Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» taslamasynyň III möwsüminiň VII saýlama bäsleşigi geçirildi. Ol şu ýokary okuw mekdebi hem-de onuň düzümindäki Ýaş diplomatlaryň mekdebi tarapyndan Türkmenistanyň ýokary synp okuwçylarynyň arasynda geçirilýär.

«Beýik Magtymguly Pyragynyň taglymatlary – umumadamzat gymmatlyklarynyň milli şamçyragy» diýen umumy şygar astynda geçirilýän III möwsümiň nobatdaky bäsleşigi «XVIII asyrda we XIX asyryň birinji çärýeginde Hywa hanlygynyň hem-de Buhara emirliginiň halkara gatnaşyklary we diplomatiýasy» diýen tema bagyşlandy.

Akyl-paýhas bäsleşigine oýunçylaryň 8-si – Aşgabat şäheriniň, Mary, Ahal, Lebap we Daşoguz welaýatlarynyň orta mekdepleriniň 10-11-nji synp okuwçylary gatnaşdylar. 

Bäsleşigiň emin agzalarynyň düzümine Türkmenistanyň DIM-niň HGI-niň halkara gatnaşyklary we diplomatiýasy kafedrasynyň uly mugallymy, filosofiýa ylymlarynyň kandidaty Begenç Garaýew, Magtymguly adyndaky türkmen döwlet uniwersitetiniň dünýä taryhy kafedrasynyň uly mugallymy Şamuhammet Akmyradow, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň halk döredijiligi bölüminiň müdiri, filologiýa ylymlarynyň kandidaty Güljemal Gummanowa dagy girdi.

Bäsleşigiň dowamynda zehinli okuwçylar temany çuňňur bilýändiklerini, oňat taýýarlanandyklaryny, akyllaryny we giň gözýetimlerini aýdyň görkezdiler. Ýaryş meýdançasynda şowhunly, ýiti bäsleşikli göreş dowam edip, ýaş bilermenleriň her biri öz artykmaçlyklaryny subut etmäge çalyşdylar.

Taslamanyň III möwsüminiň VII oýnunyň netijeleri boýunça Aşgabat şäherindäki 52-nji ýöriteleşdirilen orta mekdebiň 11-nji synp okuwçysy Resul Baýmyradow hem-de Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 10-njy synp okuwçysy Nurgözel Gutlyýewa ýeňiji diýlip yglan edildi.

Bäsleşigiň ýeňijilerine we oňa gatnaşanlaryň ählisine Türkmenistanyň DIM-niň HGI-niň adyndan Hormat hatlary hem-de bäsleşigiň hemaýatkärlerinden gymmat bahaly sowgatlar gowşuryldy.

TYA-nyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi geňeşi, Türkmenistanyň ýaýdan ok atmak boýunça milli federasiýasy, Türkmenistanyň Senagatçylar we telekeçiler birleşmesi, şeýle hem «Abadan haly» HJ, «Aýdyň gijeler» HJ, «Ýedi dogan» HK, «Muhammet Balkan» HJ, «Düwmejik» HK we «Ak Menzili» HK bäsleşigiň hemaýatkärleri hökmünde çykyş etdiler.

Çäräniň wideoýazgysy Türkmenistanyň telewideniýe, radiogepleşikler we kinematografiýa baradaky döwlet komitetiniň «Miras» teleýaýlymy hem-de ýurdumyzyň DIM-niň HGI-niň okuw studiýasy tarapyndan amala aşyryldy. Ýakyn wagtda bäsleşik türkmen teletomaşaçylaryna görkeziler.