S.A.Nyýazow adyndaky Türkmen oba hojalyk uniwersitetinde «Garagum» edebiýat birleşmesi döredildi.
Bu edebiýat birleşmesi talyplary halkymyzyň edebi mirasy bilen tanyşdyrmak, watançylyk söýgüsini, Diýarymyzyň taryhyna buýsanç duýgusyny terbiýelemek, zehinli ýaşlary ýüze çykarmak we höweslendirmek, döredijilik başlangyçlaryny, ukyplaryny we gujur-gaýratyny goldamak, talyplara edebiýat hem-de dilewarlyk ussatlygyny öwretmek maksady bilen döredildi.
Birleşmäniň döredilmegi, şeýle hem ýaşlaryň arasynda türkmen şahyrlarynyň we ýazyjylarynyň döredijiligini, nusgawy, milli we dünýä edebiýatynyň ajaýyp nusgalaryny giňden ýaýmaga gönükdirilendir.
«Pähim-paýhas ummany Magtymguly Pyragy» şygary bilen geçýän we Gündogaryň nusgawy şahyry we akyldary Magtymguly Pyragynyň doglan gününiň 300 ýyllygy bellenilýän 2024-nji ýylda uniwersitetde «Garagum» edebiýat birleşmesiniň açylmagynyň çuňňur manysy bar.
Ady rowaýata öwrülen bu şahsyýetiň bahasyna ýetip bolmajak edebi eserleri ata-babalarymyzyň mirasynyň hazynasydyr, ýaş nesil üçin möhüm paýhas taglymatlary we wesýetleri häzirki zaman jemgyýetinde giňden öwrenilýär hem-de wagyz edilýär, şeýle hem türkmen halkyny Berkarar döwletiň bagtyýarlyk eýýamynda belent maksatlara ýetmäge ruhlandyrýar.
S.A.Nyýazow adyndaky TOHU-nyň döredijilikli zehinli talyplaryň, şeýle hem ýurdumyzyň beýleki ýokary okuw mekdeplerinden zehinli ýaşlaryň birleşmäniň edebi duşuşyklaryna we mejlislerine gatnaşmagy göz öňünde tutulýar. Mundan başga-da, birleşmäniň işine Türkmenistanyň ýokary okuw mekdepleriniň mugallymlary, häzirki zaman ýazyjy-şahyrlary we žurnalistleri gatnaşarlar hem-de ýaşlar bilen işleşmegi dowam ederler.
