Şu gün ýurdumyzda ählihalk dabarasy bolan we türkmen gallaçylarynyň zähmetsöýerligini, mähriban topragymyzyň sahawatyny alamatlandyrýan Galla baýramy giňden bellenildi. Mirasa sarpa goýmak, Watany özgertmek we Türkmenistanyň mukaddes Garaşsyzlygynyň 25 ýyllyk şanly baýramynyň dabaralandyrylýan ýylynda ýurdumyzyň gallaçylary Watan harmanyna 1 million 600 müň tonnadan gowrak bugdaý tabşyryp, ajaýyp zähmet ýeňşini gazandylar.
Paýtagtymyzda we ýurdumyzyň sebitlerinde Galla baýramy mynasybetli hasyl ussatlaryny hormatlamak dabaralary, medeni- köpçülikleýin we sport çäreleri, ylmy maslahatlar, sergiler guralýar. Bereketli saçaklar giňden ýazylýar. Şu gün ähli ýerde türkmen toýuna mahsus dabaralar guraldy. Aşgabadyň atçylyk sport toplumynda geçirilen baýramçylyk çärelerine hormatly Prezidentimiz Gurbanguly Berdimuhamedow gatnaşdy.
Irden toplumyň merkezi girelgesiniň öňünde ýurdumyzyň Mejlisiniň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralarynyň, ministrlikleriň we pudak düzümleriniň ýolbaşçylary, welaýatlaryň we Aşgabat şäheriniň häkimleri, daşary ýurtlaryň Türkmenistanda işleýän diplomatik wekilhanalarynyň ýolbaşçylary ýygnandylar. Olaryň arasynda baýramçylyk çärelerine gatnaşmak üçin paýtagtymyza gelen daşary ýurtly myhmanlar, işewürler, daşary ýurtlaryň we ýurdumyzyň köpçülikleýin habar beriş serişdeleriniň wekilleri bar.
Olar milli Liderimizi uly ruhubelentlik bilen garşyladylar. Milli lybasdaky gyzlar döwlet Baştutanymyza ajaýyp gül desselerini gowşurdylar.
Şanly waka mynasybetli aýdym-sazly dabaralar, döredijilik toparlarynyň çykyşlary ýaýbaňlandyryldy. Olar belent ruha beslenen aýdym-sazlary bilen hormatly Prezidentimiz Gurbanguly Berdimuhamedowyň milli ykdysadyýetimiziň ähli pudaklarynyň, şol sanda obasenagat toplumynyň ösüşine kuwwatly itergi beren özgertmelerini, mähriban Watanymyzy we sahawatly türkmen topragyny wasp etdiler.
Dabara gatnaşyjylar bilen salamlaşyp, hormatly Prezidentimiz Aşgabadyň atçylyk sport toplumynyň merkezi girelgesine tarap ýöredi. Bu ýerde ýolugrunda ýurdumyzyň obasenagat toplumynyň, şol sanda däneçilik pudagynyň ýeten derejesini aýdyň beýan edýän oba hojalyk önümleriniň sergisi guraldy. Ýurdumyzyň welaýatlarynyň gallaçylary hem baýramçylyk sergisini taýýarladylar. Onda ak bugdaýyň täze hasylynyň günüň şöhlesine öwşün atýan desseleri, dok däneli sümmüller görkezilýär. Şeýle hem bu ýerde çörek hem-de çörek önümleriniň, unaş we süýji önümleriniň dürli görnüşleri goýlupdyr. Täze bişirilen çörekler sergide möhüm orun eýeleýär. Sergide halkymyzyň saçaklarynyň, toý-baýramçylyklarynyň bezegi bolan pişme, dürli tagamlar we milli naharlaryň görnüşleri görkezilýär.
Şeýle hem bu ýerde oba hojalyk ekinleriniň görnüşleriniň aýratynlyklary, ýurdumyzyň däneçilik pudagynyň mümkinçilikleri barada gürrüň berýän şekiller, türkmen seçgiçileriniň yhlasly zähmetiň netijesi bolan we ýerli toprak-howa şertlerinde özüni gowy tarapdan görkezen bugdaý görnüşleri bilen tanyşmaga-da mümkinçilik bar. Bu ýerde bugdaýyň “Garaşsyzlyk”, “Bitarap”, “Berkarar”, “Miras”, “Akbaş” we beýleki görnüşlerine aýratyn orun berlipdir.
Şeýle hem sergide bugdaýdan başga-da, ýurdumyzyň zähmetsöýer babadaýhanlarynyň ösdürip ýetişdirýän önümleriniň dürli görnüşleri görkezildi. Olaryň hatarynda “Paýtagt”, “Laçyn” görnüşli mekgejöwen, “Bereketli” we “Ýerli” görnüşli mäş, “Garagum” görnüşli jöwen, “Santa” ýeralmasy görkezildi. Ýeri gelende aýtsak, ýeralmanyň bu görnüşi Gollandiýadan getirildi. Ol iki ýylyň dowamynda türkmen topragyna we howa şertlerimize uýgunlaşdyryldy. Onuň hasyllylygy her gektardan 150-200 sentnere barabardyr.
Sergide bakja önümlerine hem aýratyn orun berlipdir. Bu ýerde “Waharman”, “Garrygyz”, “Gyzyl gülaby” gawunlarynyň, “Jeýhun”, “Serdar”, “Dişim” garpyzlarynyň, “Palaw kädi”, “Daş kädi”, “Düwdi bişer” kädileriniň tohumlary görkezilýär.
Biziň ýurdumyzda ösdürilip ýetişdirilýän we toprak-howa şertlerimize uýgunlaşdyrylan “Sary mirzol-304” käşiriň, “Sonýa” we “Flora” gant şugundyrynyň, “Müsür” tekiz şugundyry” hem-de “Borda-237” ýaly şugundyryň, “Aşgabat” we “Gäwers-3” hyýarynyň, “Gök ýaýla” pomidorynyň, “Gypjak” badamjanynyň, “Aşgabat” keleminiň, “Aşgabat-1” turpunyň, “Gyzyl togalak” hem-de “Gyzyl äpet” rediskalaryň, “Farap” we “Kaka” soganlarynyň “Zarýa-F-1” süýji burçuň, “Samson” käşiriň, “Ýasy ýaprak” turşujanyň tohumlary bar.
Sahawatly türkmen topragynyň önümleriniň hatarynda ak we gara üzümiň äpet hoşalary has-da tapawutlanýar. Hormatly Prezidentimiz Gurbanguly Berdimuhamedow olary aýratyn üns bilen synlady. Göze gelüwli üzüm hoşalarynyň ýanynda armydyň, almanyň, erigiň we beýleki miwe önümleriniň şerbet suwlary goýlupdyr.
Türkmenistanda ösdürilip ýetişdirilýän ekerançylykda pagtaçylyk aýratyn orun eýeleýär. Sergide gowaçanyň iň gowy tohumlarynyň görnüşleri görkezilýär. Olaryň hatarynda orta süýümli hasylly görnüş hasaplanýan “Ýolöten-7” görnüşi bar. Pagtanyň bu tohumynyň hasyllylygy gektardan 55,9 sentnere barabardyr. “Ýolöten-19” pagta çigidi hem sergide aýratyn orun eýeleýär.
Gowaçanyň bu görnüşi tiz ýetişýändigi, süýüminiň inçeligi we berkligi hem-de ýokary hilliligi bilen tapawutlanýar. Gowaçanyň täze görnüşleriniň hatarynda pagta ýygyjy tehnikalar bilen ýygnamaga amatly “Ýolöten-45” görnüşi sergide aýratyn orun eýeleýär.
Serginiň ýanynda bugdaý sümmülleri we “1 million 600 müň tonna” diýen ýazgyly ägirt uly çörek goýlupdyr.
Şeýle hem bu ýerde ýyladyşhana gurlup, onda pomidor ösüp otyr. Mälim bolşy ýaly, ilaty tutuş ýylyň dowamynda ter gök önümler bilen üpjün etmek maksady bilen ýyladyşhana hojalyklarynyň ulgamynyň giňeldilmegi ýurdumyzyň obasenagat toplumyny ösdürmegiň möhüm we geljegi uly ugurlarynyň biri bolup durýar.
Ýyladyşhananyň aňyrsyndaky hatara gurlan ak öýleriň öňünde halk bagşylarynyň aýdym-sazly çykyşlary ýaýbaňlandyryldy. Ol ýerde haly we keçe, zergärçilik önümleriniň sergisi guraldy.
Hormatly Prezidentimiz Gurbanguly Berdimuhamedow ak öýleriň ýanynda milli oýunlara gümra bolan körpeleriň ýanynda saklandy. Çagalar milli Liderimizi uly şatlyk bilen garşyladylar.
Hormatly Prezidentimiziň barýan ýolunyň ugrunda bugdaý dänelerinden taýýarlanan Türkmenistanyň kartasy goýlupdyr. Onuň garşysynda bolsa Nowruzda baýramçylyk tagamy bolan semeni taýýarlanýan görnüşdäki ösüp oturan maýsa bar. Şeýle hem bu ýerde bugdaý meýdany şekillendirilip, onuň ýanynda ak bugdaýyň harmany döredilipdir.
Döwlet Baştutanymyz bu görnüşleri hem-de bugdaý gaýtadan işlenilýän we saklanylýan elewatorlaryň kiçeldilen nusgalaryny synlady. Şeýle hem bu ýerde täze bişirilen çörek, bulka, gaplanan unaş we beýleki önümler görkezilýär.
Mahlasy, bugdaý dänesiniň taýýar önüme çenli bolan ähli önümçilik ulgamy görkezilýär. Bu ýerde önümçilik desgalarynyň, şol sanda ýurdumyzyň telekeçileriniň çörek önümleriniň we beýleki azyk önümleriniň dürli görnüşleri goýlupdyr. Häzirki döwürde türkmen telekeçileri obasenagat toplumynda we azyk hem-de gaýtadan işleýän pudakda işjeňlik görkezýärler. Olar önümçilikde iň häzirki zaman tehnologiýalaryny ulanyp, uly üstünlikleri gazanýarlar.
Bu ýerde gadymy döwürlerde pederlerimiziň ulanan ýel degirmeniniň şekili goýlupdyr. Häzirki döwürde bu desgalaryň ornuny awtomatlaşdyrylan döwrebap önümçilik toplumlary eýeledi. Gadymy ekerançylyk medeniýetini esaslandyran türkmen halky müňýyllyklaryň dowamynda ak bugdaý ösdürip ýetişdiripdir we bu ugurdaky oňyn tejribelerini nesilden-nesle geçirip gelipdir.
