Aşgabatda BMGÖM “Türkmenistanyň ýaşaýyş jaý gurluşyk bölüminde energiýanyň netijeliligini gowulandyrmak” taslamasy tarapyndan guralan ýurduň gurluşyk kadalaryny aktuallaşdyrmagyň meseleleri boýunça “Gurluşyk klimatologiýasy” öwreniş-maslahaty geçirildi. Maslahata bu kadalaşdyryjy resminamany işläp taýýarlamaga çekilen Türkmenistanyň Ministrler Kabinetiniň ýanyndaky gidrometeorologiýa baradaky milli komitetiň we “Türkmendöwlettaslama” Döwlet taslama ylmy-önümçilik birleşiginiň hünärmenleri gatnaşdylar.

BMGÖM ýokarda agzalyp geçilen taslamasynyň çäklerinde amala aşyrylýan bu işler bu ugurda kabul edilýän çäreleri çaltlandyrmaga we gurluşyk kadalaryny işläp taýýarlamaga, kämilleşdirmäge we ýaşaýyş jaýlarynyň taslama işlerine öňdebaryjy usullary netijeli ornaşdyrmaga gönükdirilendir.

BMGÖM taslama menejeri Irina Atamyradowanyň gürrüň berşi ýaly, 2014-nji ýyldan başlap, Türkmenistanyň Gurluşyk we binagärlik ministrligi bu taslamanyň goldaw bermeginde Türkmenistanyň – “Gurluşyk teplotehnikasy” we “Gurluşyk klimatologiýasy” gurluşyk kadalaryny işläp taýýarlamagy amala aşyrýar. Olaryň esasy işläp taýýarlaýjysy bolup “Türkmendöwlettaslama” çykyş edýär.

Maslahatyň işine Belarus Respublikasynyň ýaşaýyş jaý gurluşyk Ylmy-gözleg institutynyň hünärmeni Irina Terehowa halkara bilermeni hökmünde gatnaşdy. Ol türkmen hünärmenlerini meteorologiki maglumatlary işläp taýýarlamagyň halkara usullary bilen tanyşdyrdy. Bu bolsa türkmen kadalaşdyryjy talaplarynyň ýewropanyň has abraýly, şeýle hem, klimatologiýanyň aýry-aýry ugurlary boýunça GDA ýurtlarynyň gurluşyk kadalarynyň talaplaryna laýyk gelmegini üpjün eder.