Türkmen döwlet binagärlik-gurluşyk institutynda bu ýokary okuw mekdebiniň mugallymlarynyň we talyplarynyň Berliniň Boýt adyndaky Tejribe ähmiýetli ylymlar tehniki uniwersitetiniň professory Boris Reznik bilen duşuşygy geçirildi.

Saparynyň çäklerinde daşary ýurtly myhman institutyň wekilleri üçin umumy okuwlar geçdi. Professor çykyşlarynyň birinde Berlin uniwersitetiniň taryhy, ösüşi we häzirki durmuşy barada gürrüň berdi.

«Inženerçilik desgalarynyň gözegçiliginde ýygylyk usuly» temasyndan umumy okuw sapaklary talyplarda uly gyzyklanma döretdi. Onlaýn görnüşdäki sapaklara Türkmenistanyň Inžener-tehniki we ulag kommunikasiýalary institutynyň, Ý. Kakaýew adyndaky Halkara nebit we gaz uniwersitetiniň mugallymlarydyr talyplary goşuldylar. Sapaklary diňleýjiler dialoga işjeň gatnaşdylar, öz pikirlerini aýtdylar, professora sowallar berdiler we olara doly jogap aldylar.

Saparyň çäklerinde şeýle hem ylym we bilim ugrundan geljekde bilelikdäki işleriň meýilnamasy hem-de iki ýokary okuw mekdebiň arasynda hyzmatdaşlygy ösdürmegiň geljegi ara alnyp maslahatlaşyldy.

Duşuşyk türkmen we nemes ýokary mekdepleriniň ýola goýlan ikitaraplaýyn gatnaşyklarynyň çäklerinde geçirildi. 2015-nji ýylyň noýabrynda Türkmen döwlet binagärlik-gurluşyk instituty bilen Berliniň Boýt adyndaky Tejribe ähmiýetli ylymlar tehniki uniwersitetiniň arasynda özara hyzmatdaşlyk barada ylalaşyk baglaşylypdy.

Professor Boris Reznik «Saglygy goraýyş, bilim we sport Berkarar döwletiň täze eýýamynyň Galkynyşy döwründe» Halkara sergisine we onuň çäklerinde geçirilýän ylmy maslahata gatnaşmak üçin Germaniýanyň paýtagtyndan Aşgabada geldi. Çäreler 10-11-nji oktýabrda türkmen paýtagtynda ýurdumyzda giňişleýin bellenilýän Saglygy goraýyş we derman senagaty işgärleriniň güni mynasybetli geçirildi.