Çörek bolçulygy her bir maşgalanyň we tutuş halkyň rysgal-berekediniň, abadançylygynyň baş nyşanydyr. Sergide görkezilýän dürli gymmatlyklar milletiň ekerançylyk medeniýetini ösdürmek babatda köpasyrlyk däpleri hakynda gürrüň berýär. Sergide pederlerimiziň ekin meýdanlaryny özleşdiren zähmet gurallary möhüm orny eýeleýär. Olaryň güýji bilen bugdaý ösdürip ýetişdirilipdir, Halkymyz el, suw we ýel degirmenleriniň kömegi bilen bugdaýy üwäpdir, tamdyrda ak bugdaý unundan tagamly çörek bişiripdir.
Häzirki taryhy eýýamda asylly däpler täze mazmun bilen ösdürilýär. Milli ýörelgeler häzirki döwrüň pudaklaýyn ylmynyň ýeten derejesi we täzeçil tehnologiýalar bilen utgaşdyrylyp, ýurdumyzyň obasenagat toplumynyň ösüş maksatnamasynyň esasyny düzýär. Hormatly Prezidentimiz Gurbanguly Berdimuhamedowyň başlangyjy bilen we paýhasly ýolbaşçylygynda obasenagat toplumynda amala aşyrylýan giň möçberli özgertmeleriň netijesinde, däneçilik pudagy azyk howpsuzlygynyň esasy hökmünde oba hojalyk önümçiliginde möhüm orny eýeleýär.
Şunuň bilen baglylykda, döwletimiziň obasenagat toplumynyň ösüşi bilen baglanyşykly meselelere aýratyn ähmiýet berýändigini bellemeli. Babadaýhanlaryň netijeli zähmet çekmegi üçin zerur şertler döredilýär, häzirki zaman oba hojalyk tehnikalary yzygiderli satyn alynýar. Pudaklaýyn düzümi döwrebaplaşdyrmak boýunça maksatnamalaýyn çäreler durmuşa geçirilýär. Oba zähmetkeşlerine düýpli ýeňillikler berilýär. Tabşyrylan önüm üçin haryt öndürijiler bilen hasaplaşyklar öz wagtynda geçirilýär. Şeýle hem oba ilatynyň ýaşaýyş-durmuş derejesini yzygiderli ýokarlandyrmak boýunça maksatnamalaýyn çäreler amala aşyrylýar. Türkmen gallaçylary hemmetaraplaýyn edilýän alada jogap hökmünde her ýylda bugdaýdan bol hasyl alýarlar hem-de ýokary hilli däne bilen Watan harmanyny beýgeldýärler. Bir söz bilen aýdylanda, olar ýurdumyzda azyk bolçulygynyň üpjün edilmegine, halkymyzyň abadançylygynyň ýokarlandyrylmagyna mynasyp goşant goşýarlar.
Milli ykdysadyýetimiziň möhüm pudagy bolan obasenagat ulgamynyň toplumlaýyn döwrebaplaşdyrylmagy özüniň anyk netijelerini berýär. Şunda ýurdumyzda öndürilýän ýokary hilli önümleri, şol sanda içerki sarp edijilerden artýan bugdaýy daşarky bazarlara eksport etmek mümkinçiligi döreýär. Bu bolsa ýurdumyzyň ekerançylaryny täze zähmet ýeňişlerine ruhlandyrýar. Şu ýylky galla oragy möwsüminiň ýokary netijeleri munuň aýdyň subutnamasydyr.
Döwlet Baştutanymyz Gurbanguly Berdimuhamedow gawundan, garpyzdan, kädiden doldurylan arabalary, gyş paslynda gül ösdürilip ýetişdirilýän ýyladyşhanalary, suwaryşyň damjalaýyn usuly arkaly süýji burçuň, badamjanyň, jöweniň, şalynyň we beýleki önümleriň ösdürilip ýetişdirilýän kiçeldilen meýdanlaryny synlady. Baýramçylyk görnüşinde bezelen arabalaryň käbirinde Türkmenistanda öndürilýän we toprak- howa şertlerine uýgunlaşdyrylan gant şugundyryndan öndürilen gandyň dürli görnüşleri goýlupdyr.
Şu gezekki dabaralaryň daşary ýurtly myhmanlarda uly täsir galdyrandygyny bellemek gerek. Olaryň hatarynda Garaşsyz Döwletleriň Arkalaşygynyň tohumçylyk meseleleri boýunça Hökümetara utgaşdyryjy geňeşiň başlygy, GDA-nyň “Semena” assosiasiýasynyň prezidenti Iwan Kuzmin hem bar. Myhman hormatly Prezidentimiziň durmuşa geçirýän syýasatynyň uly üstünliklere beslenýändigine haýran galýandygyny aýtdy.
Soňra hormatly Prezidentimiz atçylyk sport toplumynyň baş binasynyň ýanynda gurnalan münbere geçýär.
Milli Liderimiz dabara gatnaşyjylary, oba hojalyk işgärlerini ýurdumyzda uly dabara bilen bellenilýän, sahawatly türkmen topragynyň rysgal-berekediniň we bolçulygynyň baýramy bolan Galla baýramy bilen gutlap, Berkarar döwletimiziň bagtyýarlyk döwründe ata Watanymyzyň ösüşleriň ak ýolundan bedew bady bilen öňe barýandygyny belledi. Halkymyzyň hal-ýagdaýyny has-da gowulandyrmaga, ýaşaýyş-durmuş derejesini yzygiderli ýokarlandyrmaga gönükdirilen döwlet maksatnamalary üstünlikli amala aşyrylýar. Şol tutumly bu işleriň netijesinde, eziz Diýarymyz dünýäniň çalt depginler bilen ösýän döwletleriniň birine öwrüldi.
Häzirki döwürde ykdysadyýetimiziň ähli pudaklary bilen bir hatarda, oba hojalygyny ösdürmäge uly üns berýäris diýip, hormatly Prezidentimiz Gurbanguly Berdimuhamedow sözüni dowam etdi. Ýurdumyzda oba hojalygyny düşewüntli pudaga öwürmek üçin giň gerimli işler durmuşa geçirilýär, dünýäniň ösen döwletleriniň kämil tehnologiýalary, ylmyň we tehnikanyň täze gazananlary öňdebaryjy tejribe bilen utgaşdyrylyp, pudaga giňden ornaşdyrylýar.
Garaşsyzlyk ýyllarynda milli ykdysadyýetimiziň agrar bölegini ösdürmäge, onuň guramaçylyk düzümini kämilleşdirmäge gönükdirilen möhüm işler amala aşyryldy. Oba hojalyk pudagynyň kanunçylyk binýady döwrüň talaplaryna laýyklykda kämilleşdirildi. Pagtanyň we bugdaýyň satyn alnyş nyrhlary yzygiderli ýokarlandyryldy. Oba zähmetkeşleriniň alýan girdejilerini artdyrmaga uly mümkinçilikler döredildi, bu bolsa, oba ilatynyň hal-ýagdaýyny we ýaşaýyş-durmuş derejesini yzygiderli ýokarlandyrmaga oňyn täsirini ýetirdi diýip, milli Liderimiz belledi.
Oba hojalygynda amala aşyrylýan döwlet maksatnamalarynda azyk bolçulygyny üpjün etmäge, azyk howpsuzlygyny berkitmäge aýratyn üns berilýär, ekerançylyk we maldarçylyk önümleriniň öndürilýän we gaýtadan işlenýän möçberlerini artdyrmaga gönükdirilen giň gerimli işler üstünlikli amala aşyrýar diýip, döwlet Baştutanymyz aýtdy.
Soňky ýyllarda oba hojalyk pudagynyň dolandyrylyşyny kämilleşdirmäge, önümçiligi ösdürmegiň täzeçil usullaryny ornaşdyrmaga uly üns berilýär, döwletiň we önüm öndürijileriň arasyndaky gatnaşyklaryň kanunçylyk binýadyny berkidildi diýip, hormatly Prezidentimiz belledi.
Obasenagat ulgamyny toplumlaýyn dolandyrmak we onuň işini kämilleşdirmek maksady bilen, degişli ministrlikleriň we pudak edaralarynyň hem-de ylmy-barlag institutlarynyň düzümi üýtgedip guraldy diýip bellemek bilen, döwlet Baştutanymyz oba hojalyk önümçiligini ösdürmegiň döwrebap ylmy esaslaryny işläp düzmek we önümçilige ornaşdyrmak, pudakda alnyp barylýan ylmy-barlag işleriniň netijeliligini ýokarlandyrmak maksady bilen, Oba we suw hojalyk ministrliginiň Oba hojalyk ylmy-barlag institutynyň döredilendigini nygtady.
Şonuň bilen birlikde, bu pudakda toplumlaýyn özgertmeler yzygiderli amala aşyrylýar, bu ugurda daýhan birleşikleriniň maddy-enjamlaýyn binýadyny berkitmäge aýratyn üns berilýär diýip, milli Liderimiz Gurbanguly Berdimuhamedow belledi. Oba we suw hojalyk ministrliginiň hasabynda duran bejergi traktorlary we gurallary daýhan birleşikleriniň hasabyna bellenen tertipde berilýär.
Soňra hormatly Prezidentimiz häzirki döwürde gallany, pagtany, gök we miwe önümlerini gaýtadan işleýän döwrebap kärhanalaryň, şeýle hem maldarçylyk we guşçulyk toplumlarynyň giň gerim bilen döredilýändigini, oba hojalyk önümlerini öndürijiler bilen gaýtadan işleýän we hyzmat edýän edara-kärhanalaryň arasynda netijeli gatnaşyklar ýola goýulýandygyny belledi. Täze tehnikalary we gurallary satyn almak, maldarçylygy we guşçulygy ösdürmek, önümleriň öndürilýän hem-de gaýtadan işlenilýän möçberlerini artdyrmak boýunça başga-da köp işler geçirilýär.
Daýhan birleşiklerine we daýhan hojalyklaryna, oba hojalyk paýdarlar jemgyýetlerine, mülkdarlara, kärendeçilere we oba hojalyk ylmy-barlag institutlaryna ýeňillikli şertlerde bank karzlary berilýär diýip, döwlet Baştutanymyz sözüni dowam etdi. Daýhanlar tehniki hyzmatlar, mineral dökünler, ýokary hilli tohum we zyýankeşlere garşy ulanylýan himiki serişdeler bilen ýeňillikli bahalardan üpjün edilýär. Olar bilen hasaplaşyklar wagtynda geçirilýär.
