Türkmenistanyň Ylymlar akademiýasynyň Merkezi ylmy kitaphanasynda milli, sebitleýin we dünýä derejesinde ýurdumyzyň bitaraplygynyň taryhy, aýratynlyklary we ähmiýeti barada dürli neşirleri hödürleýän kitap sergisi açyldy.

Sergide şu ýyl çap edilen täze kitaplar ýerleşdirildi, olaryň arasynda Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň dürli dillerde neşir edilen «Abadançylygyň röwşen gadamlary», «Ömrümiň manysy», «Türkmenistanyň elektroenergetika kuwwaty» we «Türkmenistanyň dermanlyk ösümlikleri» atly köp jiltli ylmy-ensiklopedik işiniň 14-nji tomy hormatly orunlary eýeleýärler.

Serginiň açylyşyna «Bitaraplyk nazaryýeti – parahatçylygyň çeşmesi» atly ýörite çäre bagyşlandy, onda Merkezi kitaphananyň işgärlerinden başga-da zenanlar guramasynyň we Türkmenistanyň ylymlar akademiýasynyň ylmy institutlarynyň wekilleri gatnaşdylar. Duşuşykda Magtymguly adyndaky Dil, edebiýat we milli golýazmalar institutynyň işgäri, D. Atabaýewa, Ylymlar akademiýasynyň Merkezi ylmy kitaphanasynyň müdiriniň wezipesini ýerine ýetirýän D. Saparbaýewa, kitaphananyň işgärleri Z. Musaýewa we S. Söýünowa dagy çykyş etdiler.

Çykyşlarda dinamiki ösüş, dünýäniň ähli döwletleri bilen dostlukly gatnaşyklary ösdürmek, Türkmenistan halkynyň asuda we döredijilikli durmuşyny üpjün etmek üçin içerki we daşarky şertleri döretmekde ýurduň bitarap statusynyň ähmiýetini açyp görkezdiler. Duşuşyga gatnaşanlar sebitde durnuklylygy hem netijeli hyzmatdaşlygy ösdürýän, bütin dünýäde bitaraplyk we asudalyk ýörelgelerini işjeň goldaýan garaşsyz bitarap Watanyna buýsanýandyklaryny mälim etdiler.