Türkmenistanyň Daşary işler ministrliginiň Halkara gatnaşyklary institutynda ýurdumyzyň orta mekdep okuwçylarynyň arasynda «Parahatlygyň ýaş çaparlary» atly akyl-paýhas bäsleşiginiň ikinji möwsüminiň birinji seçip alyş tapgyrynyň üçünji oýny geçirildi.
Nobatdaky ýaryşa 16 oýunçydan ybarat topar – Aşgabat şäherinden, Ahal, Mary, Balkan we Daşoguz welaýatlaryndan mekdep okuwçylary gatnaşdy. Bäsleşigiň üçünji oýny «Gadymy Müsüriň we Mesopotamiýanyň medeni-diplomatiki mirasy: Ýakyn we Orta Gündogar üçin parahatçylyk sapaklary» temasyna bagyşlandy.
Bäsleşigiň dowamynda ýaş zehinler öz işjeňligini, höwesini, erjelligini, bilimlerini mynasyp derejede görkezmäge başardylar.
Gatnaşyjylara Türkmenistanyň Ylymlar akademiýasynyň Taryh we arheologiýa institutynyň baş ylmy işgäri, taryh ylymlarynyň kandidaty Akjagül Nurgeldiýewa, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alym kätibi, taryh ylymlarynyň kandidaty Kakajan Janbekow, şeýle-de şol institutyň esasy ylmy işgäri, taryh ylymlarynyň kandidaty, dosent Akmyrat Babaýew dagy adalatly eminlik etdiler.
Akyl-paýhas bäsleşiginiň netijeleri görä dört adam ikinji möwsüminiň üçünji oýnunyň ýeňijisi diýlip yglan edildi. Bular Daşoguz welaýatynyň Daşoguz şäherindäki daşary ýurt dillerine ýöriteleşdirilen 24-nji orta mekdebiniň 11-nji synp okuwçysy Şyhdurdy Şyhyýew, Aşgabat şäherindäki ýöriteleşdirilen 16-njy orta mekdebiniň 11-nji synp okuwçysy Allanazar Ataýew, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Sahydöwlet Hümmetjumaýew, Mary welaýatynyň Sakarçäge etrabyndaky daşary ýurt dillerine ýöriteleşdirilen 35-nji orta mekdebiniň 10-njy synp okuwçysy Aýgül Sähedowa dagydyr.
Akyl-paýhas bäsleşiginiň ýeňijilerine, şeýle hem oňa gatnaşanlaryň hemmesine taslamanyň hemaýatkärler – Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Ak gar» hojalyk jemgyýeti, Türkmenistanyň Magtymguly adyndaky milli sazly drama teatry, Türkmenistanyň Döwlet çeperçilik akademiýasy tarapyndan gymmat bahaly ýadygärlik sowgatlar gowşuryldy.
Bäsleşik Türkmenistanyň Daşary işler ministrliginiň Halkara gatnaşyklar instituty we onuň düzümindäki Ýaş diplomatlar mekdebi tarapyndan ýurdumyzyň orta mekdepleriniň 9-11-nji synp okuwçylary üçin taýýarlanyldy. Ýaş çaparlar – taryha, syýasata, diplomatiýa aýratyn gyzyklanma bildirýän zehinli we başarnykly bäsdeşlerdir. Taslamanyň esasy maksady mekdep okuwçylary üçin kär saýlamak, olary höweslendirmek we goldamak, bilimdir başarnyklaryny ösdürmekden ybaratdyr.