Daşary ýurtlardan getirilýän harytlaryň ornuny tutýan hem-de beýleki döwletlere iberilýän önümleri öndürmek boýunça ýurdumyzda köp işler edilýär, bu ugurda kabul edilen döwlet maksatnamalary üstünlikli amala aşyrylýar. Şu maksatnamalaryň çäklerinde häzirki döwrüň talaplaryna laýyk gelýän galla kärhanalary, maldarçylyk toplumlary, ýyladyşhana hojalyklary, et we süýt önümlerini öndürýän kärhanalar yzygiderli gurlup, ulanmaga berilýär diýip, milli Liderimiz belledi.
Şunuň bilen baglylykda, hormatly Prezidentimiz Gurbanguly Berdimuhamedow Aşgabat şäheriniň Ruhabat etrabynda gurlan Galla önümleri toplumyny we «Bereketli» çörek önümleri söwda merkezini mysal hökmünde görkezdi. Döwrebap toplumyň düzümine 100 müň tonna däne saklamaga niýetlenen ammar, ýylda 80 müň tonna un, gije-gündizde 40 tonna golaý çörek we çörek önümlerini, 48 tonna unaş öndürýän kärhanalar girýär.
Gallany talabalaýyk saklamaga we gaýtadan işlemäge niýetlenen iri kärhanalar Balkan welaýatynyň Serdar, Daşoguz welaýatynyň Görogly we Mary welaýatynyň Mary etraplarynda gurlup, ulanmaga berildi. Bu kärhanalaryň her biri ýylda 50 müň tonna däne saklamaga hem-de şonça mukdarda un öndürmäge niýetlenendir diýip, döwlet Baştutanymyz aýtdy. Türkmenabat şäherinde hem ýylda 80 müň tonna un öndürmäge we 100 müň tonna bugdaý saklamaga niýetlenen önümçilik toplumy işe girizildi.
Milli Liderimiz bu baradaky gürrüňi dowam etmek bilen, Ahal, Daşoguz, Lebap we Mary welaýatlarynda jemi 360 müň tonna galla saklamaga mümkinçilik berýän 8 sany elewatoryň gurlup, ulanmaga berilendigini belledi. Bu bolsa, daýhan zähmeti bilen ýetişdirilen bugdaýy talabalaýyk saklamaga we ýokary hilli gaýtadan işlemäge ýardam etdi. Daşoguz welaýatynda ýylda 30 müň tonna tüwi öndürýän döwrebap şaly arassalaýjy kärhana gurlup, işe girizildi. Täze kärhana ýurdumyzyň demirgazyk sebitinde ýetişdirilýän şalyny ýokary hilli gaýtadan işlemäge mümkinçilik döredýär.
Hormatly Prezidentimiz Gurbanguly Berdimuhamedowyň nygtaýşy ýaly, oba hojalygynda ýaýbaňlandyrylan iri möçberli özgertmeler netijesinde ýokary zähmet üstünlikleri gazanylýar. Muňa Müňýyllygyň ösüş maksatlarynyň biri bolan azyk howpsuzlygyny üpjün etmek ulgamynda gazanylanlar üçin ýurdumyzyň Birleşen Milletler Guramasynyň Azyk we oba hojalyk guramasynyň ýörite baýragyna mynasyp bolmagy hem şaýatlyk edýär.
Milli Liderimiz oba hojalyk işgärlerine ýüzlenmek bilen, Berkarar döwletimiziň bagtyýarlyk döwründe yhlasly zähmet çekip, ene ýerden bol hasyl öndürýän babadaýhanlarymyza netijeli işlemek, halal zähmetiniň hözirini görüp, bolelin durmuşda bagtyýar ýaşamak üçin döwletimiz tarapyndan ähli zerur şertler döredilýär. Ýurdumyzyň daýhanlary üçin ýokary öndürijilikli döwrebap tehnikalar we gurallar yzygiderli satyn alynýar. Möhleti geçip, hasapdan öçürmäge degişli oba hojalyk tehnikalary bolsa, dikeltmäge isleg bildirýän daýhanlara hem-de hususy telekeçilere muzdsuz berilýär. Önüm öndürijileri ýeňillikli nyrhlardan mineral dökünler bilen üpjün etmek üçin himiýa senagatyny ösdürmäge hem köp möçberde maýa goýumlary gönükdirilýär diýip belledi.
Oba hojalyk pudagynda alnyp barylýan bu özgertmeler, oýlanyşykly kabul edilýän çözgütler türkmen topragynda öndürilýän ýokary hilli önümleri daşary ýurtlara ýerlemäge hem mümkinçilik berýär. Şunuň bilen baglylykda, biz gallaçy daýhanlarymyzyň taýýarlan bugdaýynyň özümizden artýan bölegini daşarky bazarlara ýerlemäge ygtyýar berdik. Bu bolsa, ýurdumyzyň ykdysady kuwwatyny has-da berkitmekde möhüm ädimleriň biri boldy.
Ýaňy hem belläp geçişim ýaly, gallaçylyk pudagyny ösdürmek boýunça amala aşyrylýan işler oňyn netijesini berýär diýip, hormatly Prezidentimiz Gurbanguly Berdimuhamedow nygtady. Merdana gallaçylarymyzyň yhlasly zähmeti bilen, mukaddes Garaşsyzlygymyzyň 25 ýyllyk şanly baýramynyň bellenýän Mirasa sarpa goýmak, Watany özgertmek ýylynda hem bereketli topragymyzda ak bugdaýyň bol hasyly öndürilip, şertnamalaýyn borçnama üstünlikli berjaý edildi. Bir million 600 müň tonnadan gowrak ýokary hilli guşgursak bugdaý taýýarlandy.
Edermen daýhanlarymyzyň köp yhlas siňdirip, ýylboýy çeken zähmetiniň netijesinde öndürilen bol galla hasyly eşretli durmuşda ýaşaýan bagtyýar halkymyzyň halal ojaklarynyň berekedidir. Okgunly öňe barýan ata Watanymyzyň abadançylygynyň we gülläp ösmeginiň berk binýadydyr. Gadymy türkmen topragynyň egsilmejek rysgal çeşmesidir. Gazanylan bu uly üstünlik Berkarar döwletimiziň Garaşsyzlygynyň 25 ýyllyk şanly toýuna edermen gallaçylarymyzyň mynasyp sowgadydyr.
Milli Liderimiz merdana gallaçylarymyza, olaryň gazanan ajaýyp üstünligine mynasyp goşant goşan mehanizatorlarymyza, suw hojalyk işgärlerine, bugdaýyň ýokary hasylly nusgalaryny döredýän alymlarymyza, galla oragyna gatnaşan ähli adamlara tüýs ýürekden minnetdarlyk bildirip, ussat gallaçylarymyzyň geljekde hem uly üstünlikleri gazanjakdyklaryna berk ynam bildirdi.
Sizi ak bugdaýyň şanyna bellenilýän Galla baýramy hem-de gazanan ajaýyp zähmet ýeňişiňiz bilen ýene-de bir gezek tüýs ýürekden gutlaýaryn diýip, hormatly Prezidentimiz hemmelere berk jan saglyk, maşgala abadançylygyny, ata-babalarymyzyň şöhratly daýhançylyk däplerini dowam etdirip, eziz Watanymyzyň mundan beýläk-de gülläp ösmegi ugrunda alyp barýan asylly işlerinde täze üstünlikleri arzuw etdi.
Goý, türkmen topragynda ata-babalarymyzdan miras galan ak bugdaýyň berekedi hiç haçan egsilmesin diýip, milli Liderimiz Gurbanguly Berdimuhamedow gutlagynyň ahyrynda aýtdy. Döwlet Baştutanymyz çykyşynyň ahyrynda dabara gatnaşyjylaryň el çarpyşmalary astynda kakasy Mälikguly aganyň 12 ýaşynda ýazan we 1944-nji ýylda çap edilen goşgusyndan bir bendi okady.
Agronomiýa usuly bilen tohum sepeliň.
Güýzlük, ýazlygy öz wagtynda ekeliň!
Ýaryş gurap, köp ekeliň dänäni!
Soňra dabara gatnaşyjylaryň şatlyk-şowhuny, joşgunly el çarpyşmalar bilen hormatly Prezidentimiz ýokary netije görkezen hasyl ussatlaryna Galla baýramy mynasybetli ýörite sowgatlary gowşurdy.
Sylaga mynasyp bolanlaryň hatarynda Ahal welaýatynyň Gökdepe etrabynyň “Köpetdag” daýhan birleşiginiň kärendeçisi Guwanç Geldiýew, Ahal welaýatynyň Kaka etrabynyň Şükür bagşy adyndaky daýhan birleşiginiň kärendeçisi Sapargül Saryýewa, Ahal welaýatynyň Baharly etrabynyň “Kerim dag” daýhan hojalygynyň ýolbaşçysy Kerim Babaýew, Balkan welaýatynyň Bereket etrabynyň “Türkmenistan” daýhan birleşiginiň kärendeçisi Nurly Gulatarow, Balkan welaýatynyň Serdar etrabynyň “Purnuwar” daýhan birleşiginiň kärendeçisi Habypýar Taňryberdiýew, Balkan welaýatynyň Bereket etrabynyň Magtymguly adyndaky daýhan birleşiginiňm mülkdary Baýmyrat Döwlenow, Daşoguz welaýatynyň Akdepe etrabynyň “Babadaýhan” daýhan birleşiginiň kärendeçisi Aşyrmuhammet Söýünow, Daşoguz welaýatynyň Köneürgenç etrabynyň “Pagtaçy” daýhan birleşiginiň kärendeçisi Maýa Kakabaýewa, Senagatçylar we telekeçiler birleşmesiniň agzasy, Daşoguz welaýatynyň Boldumsaz etrabynyň “Zähmetkeş” daýhan birleşiginiň kärendeçisi Nurgeldi Gurbanbaýew, Lebap welaýatynyň Galkynyş etrabynyň “Azatlyk” daýhan birleşiginiň kärendeçisi Nury Abaýew, Lebap welaýatynyň Garabekewül etrabynyň “Lebap” daýhan birleşiginiň kärendeçisi Maral Gurbanowa, Türkmenistanyň Senagatçylar we telekeçiler birleşmesiniň agzasy, Lebap welaýatynyň Serdarabat etrabynyň “Ýunus daýhan” daýhan hojalygynyň ýolbaşçysy Ýunus Abdullaýew, Mary welaýatynyň Wekilbazar etrabynyň “Çarlakýap” daýhan birleşiginiň kärendeçisi Sülgün Gaýypowa, Mary welaýatynyň Türkmengala etrabynyň “Türkmenistan” daýhan birleşiginiň kärendeçisi Taýgeldi Orazgeldiýew, Mary welaýatynyň Ýolöten etrabynyň “Rahat” daýhan birleşiginiň kärendeçisi Jumaguly Ýakubow bar.
