Ýerewandaky Rus-ermeni uniwersitetiniň stadionynda Ermenistanyň ýokary okuw mekdeplerinde bilim alýan türkmen talyplarynyň gatnaşmagynda futbol ýaryşy geçirildi.

Türkmenistanyň diplomatik wekilhanasynyň guran talyplar ýaryşy sagdyn durmuş ýörelgesini wagyz etmäge gönükdirilip ýurdumyzda geçirilýän köpçülikleýin bedenterbiýe-sagaldyş we sport çäreleriniň biraýlygyna gabatlandy.

Ýaryş tamamlanandan soň ýeňiş gazanan toparyň agzalaryna ýadygärlik sowgatlary gowşuryldy. Türkmen myhmansöýerliginiň däplerine görä, oňa gatnaşanlar we myhmanlar üçin sahawatly desterhan ýazyldy.