Türkmenistanyň ýaş himikleri 30-njy aprelden 7-nji maý aralygynda Astana şäherinde geçiriljek 57-nji Halkara Mendeleýew himiýa olimpiadasyna (MMO-57) gatnaşarlar.
Türkmenistanyň mekdep okuwçylary Ýewropa, Aziýa we Latyn Amerikasy ýurtlarynyň 20-den gowragyndan deň-duşlary bilen bäsleşerler, bu ýyl oňa ilkinji gezek Braziliýanyň topary hem gatnaşar.
Aşgabadyň Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň himiýa mugallymy Nazar Mämmedow indi birnäçe ýyl bäri türkmen mekdep okuwçylaryny bu olimpiada taýýarlaýar. Tejribeli mugallymyň ýolbaşçylygynda Türkmenistanyň ýaş himikleri yzygiderli iri halkara ýaryşlarynda baýrakly orunlara mynasyp bolýarlar. Şu ýyl hem ol ýurdumyzyň toparyna ýolbaşçylyk eder, toparda Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 11-nji synp okuwçylary Ýakup Annaorazow, Begzada Annaýew, Yhlas Jumaýew we onunjy synp okuwçysy Aýgül Atajanowa çykyş ederler.
Nazar Mämmedowyň aýtmagyna görä, türkmen okuwçylary 1998-nji ýyldan bäri Halkara Mendeleýew olimpiadasyna gatnaşyp gelýärler we olarda birnäçe gezek dürli derejeli medallary eýelediler. Şu ýylky olimpiýada-da hem olaryň uly üstünlik gazanmagyna umyt bildirilýär. Astanadaky bäsleşikden soň türkmen mekdep okuwçylarynyň himiýa boýunça iň abraýly olimpiada - iýul aýynyň ikinji ýarymynda Şweýsariýada geçiriljek 55-nji halkara himiýa olimpiadasyna (55th-IChO) gatnaşmagy göz öňünde tutulýar. Ýurdumyzyň mekdep okuwçylary bu olimpiada hem yzygiderli gatnaşýarlar we baýrakly orunlary eýeleýärler.