Hormatly Prezidentimiziň şa sowgadyna mynasyp bolan daýhanlar öz zähmetine ýokary baha berendigi, oba hojalygynyň ösdürilmegi, ýerlerde döwrebap ýaşaýyş-durmuş düzüminiň kemala getirilmegi ugrunda yzygiderli alada edýändigi üçin döwlet Baştutanymyza tüýs ýürekden hoşallyk bildirip, mähriban Watanymyzyň gülläp ösmeginiň, ykdysady kuwwatynyň artmagynyň bähbidine öňde goýulýan wezipeleri üstünlikli ýerine ýetirmek ugrunda mundan beýläk-de ýadawsyz zähmet çekjekdiklerine ynandyrdylar.
Soňra hormatly Prezidentimiz Gurbanguly Berdimuhamedow Aşgabadyň atçylyk sport toplumynyň baş binasynyň iç tarapyndaky toý meýdançasyna geldi. Bu ýerde hormatly Prezidentimize Galla baýramy mynasybetli hem-de türkmen gallaçylarynyň çuňňur hoşallygynyň nyşany hökmünde ýurdumyzyň oba hojalyk toplumynyň işgärleriniň adyndan 2013-nji ýylda doglan we Peleňiň nesil ugruna degişli bolan Parad hem-de Melhem atly bedewleriň nesli mele reňkli Gallaçy atly ajaýyp ahalteke bedewi sowgat berildi.
Döwlet Baştutanymyz sowgat berlen bedewiň ýanyna baryp, halkymyzyň asylly däbine görä atyň boýnuna alaja dakdy. Bedew özüne bildirilýän hormata hoşallygyň alamaty hökmünde aýaklary bilen ýer peşäp, milli Liderimize birnäçe gezek başyny atdy. Munuň özi bedew bilen ynsanyň ýürekdeşliginiň, hormatly Prezidentimiziň atlara goýýan aýratyn sarpasyna bildirilýän hoşallygyň aýdyň mysaldyr.
Soňra hormatly Prezidentimiz Gurbanguly Berdimuhamedow Gallaçy atly bedewe atlanyp, aýlawyň meýdançasyna çykdy hem-de düşbi bedew bilen maýdalyna gezim etdi.
Ýurdumyzda giňden bellenilýän we uly dabaralara beslenen Galla baýramynyň paýtagtymyzyň atçylyk sport toplumynda geçirilmeginde aýratyn many bardyr. Çünki ahalteke bedewi we altynsow ak bugdaý türkmen halkynyň bahasyz baýlygy we onuň belent buýsanjy bolup durýar.
Toplumyň münberlerini dolduryp oturan tomaşaçylar bu görnüşleri uly gyzyklanma bilen synladylar. Ussat çapyksuwar hökmünde ykrar edilen hormatly Prezidentimiz bedewe erk etmegiň ussatlygyny görkezdi. Düşbi bedew çapyksuwaryň emrini birkemsiz ýerine ýetirdi. Milli Liderimiz Gallaçy atly bedew bilen gezelenji tamamlap, toplumyň münberine tarap ugrady.
Dabara baýramçylyk mynasybetli guralan at çapyşyklary bilen dowam etdi. Asyrlaryň dowamynda türkmen toýlary şowhunly at çapyşyklary bilen utgaşdyrylýar.
Tomaşaçylar saýlama bedewleriň çapyşyklaryna uly gyzyklanma bilen syn etdiler. Türkmen halkynyň döreden we öçmejek şöhratyna öwrülen owadan hem-de ýyndam bedewler halkymyzyň diliniň senasy bolmak bilen, çekeleşikli çapyşyklary bilen tomaşaçylarda uly gyzyklanma döretdi.
Mälim bolşy ýaly, ahalteke bedewleri ähli döwürlerde türkmen halkynyň durmuşynyň bir bölegine, wepaly gardaşyna öwrüldi. Ahalteke bedewlerine aýratyn gadyr goýýan we at çapmagyň ussady döwlet Baştutanymyzyň ýadawsyz tagallasy netijesinde, Berkarar döwletimiziň bagtyýarlyk döwründe ýurdumyzda atçylyk we atçylyk sporty täze belentliklere çykdy. Ady rowaýata öwrülen bedewlere halk söýgüsini siňdiren hormatly Prezidentimiz Gurbanguly Berdimuhamedow ahalteke bedewleriniň abraýyny we şöhratyny artdyrmak, dünýäde şöhratly pederlerimiziň döreden atçylyk sungatyny giňden wagyz etmek baradaky aladany döwlet syýasatynyň möhüm ugruna öwürdi.
Hormatly Prezidentimiz “ganatly bedewlere” ajaýyp eserleri bagyş etdi. Olaryň hatarynda şu ýylyň bahar aýynda neşir edilen “Gadamy batly bedew” atly kitaby bar. Häzirki döwürde bedewler oňyn ösüşiň ýola bilen gadam urýan we durmuşyň ähli ulgamlarynda uly üstünlikler gazanýan Watanymyzyň döredijilik kuwwatynyň nyşanyna öwrüldi.
Bu gün dürli aralyklara çapyşyklaryň 5-si geçirildi. Şolaryň her biri tomaşaçylarda ýatdan çykmajak täsirler galdyrdy. Çapuw ýodasynda ýerleý uçýan guşlary ýatladýan bedewleriň çapyşygyna haýran galmazlyk mümkin däl. Şunuň ýaly ajaýyp görnüşler adamlaryň bedewlere bolan buýsanjyny goşalandyrýar. Öz hünärine berlen çapyksuwarlar bedewler bilen bir bitewi sazlaşygy emele getirip, ýeňiş gazanmak ugrunda yhlaslaryny gaýgyrmadylar.
Galla baýramy mynasybetli geçirilen birinji çapyşykda bedewler 1000 metr aralykdan güýç synanyşdylar. Örän çekeleşikli we gyzykly geçen bäsleşikde Türkmenistanyň Prezidentiniň ahalteke atçylyk toplumyna degişli bedewler öz ýyndamlygyny görkezip, baýrakly orunlaryň üçüsini hem eýeledi. Başgaça aýdylanda, Märkew atly dor bedewi bu aralygy 1 minut 7 sekuntda geçip, birinji orny eýeledi. Ikinji orna Güldesse, üçünji orna hem Sadap atly bedew mynasyp boldy. Bedewleriň ikisi hem şol topluma degişlidir.
Ikinji çapyşykda hem menzil 1000 metr boldy. Onda Türkmenistanyň “Senagat” paýdarlar täjirçilik bankynyň Gülbahar atly bedewi bellenilen aralygy 1 minut 7,2 sekuntda geçip, birinji orny eýeledi. Bu bäsleşikde Türkmenistanyň Prezidentiniň ahalteke atçylyk toplumyna degişli Nepis atly bedew ikinji, Türkmenistanyň Migrasiýa gullugyna degişli Merdem bolsa üçünji orna düşdüler.
Üçünji çapyşykda Türkmenistanyň Prezidentiniň ahalteke atçylyk toplumyna degişli Jebel atly gurtmele bedew 1200 metr aralygy 1 minut 20,4 sekuntda geçip, birinji orna mynasyp boldy. Bu çapyşykda Türkmenistanyň Goranmak ministrligine degişli Erkin ikinji, D.Durdyýewiň hojalygyna degişli Dorguş bolsa üçünji baýrakly orna mynasyp boldy.
Dördünji çapyşykda bedewler 1200 metr aralyga goşuldylar. Şonda Içeri işler ministrligine degişli Şaýadym bu aralygy 1 minut 20,7 sekuntda geçip, ýeňiji boldy. Bu çapyşykda Aşgabat şäheriniň Ruhabat etrabynyň Garadaşaýak ýaşaýyş toplumyna degişli Nesip ikinji, Türkmenistanyň Döwlet gümrük gullugyna degişli Tamaly bolsa üçünji orny eýeledi.
Baýramçylyk at çapyşygynyň jemleýji tapgyrynda dört we ulyýaşar atlaryň onusy Türkmenistanyň Prezidentiniň baş baýragyny almak ugrunda 1200 metr aralykdan güýç synanyşdylar. Bu çekeleşikli geçen çapyşykda baýrakly orunlara Türkmenistanyň Prezidentiniň ahalteke atçylyk toplumynda seýislenýän bedewler mynasyp boldy. Has takygy, Angar atly dor bedew bellenilen aralygy 1 minut 20,1 sekuntda geçip, ýeňiji boldy. Perman ikinji we Gökýaýla atly bedew bolsa üçünji baýrakly orna mynasyp boldy.
Soňra baýramçylyk çapyşyklarynyň ýeňijilerine hormatly Prezidentimiz Gurbanguly Berdimuhamedowyň adyndan sowgatlar gowşuryldy.
Bäşinji çapyşygyň ýeňijisine döwlet Baştutanymyzyň baş baýragy bolan awtoulagyň açary gowşuryldy.
Galla baýramy mynasybetli guralan dabaralar tamamlanandan soň, hormatly Prezidentimiz ýurdumyzyň ýolbaşçy düzümlerinden gutlaglary kabul etdi.
Soňra milli Liderimiz baýramçylyga gatnaşyjylar bilen mähirli hoşlaşyp, bu ýerden ugrady.
Agşamlyk Aşgabadyň atçylyk sport toplumynda ýurdumyzyň medeniýet we sungat ussatlarynyň Galla baýramy mynasybetli aýdym-sazly çykyşlary ýaýbaňlandyryldy. Ol baýramçylygyň jemleýji tapgyryna öwrüldi.
Şeýle hem dabara gatnaşyjylar hormatly Prezidentimiz Gurbanguly Berdimuhamedowyň adyna Ýüzlenme kabul etdiler. Onda oba hojalyk toplumynyň ösdürilmegi, pudagyň zähmetkeşleriniň abadançylygy hakynda hemmetaraplaýyn alada edýändigi üçin milli Liderimize hoşallyk bildirilip, döwlet Baştutanymyza berk jan saglyk, uzak ömür, ýurdumyzyň gülläp ösmeginiň, türkmen halkynyň bagtyýar durmuşynyň bähbidine alyp barýan asylly işlerinde üstünlik arzuw edildi.
