Türkmenistanyň Telekommunikasiýalar we informatika instituty Bilim ministrligi bilen bilelikde Gündogaryň beýik akyldar şahyry Magtymguly Pyragynyň 300 ýyllygy mynasybetli ýurdumyzyň ýokary okuw mekdepleriniň talyplarynyň gatnaşmagynda bilim ýaryşyny gurady.
Dört tapgyrdan: saýlama, çärýek finaldan, ýarym finaldan we jemleýji oýundan ybarat bilim ýaryşy şu aýyň dowamynda geçirilýär.
Häzirki wagtda ýaryşyň birinji tapgyry eýýäm yzda galdy. Oňa sekiz oýun girizilip, olaryň hersinde, umuman, ýurdumyzyň 16 ýokary okuw mekdebinden iki talyplar topary garşydaş hökmünde çykyş etdi. Oýunlarda garşydaşlar “Bilim ýaryşynyň” birinji tapgyryndan öň geçirilen bije çekişligiň netijesi boýunça kesgitlendi.
Talyp oýunlary joşgunly, hyjuwly we gyzykly ýagdaýda geçrilýär. Olara gatnaşanlary iň gowy netijeleri gazanmak, öz artykmaçlygyny subut etmek, “ýyldyrym çaltlygynda” dogry jogap bermek islegi birleşdirdi – bularyň ählisiniň, arzyly ýeňşi höwes edýändigi, elbetde, şübhesizdi. Bilim ýaryşynyň mowzugy we, degişlilikde, berlen ähli soraglar beýik akyldar Magtymguly Pyragynyň gyzykly ömri we döredijiligine, şeýle hem baý edebi mirasyna bagyşlanýardy.
Bäsleşigiň netijesinde 16 topardan has tapawutlanan we alyp baryjynyň soraglaryna çalt jogap bermek ukybyny görkezen 8 topar mowzuk boýunça iň oňat bilgir hökmünde ykrar edildi. Şeýlelikde, D.Azady adyndaky Türkmen milli dünýä dilleri institutynyň toparlary, S.A.Nyýazow adyndaky Türkmen Oba hojalyk uniwersiteti, Türkmenistanyň Döwlet energetika instituty, S.Seýdi adyndaky Türkmen döwlet mugallymçylyk instituty, Türkmen döwlet ykdysadyýet we dolandyryş instituty, Halkara ynsanperwer ylymlary we ösüş uniwersiteti, Daşary işler ministrliginiň Halkara gatnaşyklary instituty we Magtymguly adyndaky Türkmen döwlet uniwersitetiniň toparlary dörtden bir finala gatnaşmaga hukuk gazandylar.
Talyp bilim ýaryşynyň çärýek finaly geljek ýekşenbe güni Türkmenistanyň Telekommunikasiýa we informatika institutynda geçiriler, şonda 8 bilgir toparyndan 4 sany iň gowy topar – bu tapgyryň öňdebaryjylary we ýarym final oýnuna gatnaşyjylar kesgitlener. Ondan soň ýarym finalyň netijelerine görä, 4 topardan iň mynasyp 2 topar saýlanar. Olar finalda – bilim ýaryşynyň şeksiz ýeňijisini kesgitlejek aýgytly oýunda duşuşarlar.
