Türkmenistanyň Daşary işler ministrliginiň Halkara gatnaşyklary instituty ýurdumyzyň mekdepleriniň ýokary synp okuwçylarynyň arasynda geçirilýän «Parahatçylygyň ýaş çaparlary» atly akyl-paýhas bäsleşiginiň ikinji möwsüminiň ýarym final oýunlarynyň ikisini geçirdi.
Ýarym final oýunlarynyň netijeleri esasynda finalçylar topary – taslamanyň ikinji möwsüminiň öňdebaryjylarynyň sekizisi belli edildi. Olar eýýäm bäsleşigiň ýeňijileridirler, indi final tapgyrynda olaryň arasyndan baýrakly orunlary eýelänler kesgitlener.
Birinji ýarym final oýnunyň netijelerine laýyklykda dört finalçy – Aşgabat şäheriniň ýöriteleşdirilen 16-njy orta mekdebiniň 11-nji synp okuwçysy Mekan Agahanow, Daşoguz welaýatynyň Daşoguz şäheriniň 24-nji orta mekdebiniň 10-njy synp okuwçysy Anwar Bekmedow, M.Kulyýewa adyndaky Türkmen milli konserwatoriýasynyň ýanyndaky ýörite sazçylyk mekdep internatynyň 11-nji synp okuwçysy Yhlas Hallyýew, Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 11-nji synp okuwçysy Güljan Serdarowa yglan edildi.
II ýarym finalda öňe saýlanan finalçylar – Mary welaýatynyň Sakarçäge etrabynyň daşary ýurt dillerine ýöriteleşdirilen 35-nji orta mekdebiniň 10-njy synp okuwçysy Aýgül Sähedowa, paýtagtymyzyň 86-njy ýöriteleşdirilen orta mekdebiniň 11-nji synp okuwçysy Döwletmyrat Arazow, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 10-njy synp okuwçysy Azat Amansähedow, Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 11-nji synp okuwçysy Dawut Gezerowdyr.
Ýarym final synaglary «Siwilizasiýalaryň dialogy - adamzat parahatçylygy üçin binýatlyk esasdyr» temasyndan geçirildi. Iki ýarym final oýunlarynyň hersinde 8 okuwçydan ybarat topar, jemi taslamanyň saýlama tapgyrynyň dört oýnuna gatnaşan güýçli 16 okuwçy çykyş etdi. Olaryň arasynda Aşgabat şäheriniň, Ahal, Balkan, Mary we Daşoguz welaýatlarynyň 9-11-nji synp okuwçylary bardy. Bäsleşige gatnaşanlara “Pähimdarlar geňeşiniň” agzalary hökmünde, ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowa, Türkmenistanyň Ylymlar akademiýasynyň Taryh we arheologiýa institutynyň Arheologiýa bölüminiň müdiri, taryh ylymlarynyň kandidaty Allaguly Berdiýew, türkmen döwlet maliýe institutynyň Jemgyýeti öwreniş ylymlary kafedrasynyň müdiri, taryh ylymlarynyň kandidaty, professor Meretguly Öwlüýägulyýew ýaly emin agzalar baha berdiler.
Ýeňijilere we bäsleşige gatnaşyjylaryň hemmesine Türkmenistanyň Magtymguly adyndaky Ýaşlar guramasynyň Merkezi geňeşiniň hem-de çäräniň hemaýatkärleriniň adyndan gymmat bahaly sowgatlar, şeýle hem taslamany guran institutyň adyndan diplomlar we Hormat hatlary gowşuryldy.
Bäsleşige Türkmenistanyň Magtymguly adyndaky Ýaşlar guramasynyň Merkezi geňeşi, Türkmenistanyň Milli ýaý atyjylyk federasiýasy, «Türkmenhaly» Döwlet birleşigi, «Abadan haly» AGPJ, «Aydyň gijeler» HJ, «Muhammet Balkan» HJ , «Ýedi Dogan» HK hemaýatkärlik etdiler.
Şu ýylyň 15-nji maýynda Türkmenistanyň Daşary işler ministrliginiň HGI-de bäsleşigiň aýgytlaýjy final tapgyry geçiriler. Bäsleşigiň guramaçylary final tapgyra çykanlara taslamanyň ikinji möwsüminiň saýlama tapgyrynyň oýunlaryna taýýarlyk görmek üçin hödürlenen tematiki edebiýat arkaly düşünjelerini artdyrmagy maslahat berýärler.
