Döwletmämmet Azady adyndaky Türkmen milli dünýä dilleri institutynyň guramagynda Türkmenistanyň we daşary ýurtlaryň ýokary okuw mekdepleriniň talyplarynyň arasynda geçirilen Iňlis dili boýunça II halkara olimpiadanyň netijeleri 42 ýeňijini we 175 baýrak eýelerini yglan etdi.
Türkmenistanyň ýokary okuw mekdepleriniň talyplary 31 ýer eýelediler. Ýeňijileriň arasynda talyplarynyň bäşisi birinji orny eýelän Magtymguly adyndaky Türkmen döwlet uniwersiteti öňe saýlandy. S.A.Nyýazow adyndaky Türkmen oba hojalyk uniwersitetinden 4 ýeňiji yglan edildi. Myrat Garryýew adyndaky Türkmenistanyň Döwlet lukmançylyk uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň we Döwletmämmet Azady adyndaky Türkmen milli dünýä dilleri institutynyň hersiniň talyplary birinji orunlaryň üçüsine mynasyp boldular.
Türkmenistanyň Oguz han adyndaky Inžener-tehnologiýalar uniwersitetiniň, Türkmen döwlet ykdysadyýet we dolandyryş institutynyň we Türkmen döwlet binagärlik-gurluşyk institutynyň hersiniň talyplarynyň ikisi ýeňiş gazandylar. Ýene-de 4 birinji orny Ýagşygeldi Kakaýew adyndaky Halkara nebit we gaz uniwersitetiniň, Türkmen döwlet maliýe institutynyň, Seýitnazar Seýdi adyndaky Türkmen döwlet mugallymçylyk institutynyň we Türkmenistanyň Döwlet energetika institutynyň talyplary eýelediler.
Olimpiadanyň jemi boýunça Türkmenistanyň ady agzalan we we beýleki ýokary okuw mekdepleriniň talyplarynyň iňlis diline ökdeleriniň 125-si ikinji we üçünji orunlara mynasyp boldular. Bäsleşige ýurdumyzyň ýokary okuw mekdepleriniň 24-sinden jemi 520 talyp gatnaşdy.
Germaniýanyň, Ýaponiýanyň, Russiýanyň, Azerbaýjanyň, Gazagystanyň we Özbegistanyň ýokary okuw mekdepleriniň talyplarynyň 11-si ýeňiş gazandylar. Daşary ýurtly talyplar bäsleşikde ikinji we üçünji baýrakly orunlaryň 50-sini eýelediler. Olimpiada daşary ýurtlaryň 35-siniň ýokary okuw mekdepleriniň 156-syndan müňden gowrak talyp gatnaşdy. Olaryň arasynda ady agzalan ýurtlardan başga-da, Bangladeş, Hindistan, Päkistan, Türkiýe, Gyrgyzystan, Täjigistan, Hytaý, Günorta Koreýa, Belarus, Wengriýa, Demirgazyk Kipr, Nepal, Şri-Lanka, Fransiýa, Awstriýa, Salwador, ABŞ, Sierra-Leone, Argentina, Moldowa, Wenesuela, Meksika, Awstraliýa, Indoneziýa, Italiýa, Tailand, Angliýa we Rumyniýa ýaly ýurtlaryň wekilleri bar.
Umuman, olimpiada dünýäniň 36 ýurdunyň 180-den gowrak ýokary okuw mekdebinden bir ýarym müňden gowrak talyp gatnaşdy.
Iňlis dili boýunça II Halkara olimpiadasynyň ýeňijilerini we baýrakly orunlaryny eýelänleri sylaglamak dabarasy oňa gatnaşan ýurtlaryň professorlarynyň, mugallymlarynyň, talyplarynyň onlaýn gatnaşmagynda Türkmenistanyň Diller ýokary mekdebinde geçirilen Olimpiadanyň ýapylyş dabarasynyň çäklerinde geçirildi. Birinji, ikinji we üçünji orunlary eýelänlere degişli derejeli diplomlar gowşuryldy. Şeýle hem Türkmenistandan 71 we daşary ýurtlardan 26 talyba Hormat hatlary gowşuryldy.
Olimpiada talyplar üçin bilimini, başarnygyny we zehinini görkezmek, dostlukly gatnaşyklary berkitmek hem-de ösdürmek, Türkmenistanyň we daşary ýurtlaryň ýokary mekdepleriniň arasynda ylym hem bilim pudagynda özara gatnaşyklary üstünlikli ösdürmek üçin ajaýyp mümkinçilik boldy.
