Magtymguly adyndaky Türkmen döwlet uniwersiteti bilen Ýerewan döwlet uniwersitetiniň arasyndaky hyzmatdaşlyk baradaky Ylalaşygyň durmuşa geçirilmeginiň çäklerinde 2023-2024-nji täze okuw ýylynda türkmen halkynyň akyldar şahyry Magtymguly Pyragynyň 300 ýyllygyna bagyşlanan birnäçe okuw sapaklaryny geçirmek meýilleşdirilýär. Ýubileý çäreleriniň guramaçylyk meseleleri 24-nji iýulda Türkmenistanyň Ermenistan Respublikasyndaky Adatdan daşary we Doly ygtyýarly ilçisi M. Aýazowyň Ýerewan döwlet uniwersitetiniň rektory Ogannes Ogannisýan bilen duşuşygynda ara alnyp maslahatlaşyldy.
Türkmenistanyň Daşary işler ministrliginiň habar berişi ýaly, duşuşygyň dowamynda ylym we bilim pudagynda hyzmatdaşlyk, şeýle hem Ermenistanda türkmen dilini, edebiýatyny we medeniýetini wagyz etmek barada düýpli pikir alşyldy. Iki ýokary okuw jaýynyň mugallymlarydyr talyplarynyň arasyndaky hyzmatdaşlyk we tejribe alyşmak meselesini gozgamak bilen, ýurdumyzyň diplomaty, Ýerewan döwlet uniwersitetinde okuw sapaklaryny geçirmek üçin, ady agzalan Magtymguly adyndaky TDU-nyň mugallymlaryny çagyrmagy teklip etdi.
Ermenistan tarapy, ýubileý ýyly bilen baglanyşyklylykda Ermenistanyň ylmy žurnallarynda Magtymguly Pyragy baradaky makalalary çap etmegi, şeýle hem nusgawy türkmen şahyrynyň döredijiligine bagyşlanan halkara derejesinde maslahat geçirmegi teklip etdi.
