I. 2010-njy ýylyň 25-nji sentýabrynda kabul edilen «Agyz suwy hakynda» Türkmenistanyň Kanunyna (Türkmenistanyň Mejlisiniň Maglumatlary, 2010 ý., № 3, 60-njy madda; 2017 ý., № 2, 80-nji madda) şu üýtgetmeleri we goşmaçany girizmeli:

1) 3-nji maddanyň dördünji tesiminde, 4-nji maddanyň ikinji tesiminde, 15-nji maddanyň soňky tesiminde, 17-nji maddanyň birinji we ikinji böleklerinde, 19-njy maddanyň bäşinji we altynjy böleklerinde we 22-nji maddanyň bäşinji böleginde «ýerine ýetiriji häkimiýetiň ýerli edaralaryna», «ýerine ýetiriji häkimiýetiň ýerli», «ýerine ýetiriji häkimiýetiň ýerli edaralarynyň» we «Ýerine ýetiriji häkimiýetiň ýerli» diýen sözleri degişlilikde «agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birliklerine», «agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri», «agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleriniň» we «Agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri» diýen sözlere çalşyrmaly;

2) 5-nji maddanyň mazmunyny şu görnüşde beýan etmeli:

«1. Agyz suwy we agyz suw üpjünçiligi babatda döwlet düzgünleşdirmesi Türkmenistanyň Ministrler Kabineti, agyz suwy we agyz suw üpjünçiligi babatda ygtyýarly döwlet edaralary tarapyndan Türkmenistanyň kanunçylygynda bellenen tertipde amala aşyrylýar.

2. Agyz suwy we agyz suw üpjünçiligi babatda ygtyýarly döwlet edaralaryna şu aşakdakylar degişlidir:

agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri;

sanitariýa-epidemiologiýa gözegçiligi babatda ýerine ýetiriji häkimiýetiň ygtyýarly edarasy;

standartizasiýa we metrologiýa boýunça ygtyýarly döwlet edarasy;

tebigaty goramak babatda ýerine ýetiriji häkimiýetiň ygtyýarly edarasy;

oba we suw hojalygy babatda ýerine ýetiriji häkimiýetiň ygtyýarly edarasy;

geologiýa babatda ýerine ýetiriji häkimiýetiň ygtyýarly edarasy.»;

3) 7-nji maddany şu görnüşde beýan etmeli:

«7-nji madda. Agyz suwy we agyz suw üpjünçiligi babatda ygtyýarly döwlet edaralarynyň ygtyýarlyklary

1. Agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleriniň ygtyýarlyklaryna şu aşakdakylar degişlidir:

- degişli çäklerde ilaty agyz suwy bilen üpjün etmek üçin suw üpjünçilik ulgamlarynyň ösüşiniň esasy ugurlaryna toplumlaýyn seljermäni we çaklamany geçirmek;

- agyz suwuna pudaklaryň we çäkleriň zerurlyklaryny üpjün etmek maksady bilen suw geçiriji-lagym hojalygynyň birleşikleriniň we kärhanalarynyň işlerini utgaşdyrmak;

- agyz suw üpjünçilik we suw sowujy ulgamlaryndan peýdalanmagyň hyzmatlaryna nyrhlary emele getirmek üçin usuly düzgünnamalary (gollanmalary), şeýle hem agyz suw üpjünçiligi we suw sowujy desgalarynyň ulanylyşynyň hiline, düýpli abatlanylyşyna we durkunyň täzelenilişine tehniki şertleri hem-de döwlet talaplaryny işläp taýýarlamak we bellenen tertipde Türkmenistanyň Ministrler Kabinetiniň garamagyna bermek;

- agyz suw üpjünçiliginiň inženerçilik ulgamlarynyň durnukly işlemegini üpjün etmäge ýardam etmek;

- öz ygtyýarlyklarynyň çäklerinde Türkmenistanyň suw kanunçylygynyň ýerine ýetirilmegini guramak, tebigaty goraýyş çärelerini işläp taýýarlamak, olary durmuşa geçirmek, inženerçilik ulgamlaryna we gurluşlaryna zeper ýeten mahalynda tebigy betbagtçylyklaryň we heläkçilikleriň zyýanly netijelerini ýok etmäge gatnaşmak;

