Türkmenistanyň Bilim ministrliginiň Innowasion-maglumat merkezinde hormatly dynç alyşdaky raýatlar üçin sanly ulgamyň sowatlylygyny geçmegiň okuwlarynyň birinji tapgyry tamamlandy.
«Innowasion kompýuter tehnologiýalary» maksatnamasynyň çäklerinde 20 adamdan ybarat topar kompýuterde işlemegiň binýatlyk başarnyklaryny ele aldy. Bir aýlyk okuw tamamlananyndan soň, diňleýjilere döwlet nusgasyndaky şahadatnamalar gowşuryldy.
– Şu ýyl biziň merkezimiziň binýadynda hormatly dynç alyşdaky raýatlar üçin ilkinji toparyň açylandygyny aýdyp bolar – diýip, okuw we halkara bölüminiň baş hünärmeni Serdar Ýagşyýew gürrüň berýär. – Uly ýaşly toparyň wekilleri üçin ýörite tölegsiz okuwlar guraldy. Okuwlar günaşa geçirilýär, okuwlaryň umumy dowamlylygy 54 sagada deňdir. Häzirki wagtda biz 30 adamdan ybarat ýene-de bir topary jemledik.
Başlangyç okuwlarda hormatly dynç alyşdaky diňleýjiler kompýuter bilen işlemegiň esaslaryny – kompýuteri işe girizmegi we öçürmegi, faýllary hem-de papkalary açmagy, ýapmagy we ýatda saklamagy öwrendiler. Mundan başga-da, ulanyjylar klawiatura, printer we şuňa meňzeşler bilen işlemek boýunça iş ýüzünde başarnyklary ele aldylar. Windows amallar ulgamyndaky gurnalan maksatnamalary we goşundylary, internete, brauzerlere birikmegi, elektron poçtanyň we beýlekileriň hasaba alnyşyny özleşdirdiler.
Sanly tehnologiýalaryň depginli ösýän döwründe kompýuter sowatlylygy isleg bildirilýän has uly zerurlyga öwrülýär. Kompýuterden we internetden peýdalanmagy başarmak durmuş wezipelerini netijeli çözmäge, jemagat hyzmatlaryny, aragatnaşyk hyzmatlaryny tölemäge we beýlekilere kömek eder. Şeýle hem uly ýaşly adamlar öz kompýuterlerini özleşdirip, boş wagtlarynyň peýdaly geçirilmegini baýlaşdyrmaga: kitap okamaga, internetde kino görmäge, ýakyn garyndaşlary bilen wideo aragatnaşyk arkaly gürleşmäge mümkinçilik alýarlar.
Häzirki wagtda Türkmenistanda 2021–2025-nji ýyllarda sanly ykdysadyýeti ösdürmek barada Döwlet maksatnamasynyň çäklerinde ýurdumyzda anyk wezipeler hem-de her bir ulanyjynyň islegleri üçin niýetlenen web serwisleriň köp sanlysy işleýär.
Has uly isleg bildirilýän şeýle ulgamlaryň biri Döwlet hyzmatlarynyň e.gov.tm portalydyr. Şundan ugur alnanda, häzirki zaman tehnologiýalarynyň özleşdirilmegi uly ýaşly adamlara özlerini jemgyýetiň durmuşyna işjeň gatnaşyjy hökmünde duýmaga mümkinçilik berýär.
Türkmenistanyň Bilim ministrliginiň Innowasion-maglumat merkeziniň wekilleriniň habar berişleri ýaly, her bir isleg bildiren adam kompýuter sowatlylygynyň tölegsiz okuwlarynyň diňleýjisi bolup biler. Okuwlara bellige aldyrmak üçin pasport, pensiýa şahadatnamasy hem-de bir fotosurat gerekdir. Okuwlar Magtymguly şaýolunyň 136-njy jaýy salgysynda geçirilýär. Maglumat almak üçin telefon belgiler: (+99312) 361925; (+99365) 503184.
