Birleşen Milletler Guramasynyň Baş sekretarynyň orunbasary we BMG-niň Ženewadaky edarasynyň Baş direktory Tatýana Walowaýa Türkmenistanyň sebit we halkara arenalaryndaky üstünliklerine we ornuna ýokary baha berdi. Aşgabadyň merkezinde ýerleşdirilen Bitaraplygyň 30 ýyllygyna bagyşlanan binanyň açylyş dabarasynda eden çykyşynda syýasatçy ýurduň döwlet gurluşyny berkitmekde, durnuklylygy üpjün etmekde we halkara hyzmatdaşlygyny ösdürmekde gazanan esasy üstünliklerini aýratyn belläp geçdi.
T.Walowaýa soňky onýyllyklaryň dowamynda Türkmenistanyň öz döwlet gurluşynyň berk binýadyny döredendigini, syýasy durnuklylygy üpjün edendigini, ykdysady we sosial ulgamlarda uly üstünliklere ýetendigini nygtady.
«Bu üstünlikleriň hemmesi ýurduň mundan beýläk-de ösmeginiň binýadydyr. Sebitde parahatçylygy saklamagyň 30 ýyllyk goňşuçylyk syýasaty öz miwesini berdi. Häzirki wagtda Türkmenistan diňe bir Merkezi Aziýada däl, eýsem, dünýäde möhüm sebitleýin meseleleri çözmekde we halkara hyzmatdaşlygyny berkitmekde ygtybarly we abraýly hyzmatdaş hökmünde çykyş edýär» diýip, T.Walowaýa aýtdy.
Şeýle-de BMG-niň Baş sekretarynyň orunbasary Türkmenistanyň halkara ýadro ýaraglaryny ýaýratmazlyk düzgünini berkitmekde goşan goşandyna aýratyn üns berdi. 2009-njy ýylda Merkezi Aziýada Ýadro ýaraglaryndan azat zolagyny döretmek hakyndaky Şertnamanyň güýje girmegi sebitleýin durnuklylygy pugtalandyrmaga we radioaktiw hapalanmadan ejir çeken sebitleriň daşky gurşawyny dikeltmekde halkara hyzmatdaşlygyna zerur itergi bermäge hyzmat etdi.
Mundan başga-da, ekologiýa we howanyň üýtgemegi babatda hyzmatdaşlygy pugtalandyrmakda, şol sanda Aral deňziniň meselesini çözmekde ýurduň möhüm orny beýan edildi.
Ženewadan gelen myhman üstünlikli halkara hyzmatdaşlygynyň ajaýyp we inkär edip bolmajak mysaly hökmünde Türkmenistanyň öňüni alyş diplomatiýasyndaky özboluşly tejribesini, şol tejribäniň çäklerinde BMG-niň Merkezi Aziýa üçin öňüni alyş diplomatiýasynyň sebitleýin merkeziniň 18 ýyl bäri Aşgabatda üstünlikli iş alyp barýandygyny görkezdi.
«Öňüni alyş diplomatiýasy gapma-garşylyklaryň öňüni almakda, parahatçylygy hem-de durnuklylygy saklamakda netijeli gural hökmünde çykyş edýär. Türkmenistanyň Aziýanyň we Ýakyn Gündogaryň çatrygyndaky amatly geografik ýerleşişi hem-de daşary syýasatda üýtgewsiz Bitaraplyk ugry oňa parahatçylyk ugrunda ýurtlary we halklary baglanyşdyryp, Gündogar bilen Günbataryň arasynda araçy hökmünde çykyş etmäge mümkinçilik berýär» diýip, BMG-niň Baş sekretarynyň orunbasary sözüni jemledi.
