Türkmenistanyň Daşary işler ministrliginiň Halkara gatnaşyklary institutynda ýurdumyzyň mekdepleriniň ýokary synp okuwçylarynyň arasynda «Parahatçylygyň ýaş çaparlary» atly akyl-paýhas bäsleşiginiň birinji tapgyrynyň bäşinji oýny geçirildi. Bu taslamanyň çäginde geçirilýän nobatdaky oýnuň temasy «Horezmşalar we onuň diplomatiýasy» boldy.
Esasy çäräniň, ýagny oýnuň, öňüsyrasynda oňa gatnaşjaklaryň bäsleşigiň temasy boýunça bilimlerini artdyrmak, taýýarlyk derejesini ýokarlandyrmak maksady bilen mekdep okuwçylary üçin umumy bilim sapagy geçirildi. Çagalar taryh ylymlarynyň kandidaty, Türkmenistan Ylymlar akademiýasynyň Magtymguly adyndaky dil, edebiýat we milli golýazmalar institutynyň alym kätibi Kakajan Janbekow bilen bilelikde Watanymyzyň taryh sahypalaryna syýahat etdiler.
Ýaş diňleýjiler üçin Beýik Ýüpek ýolunyň ugrunda ýerleşen Horezmşalar döwletiniň taryhy barada gyzykly gürrüň edildi. Mekdep okuwçylarynyň ünsi içeri we daşary syýasata, goňşy ýurtlar bilen gatnaşyklara, döwletdäki diplomatiýa medeniýetine we däp-dessurlaryna gönükdirildi.
Bäşinji oýna gatnaşýanlara özlerini ruhy we fiziki taýdan taýýarlamaga we goşmaça bilim almaga Türkmenistanyň Ylymlar akademiýasynyň Taryh we arheologiýa institutyna guralan gezelenç kömek etdi. Bu gezelenç parahatlygyň ýaş çaparlarynda ençeme ýatdan çykmajak täsir galdyrdy. Geçirilen çäreler netijesinde, ýokary synp okuwçylary bäsleşige gatnaşmaga doly taýýar boldular.
Taslamanyň birinji tapgyrynyň bäşinji oýnuna paýtagtymyzyň daşary ýurt dillerini çuňňur öwretmäge ýöriteleşdirilen 87-nji orta mekdebinden, Saparmyrat Türkmenbaşy adyndaky ýöriteleşdirilen mekdep-internatyndan, 16-njy orta mekdebinden 9 – 11-nji synpda okaýan 5 oglan we 3 gyz gatnaşdylar.
Türkmenistanyň Daşary işler ministrliginiň Ýewropa ýurtlary bölüminiň geňeşçisi, Türkmenistanyň adatdan daşary we doly ygtyýarly ilçisi Nurberdi Amanmyradow, taryh ylymlarynyň kandidaty, Türkmenistanyň Ylymlar akademiýasynyň Magtymguly adyndaky Dil, edebiýat we golýazmalar institutynyň alym kätibi Kakajan Janbekow we Türkmenistanyň Ylymlar akademiýasynyň Taryh we arheologiýa institutynyň baş esasy ylmy işgäri, taryh ylymlarynyň kandidaty Ata Nuryýew ygtyýarly emin agzalary boldular.
Ähli çäreler, däp boýunça, oýun üçin gurlan türkmeniň ak öýünde geçirildi. Bäsleşigiň düzgünlerine görä, sekiz gatnaşyjy başlangyç ýagdaýda Oguz hanyň hala çitilen ýyldyzynyň sekiz sany burçunyň hersi birinde ýerleşýär. Bäsleşige gatnaşýanlar soraglara jogap berýärler we her bir dogry jogapdan soňra oýunçylar bäsleşigikde ýeňiş gazanmak üçin ýyldyzyň merkezine tarap bir ädim ädýärler. Parahatçylygyň sekiz ýaş çaparyndan diňe ikisi öňe saýlanmaly. Gatnaşanlaryň hemmesiniň Watanymyzyň taryhy, diplomatiýa däpleri boýunça ýokary bilim görkezmek bilen, biri-birine mynasyp garşydaş bolup çyksalar-da, emin agzalary ýa-da oýnuň ady bilen atlandyrylyşy ýaly «Danalar geňeşi», her näçe kynam bolsa, olaryň arasyndan ýeňijileri saýlady. «Parahatçylylygyň ýaş çaparlary» taslamasynyň birinji tapgyrynyň bäşinji oýnunda Saparmyrat Türkmenbaşy adyndaky ýöriteleşdirilen mekdep-internatynyň 11-nji synp okuwçylary Arazjemal Öwezowa we Kadyrmyrat Öwezgylyjow ýeňiji boldular. Bu okuwçylar ýaryşyň ýarym finalyna gatnaşmaga hukuk gazandylar.
Oýnuň ýeňijilerine we gatnaşyjylaryna çäräniň hemaýatkärlerinden gymmatly sowgatlar, şeýle hem guramaçy okuw jaýyndan şahadatnamalar we minnetdarlyk hatlary gowşuryldy.
Ýokary synp okuwçylary üçin «Parahatçylygyň ýaş çaparlary» atly akyl-bilim bäsleşiginiň birinji tapgyrynyň bäşinji oýnuna ýakyn günlerde teletomaşaçylar milli telewideniýäniň «Miras» ýaýlymynda tomaşa edip bilerler.
Ýokary synp okuwçylary üçin «Parahatçylygyň ýaş çaparlary» atly akyl-bilim bäsleşiginiň birinji tapgyrynyň indiki, altynjy oýny şu ýylyň 29-njy martynda geçiriler. Onda sekiz oýunçydan ybarat täze topar bäsleşige girer, onuň temasy bolsa «Osman imperiýasynyň daşary syýasaty we diplomatiýasy» bolar.
Ýurdumyzyň mekdepleriniň 9 – 11-nji synp okuwçylary üçin çekeleşikli bäsleşigiň Daşary işler ministrliginiň Halkara gatnaşyklar institutynyň we bu okuw jaýynyň çägindäki Ýaş diplomatlar mekdebiniň wekilleri tarapyndan guraldy.
Bu bäsleşik ösüp gelýän ýaş nesilleriň arasyndan diplomat bolmagy arzuw edýän başarnykly we zehinli okuwçylary ýüze çykarmaga gönükdirilendir. Taslama çagalaryň başlangyçlaryna we isleglerine itergi berýär, geljekki hünäri saýlamakda özüni tanamaga kömek edýär.