- ylmy-tehniki ösüşiň gazananlaryny agyz suw üpjünçilik ulgamlarynyň gurluşygyna, durkunyň täzelenilişine we ulanylyşyna ornaşdyrmak;

- agyz suwunyň hiliniň döwlet standartlarynyň talaplaryna, sanitariýa kadalaryna we düzgünlerine laýyklygyna gözegçiligi üpjün etmek we kämilleşdirmek;

- agyz suw üpjünçiliginiň maliýeleşdirilmegini kämilleşdirmegiň meseleleri boýunça teklipleri işläp taýýarlamak we bellenen tertipde Türkmenistanyň Ministrler Kabinetiniň garamagyna bermek;

- Türkmenistanyň içinde hem-de onuň çäkleriniň daşynda üpjün edijiler bilen göni aragatnaşyklary ýola goýmak we maddy-tehniki serişdeler we reagentler bilen üpjün etmek barada şertnamalary baglaşmak;

- agyz suw üpjünçilik guramalary üçin hünärmenleriň taýýarlanylmagyny, işgärleriň hünär derejesiniň ýokarlandyrylmagyny we olaryň gaýtadan taýýarlanylmagyny guramak;

- degişli ugurly daşary ýurtly ýuridik şahslary we halkara guramalary bilen ylmy-tehniki hyzmatdaşlygy amala aşyrmak;

- agyz suwunyň hilini gowulandyrmak maksady bilen ylmy barlaglaryň we tehnologik işläp taýýarlamalaryň netijeleriniň ulanylmagyny utgaşdyrmak, ýardam etmek we olary ýaýratmak;

- agyz suw üpjünçiliginiň guramalary üçin reagentleri, enjamlary, abzallary we materiallary öndürmegiň geljekki ösüşi boýunça teklipleri taýýarlamak we olaryň durmuşa geçirilmegine ýardam etmek;

- edara tabynlygyndaky çäklerde ilaty sanitariýanyň talaplaryna laýyk gelýän agyz suwy bilen zerur mukdarda üpjün etmek;

- agyz suw üpjünçilik ulgamlaryny ösdürmek boýunça ýerli shemalary, maksatnamalary we çäreleriň meýilnamalaryny işläp taýýarlamak we tassyklamak;

- suw üpjünçilik çeşmeleriniň bardygy we olaryň ýagdaýy, ilaty agyz suwy bilen talap edilýän mukdarda we hilde kanagatlandyrmak mümkinçilikleri, agyz suw üpjünçilik ulgamlarynyň ygtybarlylygy hakyndaky maglumatlary hasaba almak we olara baha bermek;

- sanitariýa gorag zolaklaryny guramak we suw üpjünçilik çeşmelerini rejeli peýdalanmak boýunça çäreleri geçirmek;

- ilatyň agyz suw üpjünçiligi, agyz suwunyň hilini gowulandyrmak we oňa gözegçilik etmek boýunça işleri meýilleşdirmek, maliýeleşdirmek, maddy-tehniki taýdan üpjün etmek;

- Türkmenistanda suw üpjünçilik ulgamlarynyň ulanylmagyny düzgünleşdirýän kadalaşdyryjy resminamalaryň esasynda agyz suw üpjünçilik ulgamlaryndan peýdalanmagyň ýerli düzgünlerini tassyklamak;

- agyz suwunyň sarp edilişini hasaba almagy amala aşyrmak;

- agyz suwunda howply hapalanmalar bar bolan mahalynda ondan peýdalanmagy wagtlaýynça gadagan etmek ýaly sanitariýa-epidemiologiýa gözegçiligi babatda ýerine ýetiriji häkimiýetiň ygtyýarly edarasynyň netijenamalary esasynda çözgütleri kabul etmek, şeýle hem ilaty agyz suwy bilen üpjün etmek ulgamlaryndaky düzgün bozulmalary aradan aýyrmak we agyz suwunyň hiline bolan kadalaşdyryjy talaplary berjaý etmek üçin zerur çäreleri görmek;

