekany” ýylynyň taryhy ähmiýeti bolan wakalara beslenýändigi, ýurdumyzyň daşary syýasat ulgamynda gazanýan üstünlikleri öz beýanyny tapdy.
Soňra dabaraly maslahat öz işine başlady. Onda çykyş edenler ilki bilen hormatly Prezidentimize döwlet saparynyň hem-de “Merkezi Aziýa – Koreýa Respublikasy” ilkinji sammitiniň üstünlikli geçmegi bilen tüýs ýürekden çykýan gutlag sözlerini beýan etdiler. Arkadagly Gahryman Serdarymyza Songýungwan uniwersitetiniň “Syýasy ylymlaryň Hormatly Doktory” derejesiniň berilmeginiň hem-de döwlet Baştutanymyzyň Koreýanyň Halkara söwda assosiasiýasynyň Hormat nyşany bilen sylaglanylmagynyň “Garasşyz, baky Bitarap Türkmenistan –bedew batly at-myradyň mekany” ýylynyň taryhy ähmiýeti bolan wakasyna öwrülendigini nygtadylar.
Bellenilişi ýaly, bu çözgütler hormatly Prezidentimiziň ýolbaşçylygynda döwletimiziň daşary syýasat strategiýasynyň halkara giňişliginde ykrar edilýändiginiň we Arkadagly Gahryman Serdarymyzyň dünýä derejesindäki abraýynyň belende galýandygynyň nobatdaky subutnamasydyr. Bu wakalar mähriban halkymyzyň buýsanjyny belende göterdi.
Dabaraly maslahatda çykyş edenler hormatly Prezidentimiziň Koreýa Respublikasyna döwlet saparynyň üstünlikli tamamlanmagynyň iki ýurduň arasyndaky ynanyşmagyň we özara hormat goýmagyň ýokary derejesini aýdyň görkezendigini bellediler. Şeýle hem Arkadagly Gahryman Serdarymyzyň dostlukly ýurda bolan döwlet saparynyň çäklerinde gol çekilen ikitaraplaýyn resminamalaryň uly toplumy hem-de Seulda geçirilen ýokary derejedäki gepleşikler ykdysadyýetimiziň dürli pudaklarynda giň möçberli taslamalaryň durmuşa geçirilmegine giň ýol açdy.
Dabaraly maslahatyň dowamynda ýurdumyzyň ýokary okuw mekdeplerinde berilýän bilimiň hiliniň we derejesiniň ýokarlanandygy barada giňişleýin maglumatlar berildi. Şunda talyp ýaşlaryň daşary ýurt dillerini düýpli özleşdirmeklerine, şol sanda bilim ojaklarynda koreý diliniň öwredilmegine zerur üns berilýär. Munuň özi ýurdumyzda ýaşlaryň dünýä ylmyna çuňňur aralaşmaklary ugrunda kesgitlenen wezipeleriň ýokary derejede amala aşyrylýandygynyň aýdyň subutnamasydyr.
Işjeň we netijeli ýagdaýda geçen maslahatyň dowamynda çykyş edenler soňky ýyllarda türkmen-koreý gatnaşyklarynyň ösüşiň täze derejesine çykandygyny nygtadylar. Şunda ýurdumyzyň ýokary okuw mekdeplerinde bu ugurlar boýunça kämil hünärmenleri taýýarlamak babatda zerur tagallalaryň edilýändigini bellemek gerek. Bu bolsa ösüşleriň belentliklerine tarap bedew bady bilen ynamly gadam urýan ýurdumyzyň sazlaşykly ösüşinde öz beýanyny tapýar.
Dabaraly maslahatyň ahyrynda oňa gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul etdiler.
