Türkmenistanyň Ylymlar akademiýasynyň Tehnologiýalar merkeziniň düzüminde döredilen Tehnologiýalary geçiriş barlag merkeziniň öňdebaryjy barlaghanalary birnäçe innowasion ylmy-tehniki işläp taýýarlamalaryň önümçilige ornaşdyrylmagyny üpjün etdi. Barlag merkeziniň bu bölümi TYA-nyň Tehnologiýalar merkeziniň ylmy-barlag we tejribe-konstruktorçylyk hem-de beýleki bölümçelerinde döredilen ylmy işläp taýýarlamalary ornaşdyrmaga ýöriteleşdirilendir. Ylmy işläp taýýarlamalara awtorlyk hukugyny almak, bu işleriň awtorlary bilen birlikde taýýar işleri satyn alyjylaryň hem bähbitlerini göz öňünde tutup, dürli ugurlara degişli ylmy işläp taýýarlamalary telekeçilik ugruna ýykgyn etmek babatda şertnamalary taýýarlamak boýunça hyzmatlary ýerine ýetirýär.
Türkmenistanyň ylmy-barlag we innowasion tehnologiýalarynyň hilini ýokarlandyrmak baradaky döwlet maksatnamasyny durmuşa geçirip, täze materiallaryň sinteziniň tehnologiýalary barlaghanasynyň işgärleri Türkmenabat şäheriniň S.Nyýazow adyndaky himiýa zawodynda “Garyşyk NPS döküni” diýen toplumlaýyn dökünleri öndürmegiň tehniki şertlerini işläp taýýarladylar we önümçilige ornaşdyrdylar. Bu bolsa himiýa kärhanasynyň önüminiň hilini gowulandyrmaga hem-de bäsdeşlige ukyplylygyny artdyrmaga mümkinçilik berdi. Alymlaryň kömegi bilen «Hünärli doganlar» kärhanasynyň önümçilik ýerinde oba hojalygy üçin külkelenen kükürt-bentonit toplumlaýyn dökünini öndürmegiň tehnologik işi özleşdirildi.
Kömelekçilik toplumlarynda kömelekleri ekmek bilen meşgullanýanlara ylmy taýdan esaslandyrylan we derman serişdeleriniň önümçilik barlaghanasy şertlerinde synagdan geçirilen gelin kömelekleri ösdürip ýetişdirmegiň tehnologiýasy berildi.
Tehnologiýalary geçiriş merkezi alym-işläp taýýarlaýjylara we innowasion tehnologiýalary ulanyjylara giň gerimli maslahat beriş hyzmatlaryny hödürleýär. Ilkinji nobatda, ylmy işläp taýýarlamalaryň telekeçilik taýdan mümkinçiligini kesgitlemek, olary önümçilige ornaşdyrmagyň ahyrky netijelerini hasaplamak meselelerinde hyzmatlary hödürleýär. Bu ugurdaky üstünlikli işler ylym bilen önümçiligiň arasynda netijeli aragatnaşyklaryň ýola goýulmagyna ýardam bermäge gönükdirilendir. Şu wezipäniň çäklerinde Merkeziň hojalyk hasaplaşygy esasynda hereket edýän barlaghanalary döwlet we hususy kärhanalar bilen onlarça şertnamalary baglaşdylar, innowasion işläp taýýarlamalaryň onlarçasy önümçilige ornaşdyryldy. “Türkmengaz” DK-nyň, “Türkmennebit” DK-nyň kärhanalary, Saglygy goraýyş we derman senagaty ministrligi, “Türkmenhaly” döwlet paýdarlar korporasiýasy, esasy pudaklaryň düzümleýin kärhanalary, telekeçilik düzümleri alymlaryň hyzmatdaşlarydyr.
Tehnologiýalar merkeziniň öňünde goýlan wezipeleriň durmuşa geçirilmegi ýurtda innowasion önümçilikleriň döredilmegini we ösdürilmegini işjeňleşdirmäge, ylym bilen önümçiligiň arasynda netijeli gatnaşyklaryň ýola goýulmagyna ýardam bermäge mümkinçilik berer.