Baýramçylyk çäreleri tutuş ýurdumyzy gurşap aldy. Olarda Berkarar döwletimiziň bagtyýarlyk döwrüniň döredijilik ruhuny, türkmen halkynyň agzybirligini, milletiň ekerançylygyň köp asyrlyk däplerini ösdürip gelen şöhratly pederleriniň mirasyna bolan ygrarlylygyny özünde jemleýän aýdym-sazlar belentden ýaňlandy.
Paýtagtymyzda we ýurdumyzyň sebitlerinde Galla baýramy mynasybetli hasyl ussatlaryny hormatlamak dabaralary, medeni- köpçülikleýin we sport çäreleri, ylmy maslahatlar, sergiler guralýar. Bereketli saçaklar giňden ýazylýar. Şu gün ähli ýerde türkmen toýuna mahsus dabaralar guraldy. Aşgabadyň atçylyk sport toplumynda geçirilen baýramçylyk çärelerine hormatly Prezidentimiz Gurbanguly Berdimuhamedow gatnaşdy.
Irden toplumyň merkezi girelgesiniň öňünde ýurdumyzyň Mejlisiniň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralarynyň, ministrlikleriň we pudak düzümleriniň ýolbaşçylary, welaýatlaryň we Aşgabat şäheriniň häkimleri, daşary ýurtlaryň Türkmenistanda işleýän diplomatik wekilhanalarynyň ýolbaşçylary ýygnandylar. Olaryň arasynda baýramçylyk çärelerine gatnaşmak üçin paýtagtymyza gelen daşary ýurtly myhmanlar, işewürler, daşary ýurtlaryň we ýurdumyzyň köpçülikleýin habar beriş serişdeleriniň wekilleri bar.
Olar milli Liderimizi uly ruhubelentlik bilen garşyladylar. Milli lybasdaky gyzlar döwlet Baştutanymyza ajaýyp gül desselerini gowşurdylar.
Şanly waka mynasybetli aýdym-sazly dabaralar, döredijilik toparlarynyň çykyşlary ýaýbaňlandyryldy. Olar belent ruha beslenen aýdym-sazlary bilen hormatly Prezidentimiz Gurbanguly Berdimuhamedowyň milli ykdysadyýetimiziň ähli pudaklarynyň, şol sanda obasenagat toplumynyň ösüşine kuwwatly itergi beren özgertmelerini, mähriban Watanymyzy we sahawatly türkmen topragyny wasp etdiler.
Dabara gatnaşyjylar bilen salamlaşyp, hormatly Prezidentimiz Aşgabadyň atçylyk sport toplumynyň merkezi girelgesine tarap ýöredi. Bu ýerde ýolugrunda ýurdumyzyň obasenagat toplumynyň, şol sanda däneçilik pudagynyň ýeten derejesini aýdyň beýan edýän oba hojalyk önümleriniň sergisi guraldy. Ýurdumyzyň welaýatlarynyň gallaçylary hem baýramçylyk sergisini taýýarladylar. Onda ak bugdaýyň täze hasylynyň günüň şöhlesine öwşün atýan desseleri, dok däneli sümmüller görkezilýär. Şeýle hem bu ýerde çörek hem-de çörek önümleriniň, unaş we süýji önümleriniň dürli görnüşleri goýlupdyr. Täze bişirilen çörekler sergide möhüm orun eýeleýär. Sergide halkymyzyň saçaklarynyň, toý-baýramçylyklarynyň bezegi bolan pişme, dürli tagamlar we milli naharlaryň görnüşleri görkezilýär.
Şeýle hem bu ýerde oba hojalyk ekinleriniň görnüşleriniň aýratynlyklary, ýurdumyzyň däneçilik pudagynyň mümkinçilikleri barada gürrüň berýän şekiller, türkmen seçgiçileriniň yhlasly zähmetiň netijesi bolan we ýerli toprak-howa şertlerinde özüni gowy tarapdan görkezen bugdaý görnüşleri bilen tanyşmaga-da mümkinçilik bar. Bu ýerde bugdaýyň “Garaşsyzlyk”, “Bitarap”, “Berkarar”, “Miras”, “Akbaş” we beýleki görnüşlerine aýratyn orun berlipdir.
Şeýle hem sergide bugdaýdan başga-da, ýurdumyzyň zähmetsöýer babadaýhanlarynyň ösdürip ýetişdirýän önümleriniň dürli görnüşleri görkezildi. Olaryň hatarynda “Paýtagt”, “Laçyn” görnüşli mekgejöwen, “Bereketli” we “Ýerli” görnüşli mäş, “Garagum” görnüşli jöwen, “Santa” ýeralmasy görkezildi. Ýeri gelende aýtsak, ýeralmanyň bu görnüşi Gollandiýadan getirildi. Ol iki ýylyň dowamynda türkmen topragyna we howa şertlerimize uýgunlaşdyryldy. Onuň hasyllylygy her gektardan 150-200 sentnere barabardyr.
Sergide bakja önümlerine hem aýratyn orun berlipdir. Bu ýerde “Waharman”, “Garrygyz”, “Gyzyl gülaby” gawunlarynyň, “Jeýhun”, “Serdar”, “Dişim” garpyzlarynyň, “Palaw kädi”, “Daş kädi”, “Düwdi bişer” kädileriniň tohumlary görkezilýär.
Biziň ýurdumyzda ösdürilip ýetişdirilýän we toprak-howa şertlerimize uýgunlaşdyrylan “Sary mirzol-304” käşiriň, “Sonýa” we “Flora” gant şugundyrynyň, “Müsür” tekiz şugundyry” hem-de “Borda-237” ýaly şugundyryň, “Aşgabat” we “Gäwers-3” hyýarynyň, “Gök ýaýla” pomidorynyň, “Gypjak” badamjanynyň, “Aşgabat” keleminiň, “Aşgabat-1” turpunyň, “Gyzyl togalak” hem-de “Gyzyl äpet” rediskalaryň, “Farap” we “Kaka” soganlarynyň “Zarýa-F-1” süýji burçuň, “Samson” käşiriň, “Ýasy ýaprak” turşujanyň tohumlary bar.
Sahawatly türkmen topragynyň önümleriniň hatarynda ak we gara üzümiň äpet hoşalary has-da tapawutlanýar. Hormatly Prezidentimiz Gurbanguly Berdimuhamedow olary aýratyn üns bilen synlady. Göze gelüwli üzüm hoşalarynyň ýanynda armydyň, almanyň, erigiň we beýleki miwe önümleriniň şerbet suwlary goýlupdyr.
Türkmenistanda ösdürilip ýetişdirilýän ekerançylykda pagtaçylyk aýratyn orun eýeleýär. Sergide gowaçanyň iň gowy tohumlarynyň görnüşleri görkezilýär. Olaryň hatarynda orta süýümli hasylly görnüş hasaplanýan “Ýolöten-7” görnüşi bar. Pagtanyň bu tohumynyň hasyllylygy gektardan 55,9 sentnere barabardyr. “Ýolöten-19” pagta çigidi hem sergide aýratyn orun eýeleýär.
Gowaçanyň bu görnüşi tiz ýetişýändigi, süýüminiň inçeligi we berkligi hem-de ýokary hilliligi bilen tapawutlanýar. Gowaçanyň täze görnüşleriniň hatarynda pagta ýygyjy tehnikalar bilen ýygnamaga amatly “Ýolöten-45” görnüşi sergide aýratyn orun eýeleýär.
Serginiň ýanynda bugdaý sümmülleri we “1 million 600 müň tonna” diýen ýazgyly ägirt uly çörek goýlupdyr.
Şeýle hem bu ýerde ýyladyşhana gurlup, onda pomidor ösüp otyr. Mälim bolşy ýaly, ilaty tutuş ýylyň dowamynda ter gök önümler bilen üpjün etmek maksady bilen ýyladyşhana hojalyklarynyň ulgamynyň giňeldilmegi ýurdumyzyň obasenagat toplumyny ösdürmegiň möhüm we geljegi uly ugurlarynyň biri bolup durýar.
Ýyladyşhananyň aňyrsyndaky hatara gurlan ak öýleriň öňünde halk bagşylarynyň aýdym-sazly çykyşlary ýaýbaňlandyryldy. Ol ýerde haly we keçe, zergärçilik önümleriniň sergisi guraldy.
Hormatly Prezidentimiz Gurbanguly Berdimuhamedow ak öýleriň ýanynda milli oýunlara gümra bolan körpeleriň ýanynda saklandy. Çagalar milli Liderimizi uly şatlyk bilen garşyladylar.
Hormatly Prezidentimiziň barýan ýolunyň ugrunda bugdaý dänelerinden taýýarlanan Türkmenistanyň kartasy goýlupdyr. Onuň garşysynda bolsa Nowruzda baýramçylyk tagamy bolan semeni taýýarlanýan görnüşdäki ösüp oturan maýsa bar. Şeýle hem bu ýerde bugdaý meýdany şekillendirilip, onuň ýanynda ak bugdaýyň harmany döredilipdir.
Döwlet Baştutanymyz bu görnüşleri hem-de bugdaý gaýtadan işlenilýän we saklanylýan elewatorlaryň kiçeldilen nusgalaryny synlady. Şeýle hem bu ýerde täze bişirilen çörek, bulka, gaplanan unaş we beýleki önümler görkezilýär.
Mahlasy, bugdaý dänesiniň taýýar önüme çenli bolan ähli önümçilik ulgamy görkezilýär. Bu ýerde önümçilik desgalarynyň, şol sanda ýurdumyzyň telekeçileriniň çörek önümleriniň we beýleki azyk önümleriniň dürli görnüşleri goýlupdyr. Häzirki döwürde türkmen telekeçileri obasenagat toplumynda we azyk hem-de gaýtadan işleýän pudakda işjeňlik görkezýärler. Olar önümçilikde iň häzirki zaman tehnologiýalaryny ulanyp, uly üstünlikleri gazanýarlar.
Bu ýerde gadymy döwürlerde pederlerimiziň ulanan ýel degirmeniniň şekili goýlupdyr. Häzirki döwürde bu desgalaryň ornuny awtomatlaşdyrylan döwrebap önümçilik toplumlary eýeledi. Gadymy ekerançylyk medeniýetini esaslandyran türkmen halky müňýyllyklaryň dowamynda ak bugdaý ösdürip ýetişdiripdir we bu ugurdaky oňyn tejribelerini nesilden-nesle geçirip gelipdir.
