Türkmenistanyň Döwlet daşary ykdysady iş bankynyň mejlisler zalynda Türkmenistanyň milli puly – manadyň dolanyşyga girizilmeginiň 33 ýyllygy mynasybetli Türkmenistanyň Merkezi bankynyň ýolbaşçylygynda hem-de Türkmenistanyň karz edaralarynyň we Türkmenistanyň Kärdeşler arkalaşygynyň Milli merkeziniň bilelikdäki guramagynda ýurdumyzyň bank ulgamynyň işgärleriniň arasynda «Garaşsyz, hemişelik Bitarap Türkmenistanyň bank ulgamynyň özgertmeleri – durnukly ösüşiň binýady» atly hünär bäsleşigi geçirildi.
Bäsleşigiň esasy maksady hormatly Prezidentimiziň alyp barýan içeri we daşary syýasaty netijesinde milli ykdysadyýetimiziň pudaklarynda durmuşa geçirilýän giň gerimli özgertmeleri, bank işinde ulanylýan kadalaşdyryjy hukuknamalar we beýleki ykdysady ugurlar boýunça Türkmenistanyň bank ulgamynda zähmet çekýän işgärleriň hünär taýdan taýýarlyklaryny, ukyp-başarnyklaryny ýokarlandyrmak, zehinlileri öňe çykarmak we höweslendirmekdir.
Iki tapgyrda geçirilen bäsleşigiň birinji tapgyrynda Arkadag şäherinden we ýurdumyzyň welaýatlaryndan bank işgärleri gatnaşdylar. Ikinji tapgyrda bolsa Aşgabat şäherinde ýerleşýän banklaryň merkezi edaralarynyň işgärleri bäsleşdiler. Bu hünär bäsleşigine banklaryň tejribeli hünärmenleri we ykdysadyýet, maliýe we bank pudagy boýunça çuňňur bilimleri bolan professor-mugallymlar emin agza hökmünde adalatly hem-de dogry baha berdiler. Bäsleşik örän gyzykly we çekeleşikli geçdi. Onuň netijesi boýunça:
Arkadag şäheri we ýurdumyzyň welaýatlarynyň arasynda:
Birinji orna – Türkmenistanyň Merkezi bankynyň Mary welaýat şahamçasy;
Ikinji orna – Türkmenistanyň «Halkbank» paýdarlar täjirçilik bankynyň Daşoguz welaýat şahamçasy;
Üçünji orna bolsa – Türkmenistanyň «Halkbank» paýdarlar täjirçilik bankynyň Ahal welaýat şahamçasy eýelediler.
Aşgabat şäheriniň merkezi banklarynyň işgärleriniň arasynda:
Birinji orna – Türkmenistanyň Merkezi banky;
Ikinji orna – «Rysgal» paýdarlar täjirçilik banky;
Üçünji orny hem Türkmenistanyň «Daýhanbank» döwlet täjirçilik banky mynasyp boldular.
Ýeňijilere gymmat bahaly sowgatlar gowşuryldy.
