Moskwanyň Halkara söwda merkezinde Bütindünýä jemgyýetçilik assambleýasynyň çäklerinde «Dünýäniň çagalary: dostlaşmagyň wagty» atly Bütindünýä döredijilik festiwalynyň ýeňijilerini sylaglamak dabarasy geçirildi.
Türkmenabat şäheriniň çagalar sungat mekdebiniň okuwçysy Aziza Bäşimowa bäsleşigiň baş baýragyna mynasyp boldy.
2025-nji ýylyň mart-awgust aýlary aralygynda geçirilen festiwal 5 ýaşdan 15 ýaşa çenli çagalary we ýetginjekleri birleşdirdi. Bäsleşige dünýäniň 70 ýurdundan zehinli çagalaryň gatnaşmagy aýratyn täsir galdyrýar.
Festiwal «Açyk ýürekler» atly haýyr-sahawat gaznasy we maşgala institutyny hem-de däp bolan maşgala gymmatlyklaryny goldamak boýunça «Atalaryň birleşigi» Bütinrussiýa jemgyýetçilik guramasy tarapyndan guraldy.
Bäsleşigiň eminler toparyna suratkeş, şahyr we jemgyýetçilik işgäri, Mark Şagalynyň ýegeni Irina Markowa-Şagal ýolbaşçylyk etdi. Festiwal Russiýa Federasiýasynyň Prezidentiniň çaganyň hukuklary boýunça ygtyýarly wekili Mariýa Lwowa-Belowanyň goldaw bermeginde geçdi.
Bäsleşige dürli tehnikadaky eserler, portretler, taryhy wakalaryň, dogduk mekanyň tebigatynyň, maşgala durmuşynyň, ýadygärlikleriniň, ýatdan çykmajak ýerleriň we Watanymyzyň dabara bilen bagly çäreleriniň suratlary «Meniň dünýäm», «Aragatnaşygyň şatlygy», «Agzybir maşgala» we «Gelejek baradaky arzuwlar» atly ugurlar boýunça kabul edildi.
Bu ýeňiş Türkmenistan üçin aýratyn uly ähmiýete eýedir, çünki bu ýyl BMG-niň Baş Assambleýasynyň ýörite Kararnamalary bilen üç gezek tassyklanan Türkmenistanyň hemişelik Bitaraplyk derejesiniň 30 ýyllygy bellenilýär.
Türkmenistanyň başlangyjy bilen Birleşen Milletler Guramasynyň Baş Assambleýasy 2025-nji ýyly «Halkara parahatçylyk we ynanyşmak ýyly» diýip yglan etdi. Bu bolsa, ähli döwletleri parahatçylygyň we ynanyşmagyň dünýä gurluşynyň esasy ýörelgesi hökmünde durmuşa geçirmegiň syýasy, dünýä garaýyş we amaly taraplaryny öz içine alýan bilelikdäki işlere hödürlemek we olara çagyrmak diýmekdir.
«Dünýäniň çagalary: dostlaşmagyň wagty» atly Bütindünýä döredijilik festiwaly parahatçylygy häzirki zaman medeniýetiniň ýokary gymmatlygy hökmünde berkarar etmek maksady bilen, dürli milletlerden, durmuş mümkinçiliklerinden we fiziki saglyk ýagdaýyndan bolan dürli ýaşdaky çagalary birleşdirdi. Sebäbi planetamyzyň geljegi diňe dünýäniň häzirki çagalaryna degişlidir.
Sungat raýdaşlygy we birek-birege düşünmegi öňe sürmekde möhüm orun oýnaýar. Guramaçylar ýaşlary jemgyýetçilik diplomatiýasyna çekýän şeýle taslamalaryň halkara gatnaşyklarynyň geljegini gurmaga we döwletleriň arasyndaky dartgynlygy azaltmaga kömek etjekdigine ynanýarlar.
