Türkmen döwlet maliýe instituty milli manadyň dolanyşyga girizilmeginiň 30 ýyllygyna gabatlap, ýurdumyzyň ýokary okuw mekdepleriniň talyplarynyň arasynda ykdysadyýet boýunça V onlaýn olimpiadasyny geçirdi.

Olimpiada şahsy we toparlaýyn ýaryş görnüşinde geçirildi, oňa Türkmenistanyň 16 ýokary okuw mekdebinden 64 talyp gatnaşdy. Şahsy bäsleşikde birinji orny Türkmen döwlet maliýe institutynyň talyby Merdan Babamyradow eýeledi.

Ikinji orun şol ýokary okuw mekdebiniň talyby Ogulmaýsa Amandurdyýewa bilen Türkmenistanyň Inžener-tehniki we ulag kommunikasiýalary institutynyň talyby Nazar Seýidowa berildi.

Üçünji orny Jeýhun Muhammetdurdyýew (Türkmen döwlet maliýe instituty), Bereket Şatlykow (S.A.Nyýazow adyndaky Türkmen oba hojalyk uniwersiteti) we Berdimyrat Berdiýew (Türkmen oba hojalyk instituty) paýlaşdy.

Toparlaýyn ýaryşda Türkmen döwlet maliýe institutynyň talyplary öňdeligi eýeledi. Ikinji orna Türkmen oba hojalyk institutynyň topary mynasyp boldy. Üçünji orny Türkmenistanyň Inžener-tehniki we ulag kommunikasiýalary institutynyň talyplary eýeledi. Toparlaryň netijeleri bäsdeşleriň utuklarynyň jemi boýunça kesgitlendi. Ýeňijiler we baýraklara mynasyp bolanlar degişli derejeli diplomlar bilen sylaglandy.

Olimpiada ýaşlary ykdysadyýeti öwrenmäge höweslendirmäge, ýaş zehinleri ýüze çykarmaga, olaryň amaly başarnyklaryny çuňlaşdyrmaga we bu ugur boýunça nazary bilimlerini berkitmäge, özbaşdak iş ukyplaryny ösdürmäge, şeýle hem talyplaryň özara gatnaşygyny, şol sanda, maglumat we aragatnaşyk tehnologiýalary arkaly giňeltmäge gönükdirilendir.

Olimpiada Türkmenistanda sanly bilim ulgamyny ösdürmek ýörelgesiniň durmuşa geçirilmeginiň bir bölegi hökmünde guraldy.