Halkara parahatçylyk we ynanyşmak ýylynda Balkan welaýatynyň oba hojalykçylary 13 müň gektar pagta ýerinden bol we ýokary hilli hasyl ýygnamagy meýilleşdirýärler. Bu ugurda olar hormatly Prezidentimiziň Türkmenistanyň Ministrler Kabinetiniň Başlygynyň oba hojalyk toplumyna gözegçilik edýän orunbasarynyň, welaýatlaryň häkimleriniň gatnaşmagynda sanly ulgam arkaly geçirýän iş maslahatlarynda pagta ýygymyny guramaçylykly geçirmek babatda berýän tabşyryklaryndan ugur alyp, önümçilik depginlerini barha ýokarlandyrýarlar.
Hemişelik Bitaraplygymyzyň şöhratly 30 ýyllyk baýramynyň ajaýyp dabaralara, şanly wakalara beslenýän Halkara parahatçylyk we ynanyşmak ýylynda gowaçanyň bol hasylyny kemala getiren welaýatyň daýhanlary gymmatly ekiniň hasylyny ýygnap almagy möwsümiň ilkinji günlerinden talabalaýyk ýola goýdular. Şeýle jogapkärli işler pagta meýdanlarynda ir ertirden giç agşama çenli gowşamaýan depginlerde dowam edýär.
Pagta ýygymynyň üstünliklere beslenmegine Türkmenistanyň Kärdeşler arkalaşyklarynyň Balkan welaýat hem-de Bereket etrap birleşmeleriniň işgärleri, medeniýet we sungat ussatlary hem özleriniň mynasyp goşantlaryny goşýarlar. Olar «ak altynly» atyzlarda – meýdan düşelgelerinde günortan arakesme wagtlarynda pagtaçylaryň arasynda bolup, hasyl ussatlarynyň berekellasyny, armasyny ýetirip durýarlar. Täsirli çäreleriň dowamynda hormatly Prezidentimiziň oba hojalyk toplumyny ösdürmek, daýhanlaryň ýokary önümçilik netijelerini gazanmaklaryny üpjün etmek babatdaky hemaýat-goldawlarynyň ajaýyp miweleri berýändigi nygtalyp, taýsyz tagallalary üçin döwlet Baştutanymyza egsilmez alkyş, hoşallyk sözleri beýan edildi. Medeni çärelerde ýaňlanan döwrebap aýdym-sazlar, tans we folklor toparlarynyň joşgunly çykyşlary möwsüme gatnaşýan pagtaçylara uly şatlyk paýlaýar.
Kärdeşler arkalaşyklarynyň Bereket etrap birleşmesi tarapyndan kärendeçileriň, kombaýnçylaryň, awtoulaglary sürüjileriň arasynda bäsleşiklerem geçirilip, hünär ussatlygy boýunça ýeňiji bolanlara Hormat hatlarydyr ýadygärlik sowgatlary dabaraly ýagdaýda gowşurylýar. Şeýle-de jemgyýetçilik guramasynyň wekilleriniň Türkmenistanyň Halk Maslahatynyň taryhy çözgütlerini ilata düşündirmek, pagta ýygymynyň depginini ýokarlandyrmak barada alyp barýan wagyz-nesihat işleridir höweslendiriji çäreleri pagtaçylary täze-täze zähmet ýeňişlerine ruhlandyrýar.