Çörek bolçulygy her bir maşgalanyň we tutuş halkyň rysgal-berekediniň, abadançylygynyň baş nyşanydyr. Sergide görkezilýän dürli gymmatlyklar milletiň ekerançylyk medeniýetini ösdürmek babatda köpasyrlyk däpleri hakynda gürrüň berýär. Sergide pederlerimiziň ekin meýdanlaryny özleşdiren zähmet gurallary möhüm orny eýeleýär. Olaryň güýji bilen bugdaý ösdürip ýetişdirilipdir, Halkymyz el, suw we ýel degirmenleriniň kömegi bilen bugdaýy üwäpdir, tamdyrda ak bugdaý unundan tagamly çörek bişiripdir.
Häzirki taryhy eýýamda asylly däpler täze mazmun bilen ösdürilýär. Milli ýörelgeler häzirki döwrüň pudaklaýyn ylmynyň ýeten derejesi we täzeçil tehnologiýalar bilen utgaşdyrylyp, ýurdumyzyň obasenagat toplumynyň ösüş maksatnamasynyň esasyny düzýär. Hormatly Prezidentimiz Gurbanguly Berdimuhamedowyň başlangyjy bilen we paýhasly ýolbaşçylygynda obasenagat toplumynda amala aşyrylýan giň möçberli özgertmeleriň netijesinde, däneçilik pudagy azyk howpsuzlygynyň esasy hökmünde oba hojalyk önümçiliginde möhüm orny eýeleýär.
Şunuň bilen baglylykda, döwletimiziň obasenagat toplumynyň ösüşi bilen baglanyşykly meselelere aýratyn ähmiýet berýändigini bellemeli. Babadaýhanlaryň netijeli zähmet çekmegi üçin zerur şertler döredilýär, häzirki zaman oba hojalyk tehnikalary yzygiderli satyn alynýar. Pudaklaýyn düzümi döwrebaplaşdyrmak boýunça maksatnamalaýyn çäreler durmuşa geçirilýär. Oba zähmetkeşlerine düýpli ýeňillikler berilýär. Tabşyrylan önüm üçin haryt öndürijiler bilen hasaplaşyklar öz wagtynda geçirilýär. Şeýle hem oba ilatynyň ýaşaýyş-durmuş derejesini yzygiderli ýokarlandyrmak boýunça maksatnamalaýyn çäreler amala aşyrylýar. Türkmen gallaçylary hemmetaraplaýyn edilýän alada jogap hökmünde her ýylda bugdaýdan bol hasyl alýarlar hem-de ýokary hilli däne bilen Watan harmanyny beýgeldýärler. Bir söz bilen aýdylanda, olar ýurdumyzda azyk bolçulygynyň üpjün edilmegine, halkymyzyň abadançylygynyň ýokarlandyrylmagyna mynasyp goşant goşýarlar.
Milli ykdysadyýetimiziň möhüm pudagy bolan obasenagat ulgamynyň toplumlaýyn döwrebaplaşdyrylmagy özüniň anyk netijelerini berýär. Şunda ýurdumyzda öndürilýän ýokary hilli önümleri, şol sanda içerki sarp edijilerden artýan bugdaýy daşarky bazarlara eksport etmek mümkinçiligi döreýär. Bu bolsa ýurdumyzyň ekerançylaryny täze zähmet ýeňişlerine ruhlandyrýar. Şu ýylky galla oragy möwsüminiň ýokary netijeleri munuň aýdyň subutnamasydyr.
Döwlet Baştutanymyz Gurbanguly Berdimuhamedow gawundan, garpyzdan, kädiden doldurylan arabalary, gyş paslynda gül ösdürilip ýetişdirilýän ýyladyşhanalary, suwaryşyň damjalaýyn usuly arkaly süýji burçuň, badamjanyň, jöweniň, şalynyň we beýleki önümleriň ösdürilip ýetişdirilýän kiçeldilen meýdanlaryny synlady. Baýramçylyk görnüşinde bezelen arabalaryň käbirinde Türkmenistanda öndürilýän we toprak- howa şertlerine uýgunlaşdyrylan gant şugundyryndan öndürilen gandyň dürli görnüşleri goýlupdyr.
Şu gezekki dabaralaryň daşary ýurtly myhmanlarda uly täsir galdyrandygyny bellemek gerek. Olaryň hatarynda Garaşsyz Döwletleriň Arkalaşygynyň tohumçylyk meseleleri boýunça Hökümetara utgaşdyryjy geňeşiň başlygy, GDA-nyň “Semena” assosiasiýasynyň prezidenti Iwan Kuzmin hem bar. Myhman hormatly Prezidentimiziň durmuşa geçirýän syýasatynyň uly üstünliklere beslenýändigine haýran galýandygyny aýtdy.
Soňra hormatly Prezidentimiz atçylyk sport toplumynyň baş binasynyň ýanynda gurnalan münbere geçýär.
Milli Liderimiz dabara gatnaşyjylary, oba hojalyk işgärlerini ýurdumyzda uly dabara bilen bellenilýän, sahawatly türkmen topragynyň rysgal-berekediniň we bolçulygynyň baýramy bolan Galla baýramy bilen gutlap, Berkarar döwletimiziň bagtyýarlyk döwründe ata Watanymyzyň ösüşleriň ak ýolundan bedew bady bilen öňe barýandygyny belledi. Halkymyzyň hal-ýagdaýyny has-da gowulandyrmaga, ýaşaýyş-durmuş derejesini yzygiderli ýokarlandyrmaga gönükdirilen döwlet maksatnamalary üstünlikli amala aşyrylýar. Şol tutumly bu işleriň netijesinde, eziz Diýarymyz dünýäniň çalt depginler bilen ösýän döwletleriniň birine öwrüldi.
Häzirki döwürde ykdysadyýetimiziň ähli pudaklary bilen bir hatarda, oba hojalygyny ösdürmäge uly üns berýäris diýip, hormatly Prezidentimiz Gurbanguly Berdimuhamedow sözüni dowam etdi. Ýurdumyzda oba hojalygyny düşewüntli pudaga öwürmek üçin giň gerimli işler durmuşa geçirilýär, dünýäniň ösen döwletleriniň kämil tehnologiýalary, ylmyň we tehnikanyň täze gazananlary öňdebaryjy tejribe bilen utgaşdyrylyp, pudaga giňden ornaşdyrylýar.
Garaşsyzlyk ýyllarynda milli ykdysadyýetimiziň agrar bölegini ösdürmäge, onuň guramaçylyk düzümini kämilleşdirmäge gönükdirilen möhüm işler amala aşyryldy. Oba hojalyk pudagynyň kanunçylyk binýady döwrüň talaplaryna laýyklykda kämilleşdirildi. Pagtanyň we bugdaýyň satyn alnyş nyrhlary yzygiderli ýokarlandyryldy. Oba zähmetkeşleriniň alýan girdejilerini artdyrmaga uly mümkinçilikler döredildi, bu bolsa, oba ilatynyň hal-ýagdaýyny we ýaşaýyş-durmuş derejesini yzygiderli ýokarlandyrmaga oňyn täsirini ýetirdi diýip, milli Liderimiz belledi.
Oba hojalygynda amala aşyrylýan döwlet maksatnamalarynda azyk bolçulygyny üpjün etmäge, azyk howpsuzlygyny berkitmäge aýratyn üns berilýär, ekerançylyk we maldarçylyk önümleriniň öndürilýän we gaýtadan işlenýän möçberlerini artdyrmaga gönükdirilen giň gerimli işler üstünlikli amala aşyrýar diýip, döwlet Baştutanymyz aýtdy.
Soňky ýyllarda oba hojalyk pudagynyň dolandyrylyşyny kämilleşdirmäge, önümçiligi ösdürmegiň täzeçil usullaryny ornaşdyrmaga uly üns berilýär, döwletiň we önüm öndürijileriň arasyndaky gatnaşyklaryň kanunçylyk binýadyny berkidildi diýip, hormatly Prezidentimiz belledi.
Obasenagat ulgamyny toplumlaýyn dolandyrmak we onuň işini kämilleşdirmek maksady bilen, degişli ministrlikleriň we pudak edaralarynyň hem-de ylmy-barlag institutlarynyň düzümi üýtgedip guraldy diýip bellemek bilen, döwlet Baştutanymyz oba hojalyk önümçiligini ösdürmegiň döwrebap ylmy esaslaryny işläp düzmek we önümçilige ornaşdyrmak, pudakda alnyp barylýan ylmy-barlag işleriniň netijeliligini ýokarlandyrmak maksady bilen, Oba we suw hojalyk ministrliginiň Oba hojalyk ylmy-barlag institutynyň döredilendigini nygtady.
Şonuň bilen birlikde, bu pudakda toplumlaýyn özgertmeler yzygiderli amala aşyrylýar, bu ugurda daýhan birleşikleriniň maddy-enjamlaýyn binýadyny berkitmäge aýratyn üns berilýär diýip, milli Liderimiz Gurbanguly Berdimuhamedow belledi. Oba we suw hojalyk ministrliginiň hasabynda duran bejergi traktorlary we gurallary daýhan birleşikleriniň hasabyna bellenen tertipde berilýär.
Soňra hormatly Prezidentimiz häzirki döwürde gallany, pagtany, gök we miwe önümlerini gaýtadan işleýän döwrebap kärhanalaryň, şeýle hem maldarçylyk we guşçulyk toplumlarynyň giň gerim bilen döredilýändigini, oba hojalyk önümlerini öndürijiler bilen gaýtadan işleýän we hyzmat edýän edara-kärhanalaryň arasynda netijeli gatnaşyklar ýola goýulýandygyny belledi. Täze tehnikalary we gurallary satyn almak, maldarçylygy we guşçulygy ösdürmek, önümleriň öndürilýän hem-de gaýtadan işlenilýän möçberlerini artdyrmak boýunça başga-da köp işler geçirilýär.
Daýhan birleşiklerine we daýhan hojalyklaryna, oba hojalyk paýdarlar jemgyýetlerine, mülkdarlara, kärendeçilere we oba hojalyk ylmy-barlag institutlaryna ýeňillikli şertlerde bank karzlary berilýär diýip, döwlet Baştutanymyz sözüni dowam etdi. Daýhanlar tehniki hyzmatlar, mineral dökünler, ýokary hilli tohum we zyýankeşlere garşy ulanylýan himiki serişdeler bilen ýeňillikli bahalardan üpjün edilýär. Olar bilen hasaplaşyklar wagtynda geçirilýär.
