Türkmen ýaşlarynyň ykdysadyýetiň, telekeçiligiň, bilimiň, ylmyň, medeniýetiň we sportuň dürli ugurlaryndaky üstünlikleri we onuň Arkadag Serdarly bagtyýar ýaşlar ýylynda ýurdumyzyň ösüşine goşan goşandy diňe ýakynda boljak ýaşlar forumynda we üstünlikler sergisinde däl, eýsem, ýaş nesliň üstünliklerini jemleýän täze neşirde hem giňden görkeziler.
Bu kitap Türkmenistanyň Ylymlar akademiýasynyň Tehnologiýalar merkeziniň ýaş alymlarynyň işleri barada giňişleýin maglumatlary öz içine alar. Olar barada Tehnologiýalar merkeziniň müdiriniň orunbasary Jeren Aşyrmuhammedowa şeýle gürrüň berýär:
– TYA-nyň Tehnologiýalar merkeziniň aspiranturasynda ylmyň ileri tutulýan ugurlaryna degişli 18 hünär boýunça ylmy işgärler taýýarlanýar. Häzirki wagtda 12 aspirant we 11 sany ylymlaryň kandidaty diýen ada dalaş edýän adam tejribeli alymlaryň ýolbaşçylygynda gözleg geçirýär. Dürli milli we halkara ylmy hem taslama ýaryşlaryna işjeň gatnaşmak bilen, merkeziň ýaş alymlary yzygiderli baýrakly orunlara mynasyp bolýarlar.
Şu ýylyň şygary mynasybetli Türkmenistanda ilkinji gezek geçirilen «Ýokary tehnologiýalar we innowasion döretmeler» atly halkara ylmy bäsleşikde H.Orunbaýew 1-nji, N.Çarykulyýewa 2-nji, D.Amannazarowa we D.Gurbannazarow 3-nji orny eýelediler. «Türkmenaragatnaşyk» agentligi tarapyndan geçirilen «Sanly çözgüt – 2023» bäsleşiginde Tehnologiýalar merkeziniň aspiranty A.Atabaýewiň «Elektronika senagaty» mowzugyndaky işi 3-nji orny eýeledi.
Mary şäherinde geçirilen Merkezi Aziýa ýurtlarynyň we Hytaýyň «Beýik Ýüpek ýolunyň täze döwri» atly ýaşlar forumynyň çäginde Tehnologiýalar merkeziniň ýaş işgärleri H.Muhammetgulyýewa, D.Gurbannazarow, A.Atabaýew, G.Soltanmyradowa dagy üstünlikleri üçin Türkmenistanyň ýaşlar baýragyny aldylar. Ýaş alymlaryň halkara derejesinde alyp barýan işlerine berlen ýokary baha olaryň «Geljege nazar» atly Ýewraziýa patent uniwersiadasynda gazanan üstünlikleri-de şaýatlyk edýär. Bu bäsleşigiň netijeleri boýunça K.Kerimow we O.Meredowa 1-nji orny, E.Kulyýewa bolsa 3-nji orny eýeledi.
Ýaş türkmen alymlarynyň geçiren gözlegleriniň netijesi Tehnologiýalar merkezi tarapyndan neşir edilýän «Türkmenistandaky innowasion tehnologiýalar» atly internet žurnalda-da, daşary ýurt ylmy neşirleriniň sahypalarynda-da öz beýanyny tapýar.
Şu ýyl H.Myradowyň bilelikde ýazan işi Ufada geçen «Häzirki zaman dünýäsinde ylmyň ösüşiniň innowasion mümkinçiligi: üstünlikler we innowasiýalar» atly X halkara konferensiýanyň ylmy makalalar ýygyndysynda neşir edildi. D.Amannazarowanyň we B.Berdiýewiň makalalary Özbegistanda neşir edilen «Himiýa we himiýa tehnologiýasy» atly ylmy-tehniki žurnalda çap edildi.
Tehnologiýalar merkeziniň ýaş alymlary özleriniň hünär derejesini ýokarlandyrmak, ýurdumyzyň ösüşi üçin ulanmak maksady bilen, dünýädäki üstünlikleri we ylmy gözlegleri geçirmekde daşary ýurt tejribesini öwrenmek ugrunda işjeň işleýärler. Bulara mysal hökmünde Ýaş alym H.Orunbaýewiň Koreýa Respublikasynda geçirilen Merkezi Aziýa-Koreýa Respublikasy hyzmatdaşlyk forumynyň çäginde «Geljekki nesilleriň ýolbaşçylary» atly okuw meýilnamasyna gatnaşmagyny bellemek bolar.
