Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» akyl-paýhas bäsleşiginiň birinji saýlama tapgyrynyň sekizinji jemleýji oýny geçirildi.

Akyl-paýhas bäsleşiginiň ýarym finalyna gatnaşjaklaryň ählisi belli boldy. Saýlama tapgyryň 8 oýnunyň 16 ýeňijisi hersi 8 adamly iki topar indiki iki ýarym final oýunlaryna gatnaşarlar.

Bu bäsleşigi Türkmenistanyň Daşary işler ministrliginiň Halkara gatnaşyklary instituty (TDI HGI) we şu ýokary okuw mekdebiniň düzümindäki Ýaş diplomatlar mekdebiniň ýurdumyzyň mekdepleriniň 9-11-nji synp okuwçylary üçin gurnady. «Parahatçylygyň ýaş çaparlary» bäsleşige diplomatiýa ulgamyna aýratyn höwesli, zehinli we ukyply ýaşlar gatnaşýarlar. Guramaçylaryň wezipesi bu höwesi ösdürmek we mekdep okuwçylarynyň bilimini we ukybyny ösdürmegine höweslendirmek, geljekki kärine gönükdirmekdir.

Bäsleşik milli diplomatiýa mekdebiniň kemala gelen we ösen taryhy döwürleriniň wakalaryny öz içine alýar.

Bu gezekki akyl-paýhas bäsleşik «Deli soltanlygynyň, Kutubşa, Sefewi we Owşar türkmenleriniň döwletleriniň daşary syýasaty we diplomatiýasy» mowzugyna bagyşlandy. Guramaçylaryň maslahaty bilen oňa gatnaşýanlar esasy duşuşyga taýýarlyk döwri oýnuň mowzugy oýunça teklip edilen edebiýatdan bilimlerini artdyrdylar.

Bäsleşikden bir gün öň ýurdumyzyň TDI HGI-niň wekillleri okuwçylar üçin Garaşsyzlyk binasyna ýörite gezelenç guradylar. Bu ýerde ajaýyp taryhy şahs Baýram han Türkmeniň ýadygärliginiň ýanynda olara gyzykly gürrrüňler berildi.

Çekeleşikli geçen bäsleşik Diplomatiýa ýokary mekdebiniň okuw binalarynyň birindäki Ak öýde geçirildi. Bäsleşigiň şertine görä, meýdançada mekdep okuwçylarynyň sekizisi duşuşdylar. Bu gezek Lebap, Mary, Balkan we Daşoguz welaýatlarynyň hersinden iki adam – ýöriteleşdirilen we umumy bilim berýän orta mekdepleriň okuwçylary – 1 oglan we 7 gyz bäslşediler.

«Pähimdarlar geňeşiniň» agzalary hökmünde BMG-niň Bilim, ylym we medeniýet boýunça guramasynyň (ÝUNESKO-nyň) işleri barada Türkmenistanyň Milli toparynyň jogapkär sekretary, Türkmenistanyň Gahrymany Çynar Rustemowa, TYA-nyň Magtymguly adyndaky Dil, edebiýat we milli golýazmalar institutynyň türkmen taryhynyň golýazma çeşmeleri bölüminiň müdiri Geldimyrat Muhammedow, TYA-nyň Taryh we arheologiýa institutynyň Täze we Garaşsyzlyk döwrüniň taryhy bölüminiň müdiri Kakabaý Amanmyradow dagy adalatly eminlik etdiler.

Birinji saýlama tapgyrynyň 8-nji oýnunda iki okuwçy ýarym finala gatnaşmaga hukuk gazandylar. Olar Mary welaýatynyň Mary şäherindäki iňlis dili we ynsançylyk ugurly okuw derslerini çuňlaşdyryp öwredýän ýöriteleşdirilen welaýat mekdebiniň 11-nji synp okuwçysy Şasenem Meýlisowa hem-de Balkan welaýatynyň Balkanabat şäherindäki iňlis dili, fizika we matematika derslerini çuňlaşdyryp öwredýän ýöriteleşdirilen 22-nji orta mekdebiniň 11-nji synp okuwçysy Intizar Tagannyýazowa.

Bäsleşigiň ýeňijilerine, şeýle-de oňa gatnaşyjylara Türkmenistanyň Magtymguly adyndaky Ýaşlar guramasynyň Merkezi Geňeşi hem-de beýleki hemaýatkärler tarapyndan taýýarlanan gymmatbahaly sowgatlar, institutymyzyň degişli şahadatnamalary we Hormat hatlary gowşuryldy.

«Parahatçylygyň ýaş çaparlary» akyl-paýhas bäsleşiginiň I saýlama tapgyrynyň 8-nji oýnuna Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Türkmenhaly» döwlet birleşigi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Balşeker» haryt nyşanly konditer önümlerini öndürýän «Tibet Türkmen» hojalyk jemgyýeti, «Altyn» marketi hem-de dürli pudaklarda zähmet çekýän işgärler üçin ýörite iş egin-eşiklerini hödürleýän «Saraýan» hojalyk jemgyýeti hemaýatkärlik etdiler. «Miras» teleýaýlymy bilen TDIM-niň Halkara gatnaşyklary institutynyň okuw studiýasy tarapyndan bilelikde ýazgy edilen 8-nji oýna ýakyn günlerde tomaşa edip bilersiňiz.