Türkmenistan ABŞ-nyň Kongresi bilen hyzmatdaşlygy ikitaraplaýyn gatnaşyklary ösdürmegiň möhüm ugry hökmünde görýär. Bu özara gatnaşyk kanun çykaryjylyk işinde tejribe alyşmaga, sebit we halkara gün tertibiniň möhüm meselelerini ara alyp maslahatlaşmaga gönükdirilendir. Bu barada Türkmenistanyň Prezidenti Serdar Berdimuhamedow Waşington şäherine iş saparynyň çäklerinde Amerikanyň Birleşen Ştatlarynyň Kongresiniň wekilleri bilen duşuşykda belledi.

Döwlet Baştutanymyz Kongres wekilleriniň Türkmenistana eden saparlaryny we parlamentara hyzmatdaşlygy giňeltmek boýunça geçirilen çäreleri ýatladyp, iki ýurduň kanun çykaryjy edaralarynyň arasyndaky ýola goýlan netijeli gatnaşyklary işjeňleşdirmegiň özara düşünişmegi we syýasy gatnaşyklary pugtalandyrmagy höweslendirmegine ynam bildirdi.

Şol bir wagtyň özünde, hormatly Prezidentimiz Serdar Berdimuhamedow Türkmenistanyň Amerikanyň Birleşen Ştatlary bilen syýasy, ykdysady we ynsanperwer ulgamlarda özara gatnaşyklary ösdürmäge uly ähmiýet berýändigini nygtady.

Şunuň bilen baglylykda, döwlet Baştutanymyz «C5+1» hyzmatdaşlyk formatynyň 10 ýyllyk gurluşykly hyzmatdaşlygyň dowamynda howpsuzlyk, ykdysadyýet, howa we energetika meselelerini ara alyp maslahatlaşmak üçin netijeli meýdança bolup hyzmat edýändigine aýratyn ünsi çekdi.