- edara tabynlygyndaky çäklerde suw goraýyş çäreleriniň ýerine ýetirilmegini guramak we gözegçilik etmek, suw üpjünçilik çeşmeleriniň we suw geçirijileriniň sanitariýa gorag zolaklarynyň düzgünleriniň bozulma halatlarynyň öňüni almak boýunça çäreleri görmek;

- sanitariýa-epidemiologiýa gözegçilik barlagy babatda ýerine ýetiriji häkimiýetiň ygtyýarly edarasy bilen ylalaşylmagy boýunça, adatdan daşary ýagdaýlarda (tebigy betbagtçylyk, suw üpjünçilik çeşmelerinde suwuň hapalanmagynyň howply derejeleriniň ýüze çykmalary we beýlekiler) agyz suw üpjünçilik ulgamlaryny ulanmagyň mümkinçilikleri we şertleri hakynda çözgütleri kabul etmek;

- ilaty agyz suwunyň hili, ony sarp etmegiň kadalary we tygşytlamagyň usullary, tölegiň tertibi hakynda zerur maglumat bilen üpjün etmek;

- Türkmenistanyň kanunçylygyna laýyklykda agyz suwy we agyz suw üpjünçiligi babatda beýleki meseleleri çözmek.

2. Agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleriniň önümçilik borçlary:

- baglaşylan şertnamalara laýyklykda abonentleriň suw üpjünçiligini, akdyrylýan lagym suwlaryň kabul edilmegini, sowulmagyny we arassalanmagyny üpjün edýärler;

- agyz suwunyň howpsuzlygyny we zyýansyzlygyny, onuň standartlara we gigiýenanyň talaplaryna laýyklygyny üpjün edýärler;

- suw geçiriş-lagym ulgamlarynyň, suw alyjy kolonkalarynyň we olaryň hasabynda durýan beýleki desgalaryň ýagdaýyna we ulanylyşyna yzygiderli gözegçilik barlagyny amala aşyrýarlar;

- agyz suwunyň ýitgileriniň garşysyna meýilnamalaýyn göreş alyp barýarlar, daşky ulgamlarda suw syzmalaryny ýüze çykarýarlar, abonentleriň içki ulgamlaryndaky suw syzmalaryna gözegçiligi amala aşyrýarlar, agyz suwunyň goýberiliş nyrhlarynyň berjaý edilişine, lagym suwlaryň akdyrylyşyna we hapalaýjy maddalary dökmegiň kada görkezijilerine gözegçilik edýärler;

- suw ölçeýji enjamlary (suw ölçeýjileri) bolmadyk abonentlerde suwy sarp edijileriň düzümine we sanyna barlag geçirýärler;

- statistika babatda ýerine ýetiriji häkimiýetiň ygtyýarly edarasy tarapyndan bellenilen görnüşler boýunça sarp edilýän suwuň mukdarynyň hasabyny we hasabatlylygyny alyp barýarlar.

3. Sanitariýa-epidemiologiýa gözegçiligi babatda ýerine ýetiriji häkimiýetiň ygtyýarly edarasynyň agyz suwy we agyz suw üpjünçiligi bilen baglanyşykly ygtyýarlyklaryna şu aşakdakylar degişlidir:

- ilaty agyz suwy bilen üpjün etmek boýunça döwlet syýasatyny durmuşa geçirmek;

- agyz suw üpjünçiligi çygrynda Türkmenistanyň kadalaşdyryjy hukuk namalarynyň taslamalarynyň işlenip taýýarlanylmagyna gatnaşmak;

- agyz suw üpjünçiliginiň merkezleşdirilen ulgamlarynyň ösüşini, agyz suwunyň howpsuzlygyny üpjün etmek we onuň hilini gowulandyrmak boýunça maksatlaýyn döwlet, döwletara we sebitara maksatnamalarynyň işlenip taýýarlanylmagyna gatnaşmak;

- suw üpjünçilik çeşmeleriniň we agyz suwunyň zyýansyzlygynyň we howpsuzlygynyň ölçeglerini belleýän gigiýena kadalarynyň we düzgünleriniň, sanitariýa-epidemiologiýa kadalarynyň, şeýle hem agyz suw üpjünçilik ulgamlaryna, materiallara, reagentlere, enjamlara sanitariýa-gigiýena we epidemiologiýa talaplaryny işläp taýýarlamak, tassyklamak we herekete girizmek;

