4-nji sentýabrda Aşgabatdaky «Arçabil» myhmanhanasynda GDA ýurtlarynyň Gyzyl Haç we Gyzyl Ýarymaý jemgyýetleriniň başlyklarynyň halkara duşuşygy öz işine başlady. Garyşyk görnüşde geçirilýän bu çäre sebitde hyzmatdaşlygy berkitmäge we häzirki zaman ynsanperwerlik meselelerini çözmegiň netijeliligini ýokarlandyrmaga gönükdirilendir.
Duşuşyga gatnaşýanlaryň arasynda Halkara Gyzyl Haç we Gyzyl Ýarymaý jemgyýetleri Federasiýasynyň we Gyzyl Haç Halkara Komitetiniň wekilleri, Azerbaýjanyň, Täjigistanyň, Türkmenistanyň, Özbegistanyň Gyzyl Ýarymaý jemgyýetleriniň, şeýle hem Ermenistanyň we Russiýanyň Gyzyl Haç guramalarynyň ýolbaşçylary bar. Duşuşyga myhman hökmünde Kataryň Gyzyl Ýarymaý Milli Komitetiniň başlygynyň orunbasary-da gatnaşýar. Bu çärä Gazagystanyň we Gyrgyzystanyň Gyzyl Ýarymaý milli jemgyýetleriniň wekilleri internet arkaly goşuldy.
Duşuşygy Türkmenistanyň Gyzyl Ýarymaý Milli jemgyýetiniň başlygy Maral Açylowa açdy.
Bu çäräniň Halkara parahatçylyk we ynanyşmak ýylynyň çäginde geçirilmegi bolsa pikir alyşmalara aýratyn wajyplyk berýär. Duşuşyga gatnaşýanlar iki günüň dowamynda adatdan daşary ýagdaýlara garşy göreş mehanizmleri, betbagtlyklara çydamlylygy ýokarlandyrmak, ynsanperwer diplomatiýany we halkara ynsanperwer hukugyny ösdürmek ýaly birnäçe möhüm meseleleri ara alyp maslahatlaşarlar.
Türkmenistanyň hemişelik Bitaraplygy esasly pikir alyşmalar üçin ajaýyp mümkinçilik döredýär. Bu ýerlik, hatda Gyzyl Haç we Gyzyl Ýarymaý Milli jemgyýetleriniň işleýän käbir Ýewropa sebitlerinde ýüze çykan iň çylşyrymly meseleleri hem aç-açan ara alyp maslahatlaşmaga mümkinçilik berýär.
Esasy ýörelgelere we Milli jemgyýetleriň edarawy ösüşine esaslanýan ynsanperwerlik işleriň ösdürilmegine aýratyn üns berler. Milli jemgyýetleriň wekilleri häzirki wagtda GDA ýurtlarynda ynsanperwerlik babatynda ýüze çykýan meseleleri, şeýle hem öz işlerindäki kynçylyklary we zerurlyklary ara alyp maslahatlaşarlar. Şunda döwlet edaralary bilen özara gatnaşyk tejribesi, ýüze çykýan meseleleri çözmegiň usullary we bu kynçylyklardan alnan sapaklar göz öňünde tutular.
Göz öňünde tutulýan mowzuklar Gyzyl Hajyň we Gyzyl Ýarymaýyň 34-nji Halkara maslahatynyň, şeýle hem 2024-nji ýyldaky Wekiller maslahatynyň kararlarynyň ileri tutulýan ugurlaryna laýyk gelýär.
