Aşgabat şäherinde geçirilen «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahatyň çäginde Russiýanyň ýokary okuw mekdepleriniň wekilleri Magtymguly adyndaky Türkmen döwlet uniwersitetinde boldular.
Geografiýa ylymlarynyň doktory, M.W.Lomonosow adyndaky Moskwa döwlet uniwersitetiniň tebigy baýlyklary paýhasly dolandyrmak bölüminiň professory Ýuriý Mazurow, Moskwa Döwlet uniwersitetiniň himiýa fakultetiniň fiziki himiýa kafedrasynyň dosenti, pedagogika ylymlarynyň kandidaty Oksana Ryžowa, şeýle hem W.N.Tatişewiň adyny göterýän Astrahan döwlet uniwersitetiniň halkara işleri boýunça prorektory Angelina Fadina ÝUNESKO-nyň «Medeni miras: geçmişden geljege» kafedrasyna baryp gördüler.
ÝUNESKO-nyň kafedrasynyň agzalary bilen bolan duşuşyk sowal-jogap görnüşinde geçirildi. Mundan başga-da, rus alymlary uniwersitetiň talyplary üçin okuw sapagyny geçirdiler.
Bu okuw sapaklarynda talyplaryň aň-bilim ukyplarynyň ösdürilmegi, himiýa dersini okatmagyň häzirki zaman talaplary we Durnukly ösüş maksatlaryna ýetmekde bilimiň esasy ugurlary barada durlup geçildi.
Magtymguly adyndaky Türkmen döwlet uniwersiteti halkara hyzmatdaşlygyny işjeň ösdürýär. Bu ýokary okuw mekdebiniň kömegi bilen hyzmatdaş uniwersitetlerdäki daşary ýurtly kärdeşleriniň «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergisine we maslahatyna hem-de «Gündogaryň meşhur akyldary we lukmany Abu Aly ibn Sinanyň umumadamzat ähmiýetli mirasy» atly halkara ylmy maslahat gatnaşmaklary guraldy.
Türkmenistanyň Prezidenti Serdar Berdimuhamedow ýurdumyzyň paýtagtynda işe başlan «Gündogaryň meşhur akyldary we lukmany Abu Aly ibn Sinanyň umumadamzat ähmiýetli mirasy» atly halkara ylmy maslahata gatnaşyjylara Gutlagyny iberdi.
Halkara ylmy maslahatlara M.W.Lomonosow adyndaky Moskwa döwlet uniwersitetiniň we W.N.Tatişew adyndaky Astrahan döwlet uniwersitetiniň alymlaryndan başga-da, Pekiniň daşary ýurt dilleri uniwersitetiniň (HHR) we Ýerewan döwlet uniwersitetiniň (Ermenistan Respublikasy) wekilleri hem gatnaşdylar.