- agyz suw üpjünçilik ulgamlary taslananda, gurlanda we ulanylanda, şeýle hem sanitariýa gorag zolaklarynda suw üpjünçilik çeşmeleriniň hapalanmagynyň öňüni almak we ýok etmek boýunça çäreler geçirilende döwlet sanitariýa-epidemiologiýa gözegçilik barlagyny amala aşyrmak;

- agyz suw üpjünçiliginiň merkezleşdirilen we merkezleşdirilmedik ulgamlarynda agyz suwunyň hiline döwlet sanitariýa-epidemiologiýa gözegçilik barlagyny amala aşyrmak;

- standartlaryň, sanitariýa kadalarynyň we düzgünleriniň talaplaryna laýyklykda agyz suwunyň hiline gözegçiligi kämilleşdirmek;

- çüýşä guýulýan agyz suwunyň we standart gaplardaky agyz suwunyň güwälendirilmesini geçirmek;

- agyz suwunyň hilini gowulandyrmak maksady bilen ylmy barlaglaryň we tehnologik işläp taýýarlamalaryň netijelerini peýdalanmagy utgaşdyrmak, ýardam etmek we olary ýaýratmak; - agyz suw üpjünçilik guramalary üçin hünärmenleriň taýýarlanylmagyna, işgärleriň hünär derejesiniň ýokarlandyrylmagyna we olaryň gaýtadan taýýarlanylmagyna gatnaşmak;

- degişli ugruň daşary ýurtly ýuridik şahslary we halkara guramalary bilen ylmy-tehniki hyzmatdaşlygy amala aşyrmak;

- agyz suw üpjünçilik ulgamlaryny taslamalaşdyrmak kadalarynyň taslamalary boýunça netijenamalary taýýarlamak;

- agyz suwy öndürilende we gaýtadan işlenilende täze himiki maddalaryň, serişdeleriň we usullaryň ulanylmagyna garamak we rugsat bermek.

4. Standartizasiýa we metrologiýa boýunça ygtyýarly döwlet edarasynyň agyz suwy we agyz suw üpjünçiligi babatda ygtyýarlyklaryna şu aşakdakylar degişlidir:

- ýerine ýetiriji häkimiýetiň degişli edaralary tarapyndan taslamalary bellenilen tertipde berilýän agyz suwy üçin standartlary tassyklamak we herekete girizmek;

- standartizasiýa we agyz suwuna metrologik gözegçiligi üpjün etmek babatda daşary ýurtly ýuridik şahslary we halkara guramalary bilen ylmy-tehniki hyzmatdaşlygy amala aşyrmak.

5. Tebigaty goramak babatda ýerine ýetiriji häkimiýetiň ygtyýarly edarasynyň agyz suwy we agyz suw üpjünçiligi bilen baglanyşykly ygtyýarlyklaryna şu aşakdakylar degişlidir:

- içimlik suw geçirijileriniň we suw üpjünçiliginiň çeşmeleriniň sanitariýa gorag zolaklarynyň hukuk düzgünini bellemek;

- suw serişdeleriniň hapalanmagynyň, azalmagynyň öňüni almak we ýok etmek, olary rejeli we tygşytly peýdalanmak boýunça çäreleri görmek bilen, suw kanunçylygynyň talaplarynyň, suw üpjünçilik çeşmeleriniň sanitariýa gorag zolaklarynyň düzgüniniň berjaý edilişine döwlet gözegçiligini guramak we amala aşyrmak;

- agyz suw üpjünçilik ulgamlaryny ösdürmek, agyz suwunyň howpsuzlygyny üpjün etmek we hilini gowulandyrmak boýunça maksatlaýyn döwlet, döwletara we sebitara maksatnamalarynyň işlenip taýýarlanylmagyna gatnaşmak we döwlet syýasatynyň durmuşa geçirilmegine ýardam etmek;

- ilatyň agyz suw üpjünçiligi çygrynda Türkmenistanyň kadalaşdyryjy hukuk namalarynyň taslamalarynyň işlenip taýýarlanylmagyna gatnaşmak;

- degişli ugruň daşary ýurtly ýuridik şahslary we halkara guramalary bilen ylmy-tehniki hyzmatdaşlygy amala aşyrmak.

