Şu ýylyň 13-14-nji oktýabrynda „Awaza“ Milli syýahatçylyk zolagynda hazarýaka döwletleriň portlarynyň ýolbaşçylarynyň bäştaraplaýyn bilelikdäki mejlisini geçirmäge taýýarlyk görülýär.

Sebitiň portlarynyň ýolbaşçylarynyň mejlisi 2009-njy ýyldan bäri geçirilýär. 2015-nji ýylda Eýranyň Amirabat portunda geçirilen ýedinji bäştaraplaýyn mejlisde nobatdaky duşuşygy Türkmenistanda geçirmek karar edildi.

Onuň gün tertibine gämi gatnawy, deňizde ýük daşamak, deňizde gämileriň howpsuzlygyny üpjün etmek, şol sanda önümçilik infrastrukturasyny döwrebaplaşdyrmagyň, maddy taýdan täzeden enjamlaşdyrmagyň, ulag gämilerine hyzmat etmek ulgamyna döwrebap tehnologiýalary ornaşdyrmagyň hasabyna hazar portlarynyň mümkinçiligini ýokarlandyrmak we beýleki ugurlardaky hyzmatdaşlygyň meseleleri giriziler.