Türkmen-hytaý gatnaşyklary dostluk, ynanyşmak we özara düşünişmek ýörelgeleriniň berk binýadynda gurulandyr. Iki ýurduň arasyndaky strategiki hyzmatdaşlyk dürli ugurlarda üstünlikli we netijeli alnyp barylýar, ol hemmetaraplaýyn ösüşiň täze görnüşlerine eýe bolýar.
Ikitaraplaýyn gatnaşyklary pugtalandyrmagyň ýokary derejesi hem-de özara gyzyklanma bilen baglanşyklylykda Türkmenistan we Hytaý hyzmatdaşlygy çuňlaşdyrmaga gönükdirlilen tagallalary dowam etdirmäge hem-de ýokarlandyrmaga taýýardyklaryny beýan edýärler.
Şu ýylyň ýanwar aýynda Hytaýa döwlet saparynyň çäklerinde Türkmenistanyň Prezidenti Serdar Berdimuhamedow bilen Hytaý Halk Respublikasynyň Başlygy Si Szinpiniň arasynda geçirilen gepleşiklerde türkmen-hytaý gatnaşyklary, köpugurly hyzmatdaşlyk, şeýle hem halkara we sebit meseleleri ara alnyp maslahatlaşyldy.
Taraplar diplomatik gatnaşyklar ýola goýlany bäri geçen 31 ýylda iki ýurduň arasyndaky hyzmatdaşlygyň netijelerine ýokary baha berdiler. Türkmenistan bilen Hytaýyň arasyndaky häzirki gatnaşyklar giň we strategiki hyzmatdaşlyk derejesine çykdy. Ikitaraplaýyn gatnaşyklar ähli möhüm ugurlary - syýasaty, ykdysadyýeti, söwda, medeniýeti öz içine alýar. Bilim, ylmy-tehniki ugurlarda hem işjeň gatnaşyklar amala aşyrylýar.
Türkmenistan bilen Hytaýyň ýokary okuw mekdepleriniň arasynda ýakyn gatnaşyklar ýola goýuldy. Bilelikdäki ylym-bilim taslamalaryny ilerletmek, okuw enjamlary bilen üpjün etmek, ýokary okuw mekdeplerinde ugurdaş hünärmenleriň okuwyny guramak, seminarlary, okuw-türgenleşiklerini, maslahatalary, bilelikdäki duşuşyklary we beýleki çäreleri geçirmekde netijeli işler alnyp barylýar.
Mysal üçin, geçen aýda Ýagşygeldi Kakaýew adyndaky Halkara nebit we gaz uniwersitetinde ähmiýetli duşuşyklaryň biri geçirildi, onda uniwersitetiň binýadynda Lu Ban ussahanasyny döretmegiň meseleleri barada pikir alşyldy.
Türkmenistanda «Lu Ban ussahanasy» taslamasyny ilerletmek baradaky başlangyç şu ýylyň ýanwar aýynda Pekinde geçirilen gepleşiklerden soň Türkmenistanyň Prezidenti Serdar Berdimuhamedowyň we Hytaýyň Başlygy Si Szinpiniň gol çeken Bilelikdäki beýannamasynda beýan edildi.
Türkmen ýokary okuw mekdebinde geçirilen duşuşyga uniwersitetiň ýolbaşçylary, professor-mugallymlar düzümi we Hytaýyň «International Ltd» milli nebit-gaz korporasiýasynyň Türkmenistandaky wekilleri, şeýle hem Hebeý nebit ptofessional- tehniki uniwersitetiniň we Sian nebit uniwersitetiniň wekilleri gatnaşdylar.
Mejlisiň jemi boýunça taraplar Ýagşygeldi Kakaýew adyndaky Halkara nebit we gaz uniwersitetinde Lu Ban ussahanasyny döretmek hem-de özara düşünişmek barada degişli Memorandum baglaşmak boýunça türkmen-hytaý iş toparyny döretmek barada ylalaşdylar.
Çärä gatnaşyjylar nebit-gaz uniwersitetinde Lu Ban ussahanasynyň açylmagynyň ýokary derejeli hünärmenleriň, inženerleriň we tehnologlaryň kemala gelmegine ýardam etjekdigine ynam bildirdiler.
Magtymguly adyndaky Türkmen döwlet uniwersitetiniň Hytaý Halk Respublikasynyň Sinszýan-Uýgur awtonom sebitiniň esasy uniwersitetleriniň biri bolan Sinszçaýan uniwersiteti bilen üstünlikli hyzmatdaşlyk edýändigini bellemek gerek.
Medeniýet, bilim, ylym we beýleki ugurlar boýunça türkmen-hytaý hyzmatdaşlygynyň çäklerinde, hususan-da, Hytaýda türkmen medeni merkezini we Türkmenistanda hytaý medeni merkezini döretmek, «Lu Ban ussahanasy» taslamasyny mundan beýlägem ilerletmekde bilelikdäki işleri durmuşa geçirilmek boýunça işleri güýçlendirmek, şeýle hem 2023 we 2024-nji ýyllarda özara Medeniýet ýyllaryny geçirmek göz öňünde tutulýar.