6. Oba we suw hojalygy babatda ýerine ýetiriji häkimiýetiň ygtyýarly edarasynyň agyz suwy we agyz suw üpjünçiligi çygrynda ygtyýarlyklaryna şu aşakdakylar degişlidir:

- oba ilatyny agyz suwy bilen üpjün etmek boýunça döwlet syýasatyny durmuşa geçirmek;

- oba ilatyny agyz suwy bilen üpjün etmegiň merkezleşdirilen ulgamlarynyň ösüşi boýunça maksatlaýyn döwlet, döwletara we sebitara maksatnamalarynyň işlenip taýýarlanylmagyna we durmuşa geçirilmegine gatnaşmak;

- oba suw üpjünçilik desgalarynyň ýagdaýyny gowulandyrmagyň ykdysady mehanizmini işläp taýýarlamak we kämilleşdirmek;

- sanitariýa gorag zolaklarynda suw üpjünçilik çeşmeleriniň hapalanmagynyň öňüni almak we ony aradan aýyrmak boýunça zerur çäreleri geçirmek;

- agyz suw üpjünçilik ulgamlarynyň durnukly işlemegini üpjün etmek boýunça edara tabynlygyndaky edaralaryň işini utgaşdyrmak;

- Türkmenistanyň Döwlet býujetinden we býujetden daşary gaznalar tarapyndan maliýeleşdirilýän taslama-gözleg we ylmy-barlag işleriniň ýerine ýetirilmegini üpjün etmek; - degişli ugruň daşary ýurtly ýuridik şahslary we halkara guramalary bilen ylmy-tehniki hyzmatdaşlygy amala aşyrmak. 7. Geologiýa babatda ýerine ýetiriji häkimiýetiň ygtyýarly edarasynyň agyz suwy we agyz suw üpjünçiligi bilen baglanyşykly ygtyýarlyklaryna şu aşakdakylar degişlidir:

- ýerasty süýji suwlaryň gorlarynyň döwlet hasaba alnyşy;

- ýerasty suwlaryň azalmakdan we hapalanmakdan goralmagyna döwlet gözegçiligi;

- ýerasty süýji suwlaryň hiline we ulanylyşyna birsyhly gözegçilik esasynda olaryň ýagdaýynyň monitoringi;

- ýerasty suwlaryň ýataklaryny Döwlet suw kadastryna girizmek;

- ýerasty süýji suwlary ulanmak we goramak bilen baglanyşykly taslamalary seljermek we ýerasty suwlara degişli beýleki suw hojalyk meseleleriniň çözülmegine gatnaşmak;

- ýerasty süýji suwlaryň ýataklaryny gözlemek, agtarmak we ulanmak bilen baglanyşykly işleri ygtyýarlylandyrmak.»;

4) 8-nji maddany şu görnüşde beýan etmeli:

«8-nji madda. Agyz suwy we agyz suw üpjünçiligi babatda ýerli öz-özüňi dolandyryş edaralarynyň wezipeleri

Agyz suwy we agyz suw üpjünçiligi babatda ýerli öz-özüňi dolandyryş edaralarynyň wezipelerine şu aşakdakylar degişlidir:

- ilaty agyz suwunyň hili we ony ulanmagyň bellenilen kadalary, tölegiň tertibi hakynda zerur maglumat bilen üpjün etmek;

- agyz suwunda howply hapalanmalar bar bolan mahalynda ondan peýdalanmagy wagtlaýynça gadagan etmek barada agyz suwy we agyz suw üpjünçiligi babatda ygtyýarly döwlet edaralaryna we ilata habar bermek;

- agyz suw üpjünçiliginiň oba ýerlerindäki ulgamlaryny taslamalaşdyrmak, gurmak we ulanmak boýunça işler babatda teklipleri bermek;

- agyz suw üpjünçiliginiň merkezleşdirilen we merkezleşdirilmedik ulgamlarynyň işi bozulsa we (ýa-da) berilýän agyz suwunyň hili degişli kadalaşdyryjy talaplara laýyk gelmedik mahalynda, agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birliklerine habar bermek we degişli çäreleri görmek;