Daşary ýurtlardan getirilýän harytlaryň ornuny tutýan hem-de beýleki döwletlere iberilýän önümleri öndürmek boýunça ýurdumyzda köp işler edilýär, bu ugurda kabul edilen döwlet maksatnamalary üstünlikli amala aşyrylýar. Şu maksatnamalaryň çäklerinde häzirki döwrüň talaplaryna laýyk gelýän galla kärhanalary, maldarçylyk toplumlary, ýyladyşhana hojalyklary, et we süýt önümlerini öndürýän kärhanalar yzygiderli gurlup, ulanmaga berilýär diýip, milli Liderimiz belledi.
Şunuň bilen baglylykda, hormatly Prezidentimiz Gurbanguly Berdimuhamedow Aşgabat şäheriniň Ruhabat etrabynda gurlan Galla önümleri toplumyny we «Bereketli» çörek önümleri söwda merkezini mysal hökmünde görkezdi. Döwrebap toplumyň düzümine 100 müň tonna däne saklamaga niýetlenen ammar, ýylda 80 müň tonna un, gije-gündizde 40 tonna golaý çörek we çörek önümlerini, 48 tonna unaş öndürýän kärhanalar girýär.
Gallany talabalaýyk saklamaga we gaýtadan işlemäge niýetlenen iri kärhanalar Balkan welaýatynyň Serdar, Daşoguz welaýatynyň Görogly we Mary welaýatynyň Mary etraplarynda gurlup, ulanmaga berildi. Bu kärhanalaryň her biri ýylda 50 müň tonna däne saklamaga hem-de şonça mukdarda un öndürmäge niýetlenendir diýip, döwlet Baştutanymyz aýtdy. Türkmenabat şäherinde hem ýylda 80 müň tonna un öndürmäge we 100 müň tonna bugdaý saklamaga niýetlenen önümçilik toplumy işe girizildi.
Milli Liderimiz bu baradaky gürrüňi dowam etmek bilen, Ahal, Daşoguz, Lebap we Mary welaýatlarynda jemi 360 müň tonna galla saklamaga mümkinçilik berýän 8 sany elewatoryň gurlup, ulanmaga berilendigini belledi. Bu bolsa, daýhan zähmeti bilen ýetişdirilen bugdaýy talabalaýyk saklamaga we ýokary hilli gaýtadan işlemäge ýardam etdi. Daşoguz welaýatynda ýylda 30 müň tonna tüwi öndürýän döwrebap şaly arassalaýjy kärhana gurlup, işe girizildi. Täze kärhana ýurdumyzyň demirgazyk sebitinde ýetişdirilýän şalyny ýokary hilli gaýtadan işlemäge mümkinçilik döredýär.
Hormatly Prezidentimiz Gurbanguly Berdimuhamedowyň nygtaýşy ýaly, oba hojalygynda ýaýbaňlandyrylan iri möçberli özgertmeler netijesinde ýokary zähmet üstünlikleri gazanylýar. Muňa Müňýyllygyň ösüş maksatlarynyň biri bolan azyk howpsuzlygyny üpjün etmek ulgamynda gazanylanlar üçin ýurdumyzyň Birleşen Milletler Guramasynyň Azyk we oba hojalyk guramasynyň ýörite baýragyna mynasyp bolmagy hem şaýatlyk edýär.
Milli Liderimiz oba hojalyk işgärlerine ýüzlenmek bilen, Berkarar döwletimiziň bagtyýarlyk döwründe yhlasly zähmet çekip, ene ýerden bol hasyl öndürýän babadaýhanlarymyza netijeli işlemek, halal zähmetiniň hözirini görüp, bolelin durmuşda bagtyýar ýaşamak üçin döwletimiz tarapyndan ähli zerur şertler döredilýär. Ýurdumyzyň daýhanlary üçin ýokary öndürijilikli döwrebap tehnikalar we gurallar yzygiderli satyn alynýar. Möhleti geçip, hasapdan öçürmäge degişli oba hojalyk tehnikalary bolsa, dikeltmäge isleg bildirýän daýhanlara hem-de hususy telekeçilere muzdsuz berilýär. Önüm öndürijileri ýeňillikli nyrhlardan mineral dökünler bilen üpjün etmek üçin himiýa senagatyny ösdürmäge hem köp möçberde maýa goýumlary gönükdirilýär diýip belledi.
Oba hojalyk pudagynda alnyp barylýan bu özgertmeler, oýlanyşykly kabul edilýän çözgütler türkmen topragynda öndürilýän ýokary hilli önümleri daşary ýurtlara ýerlemäge hem mümkinçilik berýär. Şunuň bilen baglylykda, biz gallaçy daýhanlarymyzyň taýýarlan bugdaýynyň özümizden artýan bölegini daşarky bazarlara ýerlemäge ygtyýar berdik. Bu bolsa, ýurdumyzyň ykdysady kuwwatyny has-da berkitmekde möhüm ädimleriň biri boldy.
Ýaňy hem belläp geçişim ýaly, gallaçylyk pudagyny ösdürmek boýunça amala aşyrylýan işler oňyn netijesini berýär diýip, hormatly Prezidentimiz Gurbanguly Berdimuhamedow nygtady. Merdana gallaçylarymyzyň yhlasly zähmeti bilen, mukaddes Garaşsyzlygymyzyň 25 ýyllyk şanly baýramynyň bellenýän Mirasa sarpa goýmak, Watany özgertmek ýylynda hem bereketli topragymyzda ak bugdaýyň bol hasyly öndürilip, şertnamalaýyn borçnama üstünlikli berjaý edildi. Bir million 600 müň tonnadan gowrak ýokary hilli guşgursak bugdaý taýýarlandy.
Edermen daýhanlarymyzyň köp yhlas siňdirip, ýylboýy çeken zähmetiniň netijesinde öndürilen bol galla hasyly eşretli durmuşda ýaşaýan bagtyýar halkymyzyň halal ojaklarynyň berekedidir. Okgunly öňe barýan ata Watanymyzyň abadançylygynyň we gülläp ösmeginiň berk binýadydyr. Gadymy türkmen topragynyň egsilmejek rysgal çeşmesidir. Gazanylan bu uly üstünlik Berkarar döwletimiziň Garaşsyzlygynyň 25 ýyllyk şanly toýuna edermen gallaçylarymyzyň mynasyp sowgadydyr.
Milli Liderimiz merdana gallaçylarymyza, olaryň gazanan ajaýyp üstünligine mynasyp goşant goşan mehanizatorlarymyza, suw hojalyk işgärlerine, bugdaýyň ýokary hasylly nusgalaryny döredýän alymlarymyza, galla oragyna gatnaşan ähli adamlara tüýs ýürekden minnetdarlyk bildirip, ussat gallaçylarymyzyň geljekde hem uly üstünlikleri gazanjakdyklaryna berk ynam bildirdi.
Sizi ak bugdaýyň şanyna bellenilýän Galla baýramy hem-de gazanan ajaýyp zähmet ýeňişiňiz bilen ýene-de bir gezek tüýs ýürekden gutlaýaryn diýip, hormatly Prezidentimiz hemmelere berk jan saglyk, maşgala abadançylygyny, ata-babalarymyzyň şöhratly daýhançylyk däplerini dowam etdirip, eziz Watanymyzyň mundan beýläk-de gülläp ösmegi ugrunda alyp barýan asylly işlerinde täze üstünlikleri arzuw etdi.
Goý, türkmen topragynda ata-babalarymyzdan miras galan ak bugdaýyň berekedi hiç haçan egsilmesin diýip, milli Liderimiz Gurbanguly Berdimuhamedow gutlagynyň ahyrynda aýtdy. Döwlet Baştutanymyz çykyşynyň ahyrynda dabara gatnaşyjylaryň el çarpyşmalary astynda kakasy Mälikguly aganyň 12 ýaşynda ýazan we 1944-nji ýylda çap edilen goşgusyndan bir bendi okady.
Agronomiýa usuly bilen tohum sepeliň.
Ýaryş gurap, köp ekeliň dänäni!
Soňra dabara gatnaşyjylaryň şatlyk-şowhuny, joşgunly el çarpyşmalar bilen hormatly Prezidentimiz ýokary netije görkezen hasyl ussatlaryna Galla baýramy mynasybetli ýörite sowgatlary gowşurdy.
Sylaga mynasyp bolanlaryň hatarynda Ahal welaýatynyň Gökdepe etrabynyň “Köpetdag” daýhan birleşiginiň kärendeçisi Guwanç Geldiýew, Ahal welaýatynyň Kaka etrabynyň Şükür bagşy adyndaky daýhan birleşiginiň kärendeçisi Sapargül Saryýewa, Ahal welaýatynyň Baharly etrabynyň “Kerim dag” daýhan hojalygynyň ýolbaşçysy Kerim Babaýew, Balkan welaýatynyň Bereket etrabynyň “Türkmenistan” daýhan birleşiginiň kärendeçisi Nurly Gulatarow, Balkan welaýatynyň Serdar etrabynyň “Purnuwar” daýhan birleşiginiň kärendeçisi Habypýar Taňryberdiýew, Balkan welaýatynyň Bereket etrabynyň Magtymguly adyndaky daýhan birleşiginiňm mülkdary Baýmyrat Döwlenow, Daşoguz welaýatynyň Akdepe etrabynyň “Babadaýhan” daýhan birleşiginiň kärendeçisi Aşyrmuhammet Söýünow, Daşoguz welaýatynyň Köneürgenç etrabynyň “Pagtaçy” daýhan birleşiginiň kärendeçisi Maýa Kakabaýewa, Senagatçylar we telekeçiler birleşmesiniň agzasy, Daşoguz welaýatynyň Boldumsaz etrabynyň “Zähmetkeş” daýhan birleşiginiň kärendeçisi Nurgeldi Gurbanbaýew, Lebap welaýatynyň Galkynyş etrabynyň “Azatlyk” daýhan birleşiginiň kärendeçisi Nury Abaýew, Lebap welaýatynyň Garabekewül etrabynyň “Lebap” daýhan birleşiginiň kärendeçisi Maral Gurbanowa, Türkmenistanyň Senagatçylar we telekeçiler birleşmesiniň agzasy, Lebap welaýatynyň Serdarabat etrabynyň “Ýunus daýhan” daýhan hojalygynyň ýolbaşçysy Ýunus Abdullaýew, Mary welaýatynyň Wekilbazar etrabynyň “Çarlakýap” daýhan birleşiginiň kärendeçisi Sülgün Gaýypowa, Mary welaýatynyň Türkmengala etrabynyň “Türkmenistan” daýhan birleşiginiň kärendeçisi Taýgeldi Orazgeldiýew, Mary welaýatynyň Ýolöten etrabynyň “Rahat” daýhan birleşiginiň kärendeçisi Jumaguly Ýakubow bar.
