Türkmenistanyň Oguz han adyndaky Inžener-tehnologiýalar uniwersitetiniň wekilleri – häzirkizaman tehnologiýalaryň fizikasy kafedrasynyň uly mugallymy Mekan Allyýew hem-de «Sanly ykdysadyýet» hünäriniň 4-nji ýyl talyby Gowşut Akmyradow Indoneziýa Respublikasynyň Bali şäherinde geçirilen halkara ylym we oýlap tapyşlar ýarmarkasyna (ISIF) gatnaşdylar.

Türkmenistanyň topary ýarmarkada inžener fizikasy we energetika ulgamynda öz ylmy işleriniň taýýarlamalaryny görkezdi. Umuman, ISIF-iň çäklerinde bilim, durmuşy ylymlar, daşky gurşaw, inžener fizikasy we energetika, ýaşaýyş durmuş, tehnologiýalar we matematika diýen ýedi ugurlar boýunça ýaş alymlaryň işleri görkezildi.

Iri halkara sergi ýarmarkasyna dünýäniň 24 ýurdundan, şol sanda Indoneziýadan, Hindistandan, Rumyniýadan, Russiýadan, Türkmenistandan, Gazagystandan, Çehiýadan, Singapurdan, Türkiýeden, Hytaýdan, Taýlanddan, Meksikadan, Malaýziýadan, Eýrandan, Bangladeşdan, Müsürden, Gyrgyzystandan, Wýetnamdan, BAE-den, Filippinlerden, GAR-dan we Pakistandan toparlaryň 324-si gatnaşdylar.

Halkara ylym we oýlap tapyşlar ýarmarkasy (ISIF) ylym, tehnologiýalar we innowasiýalar ulgamynda halkara derejesinde ýaşlaryň gazananlaryny öwrenmäge hem-de ösdürmäge ýardam etmek maksady bilen her ýyl Indoneziýanyň Ýaş alymlar assosiasiýasy (IYSA) tarapyndan guralýar. Türkmen wekiliýetiniň bu abraýly çärä gatnaşmagy ýaş alymlaryň işleriniň baýlaşmagy, onuň täze mazmun bilen üstüniň ýetirilmegi, şeýle hem halkara hyzmatdaşlygynyň giňeldilmegi hem-de dünýäniň ýurtlary bilen ylym we bilim ulgamynda gatnaşyklaryň pugtalandyrylmagy üçin möhüm ähmiýete eýedir.