- agyz suw üpjünçilik ulgamlarynyň we çeşmeleriniň bilkastlaýyn hapalanmagynyň ýa-da olara zyýan ýetirilmeginiň öňüni almak üçin goşmaça gorag çärelerini geçirmek boýunça teklipleri taýýarlamak;

- Türkmenistanyň kanunçylygyna laýyklykda beýleki wezipeleri ýerine ýetirmek.»;

5) 11-nji maddanyň dördünji bölegini şu görnüşde beýan etmeli:

«4. Agyz suw üpjünçiliginiň oba ýerlerindäki ulgamlaryny taslamalaşdyrmak, gurmak we ulanmak boýunça işler agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleriniň we ýerli öz-özüňi dolandyryş edaralarynyň üstüne ýüklenýär.»;

6) 14-nji maddada:

üçünji bölegi şu görnüşde beýan etmeli:

«3. Fiziki şahslaryň jemgyýetçilik ýerlerinde (menzillerde, seýilgählerde, suwa düşülýän ýerleriň kenarlarynda we beýleki ýerlerde) bolan döwründe, şeýle hem ulag serişdelerinde üç sagatdan artyk ýol geçen mahalynda olar agyz suwy bilen, şol sanda mugt, ady agzalan desgalaryň eýeleri tarapyndan üpjün edilýär.»;

şu mazmunly bölegi goşmaly:

«4. Raýatlaryň aýratyn toparlaryna we olaryň maşgala agzalaryna agyz suwundan ýeňillikli ýa-da mugt peýdalanmaga bolan hukuk Türkmenistanyň kanunçylygynda bellenen tertipde berilýär.»;

7) 16-njy maddanyň birinji tesimini şu görnüşde beýan etmeli:

«Sarp edijilere agyz suwuny bermegiň bellenilen düzgüniniň üýtgemegine getiren, agyz suw üpjünçiliginiň merkezleşdirilen we merkezleşdirilmedik ulgamlarynyň işi bozulan we (ýa-da) olaryň hiliniň agyz suw üpjünçiliginiň bellenilen kadalaryň talaplaryna laýyk gelmedik mahalynda, agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri we ýerli öz-özüňi dolandyryş edaralary öz ygtyýarlyklaryna laýyklykda, şeýle hem agyz suw üpjünçilik ulgamlarynyň eýeleri we guramalary şular ýaly ýagdaýlar üçin agyz suwuny sarp etmegiň kadalary bilen bellenilen mukdarda agyz suwuny sarp edijilere bermek boýunça çäreleri görmäge borçludyrlar.»;

8) 18-nji maddada: üçünji bölegiň ikinji tesiminde «jemagat hojalygy babatda ýerine ýetiriji häkimiýetiň ygtyýarly edaralary» diýen sözleri «agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri» diýen sözlere çalşyrmaly; bäşinji bölegiň birinji tesiminde «gurluşygy dolandyryş ygtyýarly döwlet edarasy» diýen sözleri «ýerine ýetiriji häkimiýetiň degişli edarasy» diýen sözlere çalşyrmaly;

9) 22-nji maddanyň dördünji böleginde «jemagat hojalygy babatda ýerine ýetiriji häkimiýetiň ygtyýarly edaralary» diýen sözleri «agyz suwy we agyz suw üpjünçiligi babatda ýerine ýetiriji häkimiýetiň ýerli edaralarynyň düzüm birlikleri» diýen sözlere çalşyrmaly;

10) 24-nji maddanyň ikinji bölegini güýjüni ýitiren diýip ykrar etmeli;

11) 25-nji maddanyň mazmunyny şu görnüşde beýan etmeli:

«1. Agyz suwunyň we lagym ulgamyndan peýdalanmak boýunça hyzmatlaryň nyrhlary Türkmenistanyň Ministrler Kabineti tarapyndan bellenilýär.

2. Ilatyň agyz suwunyň möçberleri we ony ulanmagyň tertibi Türkmenistanyň Ministrler Kabineti tarapyndan tassyklanylýar.».

II. Şu Kanun 2019-njy ýylyň 1-nji ýanwaryndan herekete girizilýär.

Türkmenistanyň Prezidenti
Gurbanguly BERDIMUHAMEDOW

Aşgabat şäheri. 2018-nji ýylyň 1-nji dekabry.