Merkezi Aziýa soňky döwürde sebitleýin durnuklylygy pugtalandyrmakda möhüm üstünliklere eýe boldy. Bu barada Gyrgyzystanyň Türkmenistandaky Adatdan daşary we Doly ygtyýarly ilçisi Azizbek Madmarow 5-nji dekabrda Aşgabatda BMG-niň Howpsuzlyk Geňeşiniň hemişelik däl agzalygyna hödürlenmegine bagyşlanan brifingde aýtdy.

Diplomat sebitiň, esasanam, Gyrgyzystanyň, Özbegistanyň we Täjigistanyň arasyndaky serhet meselelerini çözmekde uly üstünlikleri gazanandygyny nygtady. Munuň özi Merkezi Aziýa ýurtlarynyň jedelleri çözmek, ynam döretmek hem-de birek-birege hormat goýmak esasynda durnukly hyzmatdaşlygy ösdürmek meselesine parahatçylykly we konstruktiw çemeleşmä ygrarlydygyny görkezýär.

Ilçi şeýle hem Afrika, Aziýa we Latyn Amerika ýaly ösüp barýan ýurtlaryň BMG-niň Howpsuzlyk Geňeşiniň parahatçylyk işine gatnaşmagy kabul edilýän çözgütleriň has inklýuziw bolmagyna hem-de halkara jemgyýetçiliginiň bähbitlerini görkezjekdigini belledi.

Diplomatik wekilhananyň ýolbaşçysy Merkezi Aziýa ýurtlarynyň parahatçylygyň, durnuklylygyň we halkara hukugyna hormat goýmagyň ýörelgelerine yzygiderli eýerýändigini nygtady. Olar BMG-niň başlangyçlaryna işjeň gatnaşýan halkara jemgyýetçiliginiň jogapkär agzalary hökmünde özlerini görkezdiler.

Şu nukdaýnazardan, brifingde Türkmenistanyň möhüm orny aýratyn bellenildi.

Ýurduň energetika we ulag geçelgelerini ösdürmek, ekologiýa diplomatiýasy we suw serişdelerini dolandyrmak boýunça başlangyçlary sebitleýin ynamy, durnuklylygy we durnukly ösüşi pugtalandyrmaga uly goşant goşýar. Türkmenistanyň hemişelik Bitaraplyk syýasaty bolsa parahatçylygy hem-de howpsuzlygy pugtalandyrmagyň guraly hökmünde özüniň netijeliligini tassyklap, adalatly parahatçylyga barýan ýoluň diňe gepleşik we ynam arkaly mümkindigini görkezdi.