Magtymguly adyndaky Türkmen döwlet uniwersitetiniň wekilleri «Uniwersitetler we geljek» atly halkara foruma we Intellektual merkezde – M.W.Lomonosow adyndaky Moskwa döwlet uniwersitetiniň Düýpli kitaphanasynda geçirilen Ýewraziýa uniwersitetleriniň assosiasiýasynyň giňişleýin mejlisine gatnaşdylar.
Halkara foruma Russiýanyň, Belarusyň, Türkmenistanyň, Gazagystanyň, Gyrgyzystanyň, Täjigistanyň, Özbegistanyň, Hytaýyň, Wýetnamyň, Liwanyň, Omanyň, Saud Arabystanynyň, Efiopiýanyň we beýleki ýurtlaryň 100-den gowrak abraýly ýokary okuw mekdepleriniň wekilleri ýygnandylar.
Çärä Russiýa Federasiýasynyň ylym we ýokary bilim ministri W.N.Falkow, Döwlet dumasynyň ylym we ýokary bilim boýunça komitetiniň başlygynyň birinji orunbasary W.W.Sipýagin, GDA-nyň Baş sekretary S.N.Lebedew, Russiýa Federasiýasynyň Daşary işler ministriniň orunbasary S.A.Rýabkow, «Rossotrudniçestwo» federal gullugynyň başlygy E.A.Primakow we beýleki hormatly myhmanlar gatnaşdylar.
Duşuşykda M.W.Lomonosow adyndaky Moskwa döwlet uniwersitetiniň rektory, Russiýanyň Rektorlar Bileleşiginiň we Ýewraziýa uniwersitetler assosiasiýasynyň prezidenti, Russiýanyň Ylymlar akademiýasynyň akademigi W.A.Sadowniçi, şeýle hem çärä gatnaşyjy ýurtlaryň ýokary okuw mekdepleriniň ýolbaşçylary we wekilleri çykyş etdiler.
Çykyşlarda Ýewraziýa uniwersitetleri assosiasiýasynyň ählumumy häsiýetlidigi we ähmiýetlidigi nygtaldy. Ýokary okuw mekdepler ösen döwlet we jemgyýet gurmagyň möhüm hem-de aýrylmaz bölegidir. Ýaşlara bilim bermekde we terbiýelemekde olaryň aýratyn orny bar. Häzirki zaman uniwersitetleri tutuş dünýäde medeni we intellektual merkezler bolmak bilen ösüşiň hereketlendiriji güýji hökmünde çykyş edýärler. Dünýädäki uniwersitetleri birleşdirýän dürli guramalaryň, birleşikleriň we halkara gatnaşyklaryny ösdürmek üçin bilelikdäki işleriniň aýratyn ähmiýeti bellenildi. Şu ýyl 35 ýyllygyny belleýän we 11 ýurtdan 160-dan gowrak uniwersiteti birleşdirýän Ýewraziýa uniwersitetleri assosiasiýasynyň işine ýokary baha berildi. Şunuň bilen baglylykda, assosiasiýa gatnaşyjylaryň gatnaşygyny geljekde-de giňeltmegiň ähmiýeti bellenildi.
Türkmenistanyň esasy uniwersitetlerinden biri bolan Magtymguly adyndaky TDU-nyň wekiliniň çykyşynda hormatly Prezidentimiz Serdar Berdimuhamedowyň baştutanlygynda ýaşlaryň intellektual başarnygyny, ýaş raýatlaryň döredijilik we bedenterbiýesini ösdürmek babatda ýurtda ähli mümkinçilikleriň hem-de şertleriň döredilendigi nygtaldy. Ýurdumyzyň bilim ulgamynda özgertmeleriň, daşary ýurtlaryň ýokary okuw mekdepleriniň we ylym merkezleri bilen hyzmatdaşlygyň, innowasiýa tehnologiýalary we sanly bilim ulgamynda tejribe alyşmagyň, medeni-ynsanperwer gatnaşyklary ösdürmegiň ähmiýeti bellenildi.
Ýewraziýa uniwersitetleri assosiasiýasynyň guran forumynyň çäklerinde ýokary okuw mekdepleriniň halkara ynsanperwer hyzmatdaşlygyny ösdürmekde ähmiýetini ýokarlandyrmaga gönükdirilen birnäçe ikitaraplaýyn we köptaraplaýyn resminamalara gol çekildi.
Magtymguly adyndaky TDU-nyň 1992-nji ýyldan bäri Ýewraziýa uniwersitetleriniň assosiasiýasynyň agzasydygyny bellemek gerek. «Magtymguly adyndaky Türkmen döwlet uniwersiteti bilen M.W.Lomonosow adyndaky Moskwa döwlet uniwersitetiniň arasyndaky hyzmatdaşlyk barada Ylalaşygyň» çäklerinde ylym we bilim pudagynda oňyn hem-de netijeli ikitaraplaýyn hyzmatdaşlygy giňeltmek babatda maksada gönükdirilen işler alnyp barylýar.