Hormatly Prezidentimiziň şa sowgadyna mynasyp bolan daýhanlar öz zähmetine ýokary baha berendigi, oba hojalygynyň ösdürilmegi, ýerlerde döwrebap ýaşaýyş-durmuş düzüminiň kemala getirilmegi ugrunda yzygiderli alada edýändigi üçin döwlet Baştutanymyza tüýs ýürekden hoşallyk bildirip, mähriban Watanymyzyň gülläp ösmeginiň, ykdysady kuwwatynyň artmagynyň bähbidine öňde goýulýan wezipeleri üstünlikli ýerine ýetirmek ugrunda mundan beýläk-de ýadawsyz zähmet çekjekdiklerine ynandyrdylar.
Soňra hormatly Prezidentimiz Gurbanguly Berdimuhamedow Aşgabadyň atçylyk sport toplumynyň baş binasynyň iç tarapyndaky toý meýdançasyna geldi. Bu ýerde hormatly Prezidentimize Galla baýramy mynasybetli hem-de türkmen gallaçylarynyň çuňňur hoşallygynyň nyşany hökmünde ýurdumyzyň oba hojalyk toplumynyň işgärleriniň adyndan 2013-nji ýylda doglan we Peleňiň nesil ugruna degişli bolan Parad hem-de Melhem atly bedewleriň nesli mele reňkli Gallaçy atly ajaýyp ahalteke bedewi sowgat berildi.
Döwlet Baştutanymyz sowgat berlen bedewiň ýanyna baryp, halkymyzyň asylly däbine görä atyň boýnuna alaja dakdy. Bedew özüne bildirilýän hormata hoşallygyň alamaty hökmünde aýaklary bilen ýer peşäp, milli Liderimize birnäçe gezek başyny atdy. Munuň özi bedew bilen ynsanyň ýürekdeşliginiň, hormatly Prezidentimiziň atlara goýýan aýratyn sarpasyna bildirilýän hoşallygyň aýdyň mysaldyr.
Soňra hormatly Prezidentimiz Gurbanguly Berdimuhamedow Gallaçy atly bedewe atlanyp, aýlawyň meýdançasyna çykdy hem-de düşbi bedew bilen maýdalyna gezim etdi.
Ýurdumyzda giňden bellenilýän we uly dabaralara beslenen Galla baýramynyň paýtagtymyzyň atçylyk sport toplumynda geçirilmeginde aýratyn many bardyr. Çünki ahalteke bedewi we altynsow ak bugdaý türkmen halkynyň bahasyz baýlygy we onuň belent buýsanjy bolup durýar.
Toplumyň münberlerini dolduryp oturan tomaşaçylar bu görnüşleri uly gyzyklanma bilen synladylar. Ussat çapyksuwar hökmünde ykrar edilen hormatly Prezidentimiz bedewe erk etmegiň ussatlygyny görkezdi. Düşbi bedew çapyksuwaryň emrini birkemsiz ýerine ýetirdi. Milli Liderimiz Gallaçy atly bedew bilen gezelenji tamamlap, toplumyň münberine tarap ugrady.
Dabara baýramçylyk mynasybetli guralan at çapyşyklary bilen dowam etdi. Asyrlaryň dowamynda türkmen toýlary şowhunly at çapyşyklary bilen utgaşdyrylýar.
Tomaşaçylar saýlama bedewleriň çapyşyklaryna uly gyzyklanma bilen syn etdiler. Türkmen halkynyň döreden we öçmejek şöhratyna öwrülen owadan hem-de ýyndam bedewler halkymyzyň diliniň senasy bolmak bilen, çekeleşikli çapyşyklary bilen tomaşaçylarda uly gyzyklanma döretdi.
Mälim bolşy ýaly, ahalteke bedewleri ähli döwürlerde türkmen halkynyň durmuşynyň bir bölegine, wepaly gardaşyna öwrüldi. Ahalteke bedewlerine aýratyn gadyr goýýan we at çapmagyň ussady döwlet Baştutanymyzyň ýadawsyz tagallasy netijesinde, Berkarar döwletimiziň bagtyýarlyk döwründe ýurdumyzda atçylyk we atçylyk sporty täze belentliklere çykdy. Ady rowaýata öwrülen bedewlere halk söýgüsini siňdiren hormatly Prezidentimiz Gurbanguly Berdimuhamedow ahalteke bedewleriniň abraýyny we şöhratyny artdyrmak, dünýäde şöhratly pederlerimiziň döreden atçylyk sungatyny giňden wagyz etmek baradaky aladany döwlet syýasatynyň möhüm ugruna öwürdi.
Hormatly Prezidentimiz “ganatly bedewlere” ajaýyp eserleri bagyş etdi. Olaryň hatarynda şu ýylyň bahar aýynda neşir edilen “Gadamy batly bedew” atly kitaby bar. Häzirki döwürde bedewler oňyn ösüşiň ýola bilen gadam urýan we durmuşyň ähli ulgamlarynda uly üstünlikler gazanýan Watanymyzyň döredijilik kuwwatynyň nyşanyna öwrüldi.
Bu gün dürli aralyklara çapyşyklaryň 5-si geçirildi. Şolaryň her biri tomaşaçylarda ýatdan çykmajak täsirler galdyrdy. Çapuw ýodasynda ýerleý uçýan guşlary ýatladýan bedewleriň çapyşygyna haýran galmazlyk mümkin däl. Şunuň ýaly ajaýyp görnüşler adamlaryň bedewlere bolan buýsanjyny goşalandyrýar. Öz hünärine berlen çapyksuwarlar bedewler bilen bir bitewi sazlaşygy emele getirip, ýeňiş gazanmak ugrunda yhlaslaryny gaýgyrmadylar.
Galla baýramy mynasybetli geçirilen birinji çapyşykda bedewler 1000 metr aralykdan güýç synanyşdylar. Örän çekeleşikli we gyzykly geçen bäsleşikde Türkmenistanyň Prezidentiniň ahalteke atçylyk toplumyna degişli bedewler öz ýyndamlygyny görkezip, baýrakly orunlaryň üçüsini hem eýeledi. Başgaça aýdylanda, Märkew atly dor bedewi bu aralygy 1 minut 7 sekuntda geçip, birinji orny eýeledi. Ikinji orna Güldesse, üçünji orna hem Sadap atly bedew mynasyp boldy. Bedewleriň ikisi hem şol topluma degişlidir.
Ikinji çapyşykda hem menzil 1000 metr boldy. Onda Türkmenistanyň “Senagat” paýdarlar täjirçilik bankynyň Gülbahar atly bedewi bellenilen aralygy 1 minut 7,2 sekuntda geçip, birinji orny eýeledi. Bu bäsleşikde Türkmenistanyň Prezidentiniň ahalteke atçylyk toplumyna degişli Nepis atly bedew ikinji, Türkmenistanyň Migrasiýa gullugyna degişli Merdem bolsa üçünji orna düşdüler.
Üçünji çapyşykda Türkmenistanyň Prezidentiniň ahalteke atçylyk toplumyna degişli Jebel atly gurtmele bedew 1200 metr aralygy 1 minut 20,4 sekuntda geçip, birinji orna mynasyp boldy. Bu çapyşykda Türkmenistanyň Goranmak ministrligine degişli Erkin ikinji, D.Durdyýewiň hojalygyna degişli Dorguş bolsa üçünji baýrakly orna mynasyp boldy.
Dördünji çapyşykda bedewler 1200 metr aralyga goşuldylar. Şonda Içeri işler ministrligine degişli Şaýadym bu aralygy 1 minut 20,7 sekuntda geçip, ýeňiji boldy. Bu çapyşykda Aşgabat şäheriniň Ruhabat etrabynyň Garadaşaýak ýaşaýyş toplumyna degişli Nesip ikinji, Türkmenistanyň Döwlet gümrük gullugyna degişli Tamaly bolsa üçünji orny eýeledi.
Baýramçylyk at çapyşygynyň jemleýji tapgyrynda dört we ulyýaşar atlaryň onusy Türkmenistanyň Prezidentiniň baş baýragyny almak ugrunda 1200 metr aralykdan güýç synanyşdylar. Bu çekeleşikli geçen çapyşykda baýrakly orunlara Türkmenistanyň Prezidentiniň ahalteke atçylyk toplumynda seýislenýän bedewler mynasyp boldy. Has takygy, Angar atly dor bedew bellenilen aralygy 1 minut 20,1 sekuntda geçip, ýeňiji boldy. Perman ikinji we Gökýaýla atly bedew bolsa üçünji baýrakly orna mynasyp boldy.
Soňra baýramçylyk çapyşyklarynyň ýeňijilerine hormatly Prezidentimiz Gurbanguly Berdimuhamedowyň adyndan sowgatlar gowşuryldy.
Bäşinji çapyşygyň ýeňijisine döwlet Baştutanymyzyň baş baýragy bolan awtoulagyň açary gowşuryldy.
Galla baýramy mynasybetli guralan dabaralar tamamlanandan soň, hormatly Prezidentimiz ýurdumyzyň ýolbaşçy düzümlerinden gutlaglary kabul etdi.
Soňra milli Liderimiz baýramçylyga gatnaşyjylar bilen mähirli hoşlaşyp, bu ýerden ugrady.
Agşamlyk Aşgabadyň atçylyk sport toplumynda ýurdumyzyň medeniýet we sungat ussatlarynyň Galla baýramy mynasybetli aýdym-sazly çykyşlary ýaýbaňlandyryldy. Ol baýramçylygyň jemleýji tapgyryna öwrüldi.
Şeýle hem dabara gatnaşyjylar hormatly Prezidentimiz Gurbanguly Berdimuhamedowyň adyna Ýüzlenme kabul etdiler. Onda oba hojalyk toplumynyň ösdürilmegi, pudagyň zähmetkeşleriniň abadançylygy hakynda hemmetaraplaýyn alada edýändigi üçin milli Liderimize hoşallyk bildirilip, döwlet Baştutanymyza berk jan saglyk, uzak ömür, ýurdumyzyň gülläp ösmeginiň, türkmen halkynyň bagtyýar durmuşynyň bähbidine alyp barýan asylly işlerinde üstünlik arzuw edildi.
Baýramçylyk çäreleri tutuş ýurdumyzy gurşap aldy. Olarda Berkarar döwletimiziň bagtyýarlyk döwrüniň döredijilik ruhuny, türkmen halkynyň agzybirligini, milletiň ekerançylygyň köp asyrlyk däplerini ösdürip gelen şöhratly pederleriniň mirasyna bolan ygrarlylygyny özünde jemleýän aýdym-sazlar belentden ýaňlandy.