Döwletmämmet Azady adyndaky Türkmen milli dünýä dilleri instituty Türkmenistanyň Bilim ministrliginiň goldawy bilen rus dili boýunça geçiren Halkara internet olimpiadasynyň ýeňijilerini we baýrakly orunlary eýelänleri yglan etdi.
Olimpiada gatnaşanlar – Türkmenistanyň we daşary ýurtlaryň ýokary okuw mekdepleriniň talyplary jemi üç ýüze golaý baýrak aldylar. Hususan-da, bäsleşigiň jemleýji netijeleri boýunça 50 ýeňiji we 244 baýrakçy kesgitlendi.
Ýeňijileriň arasynda Türkmenistanyň atlary agzaljak ýokary okuw mekdeplerinden 34 talyp bar: Seýitnazar Seýdi adyndaky Türkmen döwlet mugallymçylyk instituty, Türkmenistanyň Daşary işler ministrliginiň Halkara gatnaşyklary instituty, Döwletmämmet Azady adyndaky Türkmen milli dünýä dilleri instituty, Magtymguly adyndaky Türkmen döwlet uniwersiteti, Myrat Garryýew adyndaky Türkmenistanyň Döwlet lukmançylyk uniwersiteti, Türkmen döwlet binagärlik-gurluşyk instituty, Halkara ynsanperwer ylymlary we ösüş uniwersiteti, Türkmenistanyň Milli howpsuzlyk instituty, Türkmenistanyň Oguz han adyndaky Inžener-tehnologiýalar uniwersiteti we Türkmenistanyň Döwlet energetika instituty.
Ýene-de 16 sany birinji orny A.Ž.Myrsabekow adyndaky Oş (Gyrgyzystan) döwlet mugallymçylyk uniwersitetiniň, I.Altynsarin (Gazagystan) adyndaky Arkalyk mugallymçylyk institutynyň, Özbegistanyň Döwlet dünýä dilleri uniwersitetiniň, Samara döwlet sosial-mugallymçylyk uniwersitetiniň, Nižnyý Nowgorodyň N.I.Lobaçewskiý adyndaky Döwlet uniwersitetiniň we Naberežnyýe Çelny döwlet mugallymçylyk uniwersitetiniň (Russiýa) talyplary gazandy.
Olimpiadanyň baýrakçylary, şol sanda Türkmenistanly we daşary ýurtly talyplar 64 sany ikinji we 180 sany üçünji orny eýelediler.
Olimpiadanyň ýeňijilerine we baýrakçylaryna Döwletmämmet Azady adyndaky Türkmen milli dünýä dilleri institutynyň adyndan degişli derejeli diplomlar gowşurylar. Tapawutlanan talyplara höweslendiriji şahadatnamalar gowşurylar.
Bäsleşige Türkmenistanyň ähli ýokary okuw mekdeplerinden jemi 1600 töweregi talyp, daşary ýurtlaryň 22-sinden şol sanda, Russiýadan, Belarusdan, Gazagystandan, Täjigistandan, Özbegistandan, Gyrgyzystandan, Hytaýdan, ABŞ-dan, Polşadan, Wengriýadan, Awstriýadan, Fransiýadan, Braziliýadan, Germaniýadan, Hindistandan, Türkiýeden, Müsürden, Koreýadan, Rumyniýadan 150-den gowrak ýokary okuw mekdebi gatnaşdy.
Olimpiada Türkmenistanda «Arkadag Serdarly bagtyýar ýaşlar» şygary bilen geçip barýan 2023-nji ýylda ýaşlaryň üstünliklerini we ýeten derejelerini artdyran ýene bir möhüm waka boldy. Halkara talyp olimpiadasy 6-7-nji dekabrda geçirildi we BMG-niň Baş Assambleýasy tarapyndan yglan edilen we her ýyl 12-nji dekabrda giňden bellenýän Halkara Bitaraplyk gününiň baýram edilmeginiň öňüsyrasyndaky şanly wakalaryň biri boldy. Olimpiadanyň guramaçylyk komitetiniň belleýşi ýaly, bu bäsleşik zehinli we ylyma berlen köp talyby ýüze çykarmaga mümkinçilik berdi we BMG-niň resmi dilleriniň biri, şeýle hem milletara gatnaşyk dili bolan rus dili boýunça olaryň biliminiň hem taýýarlygynyň ýokary derejesini görkezdi.
Olimpiada ýaşlara rus dili boýunça intellektual we döredijilik ukyplaryny görkezmäge mümkinçilik berdi, şeýle hem talyplaryň gepleýiş, ýazuw we aragatnaşyk endiklerini ýokarlandyrmaga bolan höwesini artdyrdy. Mundan başga-da, bu bäsleşik ylym we bilim pudagynda halkara hyzmatdaşlygyň giňelmegine we dünýäniň dürli künjeklerinden ýokary okuw mekdepleriniň wekilleriniň arasynda dostlukly gatnaşyklaryň pugtalanmagyna goşant goşdy.
