Türkmenistanyň Ministrler Kabinetiniň sanly ulgam arkaly geçirilen mejlisinde Türkmenistanyň Prezidenti Serdar Berdimuhamedow Karara gol çekdi. Resminama laýyklykda, Türkmenistanyň zähmet bazaryny 2030-njy ýyla çenli ösdürmegiň Konsepsiýasy we Konsepsiýany amala aşyrmak boýunça ýerine ýetirilmeli çäreleriň meýilnamasy tassyklandy.

Hökümet mejlisinde Ministrler Kabinetiniň başlygynyň orunbasary H.Geldimyradow kabul edilen resminama bilen baglanyşykly meseleleriň 2024-nji ýylyň 24-nji sentýabrynda Türkmenistanyň Halk Maslahatynyň mejlisinde türkmen halkynyň Milli Lideri Gahryman Arkadagymyz tarapyndan kesgitlenendigini aýtdy.

Konsepsiýada ýurdumyzda zähmet bazaryny ösdürmegiň maksatlary, wezipeleri, esasy ugurlary hem-de ony durmuşa geçirmekden garaşylýan netijeler beýan edilýär.

Şeýlelikde, ilatyň iş bilen üpjünçiligini gowulandyrmak, halkara hukugyň umumy ykrar edilen kadalaryny göz öňünde tutmak bilen, degişli kanunçylyk binýadyny has-da kämilleşdirmek we bu ugurda sanly hyzmatlaryň gerimini giňeltmek boýunça birnäçe çäreler görler.