«Türkmenistanda ylym we tehnika» žurnalynyň täze sany türkmeniň nusgawy şahyry, Gündogaryň beýik akyldary Magtymguly Pyragynyň döredijilik mirasyna bagyşlanan üç makala bilen açylýar.

Bular B.Bekmurzaýewiň we J.Pirgulyýewanyň «Magtymguly Pyragynyň şygryýet dünýäsi dürli halklaryň dilinde», P.Çaryýewiň «Magtymgulynyň millilik we döwletlilik baradaky pikirleriniň öwrenilişi» we M.Seýidowanyň «Magtymgulynyň watançylyk-gahrymançylyk baradaky şygyrlarynda işjeňligi terbiýelemek meselesi» atly makalalardyr. Medeni miras mowzugy žurnalda çap bolan beýleki makalalarda, mysal üçin «Dehistanyň aýna önümleri» we «Köneürgenç Ibn Battutynyň ýazgylarynda» atly makalalarda dowam etdirilýär. Žurnalda dil bilimi, mugallymçylyk, biologiýa, informatika, lukmançylyk we ylmyň beýleki ugurlary boýunça alymlaryň ylmy işleriniň netijeleri-de ýerleşdirilipdir.

«Ykdysadyýeti sanlylaşdyrmagyň durnukly modelini işläp düzmegiň ileri tutulýan meseleleri», «Kiberhowpsuzlyk adalgalarynyň many-gurluş aýratynlyklary», «Turbageçirijiler boýunça ýangyjyň daşalmagynyň temperatura kadasyny dolandyrmagyň tehnologiýasy, «Innowasion ykdysady ösüşde döwlet gullukçylaryny taýýarlamak ulgamyny kämilleşdirmegiň ugurlary» ýaly makalalar şu ugurlar boýunça hünär eýeleriniň dykgatyny özüne çeker.