Ýagşygeldi Kakaýew adyndaky Halkara nebit we gaz uniwersiteti himiýa boýunça Halkara internet-olimpiada-2022 bäsleşigini geçirýär, oňa ýurdumyzyň we daşary ýurtlaryň ýokary okuw mekdepleriniň talyplary çagyryldy.

Ýaryşy guraýan ýokary okuw mekdebi 20-nji martdan oňa gatnaşjaklary hasaba alyp başlar we bir aý dowam edip, 20-nji aprelde tamamlanar.

Olimpiada uniwersitetiň bilim resmi portalynyň  Moodle meýdançasynda onlaýn görnüşde geçiriler. Aň-paýhas bäsleşigi üç dilde: türkmen, rus we iňlis dillerinde özbaşdak hem-de toparlaýyn görnüşde guralýar.

Özbaşdak tapgyr iki ugurda geçiriler. Birinjisinde, himiýa ugrundan bilim alýan talyplar, ikinjide – oňa ugurdaş bolmadyk ugurlardan bilim alýanlar gatnaşarlar. Her ugur boýunça bäş talyp gatnaşdyrylýar.

Himiýa dersinden ökdeleriň bäsleşigi 4-nji maýda geçiriler, şol gün hem bäsleşigiň jemi jemlener. Bäsleşiklerde has köp utuk gazananlar toparlaýyn we özbaşdak tapgyrlaryň ýeňijileri bolarlar.

Çäräniň guramaçylyk komitetiniň habar bermegine görä, olimpiada gatnaşýanlara «Mendeleýewiň periodik tablisasy», «Erginlilik tablisasy», «Standart potensiallaryň hatary» ýaly maglumatlar materiallary berler. Iş wagty talyplara kalkulýator ulanmaga rugsat berilýär. Olar meseleleri 180 minutda (3 sagatda) çözmelidirler.

Olimpiada gatnaşmaga höwesekler hngu.olimp@gmail.com elektron poçta boýunça 1-nji goşundyda görkezilen görnüşde özi hakda gysgaça maglumat ibermelidirler. Şol resminama bäsleşigi guraýan uniwersitetiň resmi saýtynyň Uniwersitet/ himiýa boýunça Halkara internet-olimpiada-2022 bölüminde ýerleşdiriler. Şeýle hem bu ýerde bäsleşik barada goşmaça maglumat we çäräniň guramaçylary bilen aragatnaşyk salgysyny alyp hem-de olimpiadany geçirmegiň düzgünleri bilen tanşyp bolar.

Himiýa boýunça Halkara internet-olimpiada-2022 bäsleşginiň ýeňijilerine we onda baýrakly orunlary eýelänlere diplomlary 20-nji maýda gowşurmak göz öňünde tutulýar.