Türkmenistanyň Döwlet gümrük gullugy we BMG-niň Söwda we ösüş boýunça konferensiýasy Türkmenistanyň gümrük ulgamyny sanlylaşdyrmak we ýurdumyzda «akylly gümrük» ulgamyny döretmek boýunça bilelikdäki Taslama resminamasynyň üçünji tapgyryna badalga berdiler.

Taslama resminama Hazaryň kenarynda ýerleşýän «Awaza» milli syýahatçylyk zolagynda geçirilýän BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäginde gol çekildi. Resminama Türkmenistanyň Döwlet gümrük gullugynyň başlygy bilen BMG-niň Söwda we ösüş boýunça konferensiýasynyň Baş sekretary tarapyndan gol çekildi. Bu resminama häzirki zaman maglumat tehnologiýalarynyň ornaşdyrylmagyny, möhüm gümrük amallarynyň awtomatlaşdyrylmagyny hem-de gümrük dolandyryşynyň aç-açanlygyny we netijeliligini ýokarlandyrmagy göz öňünde tutýar.

Duşuşykda taraplar hyzmatdaşlygyň şu wagtky derejesini ara alyp maslahatlaşdylar hem-de gümrük amallarynyň sanlylaşdyrylmagy babatyndaky hyzmatdaşlygyň mundan beýläk hem ösdürilmegine ygrarlydyklaryny tassykladylar. BMG-niň Söwda we ösüş boýunça konferensiýasynyň Baş sekretary Rebeka Grimson Türkmenistanyň sanly ulgamynyň özgerişlikleri babatyndaky tagallalaryna ýokary baha berdi hem-de BMG-niň Söwda we ösüş boýunça konferensiýasy bilen Türkmenistanyň Döwlet gümrük gullugynyň arasynda strategik hyzmatdaşlygyň möhümdigini nygtady.

Öz nobatynda, Türkmenistanyň Döwlet gümrük gullugynyň başlygy halkara guramasyna yzygiderli goldaw berýändigi üçin hoşallyk bildirip, taslamanyň üçünji tapgyrynyň durmuşa geçirilmegi Türkmenistanda ýokary tehnologiýaly we döwrebap gümrük ulgamynyň döredilmeginde möhüm tapgyra öwrüljekdigini belledi.